တာချီလိတ်၊ ဒီဇင်ဘာ ၁

ဖိလစ်ပိုင်နိုင်ငံ၊ မနီလာမြို့တွင် ကျင်းပပြုလုပ်သည့် Mister Universe Tourism 2019 တွင် တာချီလိတ်မြို့မှ မြန်မာနိုင်ငံကိုယ်စားပြု သွားရောက်ယှဉ်ပြိုင်သည့် Mister တစ်ဦးဖြစ်သူ ဇွဲမင်းခန့်က Mister Photogenic ဆုကို ရရှိခဲ့သည်။

ဖိလစ်ပိုင်နိုင်ငံ၊ မနီလာမြို့ရှိ Makati City တွင် နိုဝင်ဘာလ ၁၇ရက်မှ ၂၇ရက်အထိ ကျင်းပသည့် Mister Universe Tourism 2019 ပြိုင်ပွဲကို အာဆီယံနှင့် အာရှဒေသရှိ နိုင်ငံကိုယ်စားပြု Misterများ ဝင်ရောက်ယှဉ်ပြိုင်ကြပြီး မြန်မာနိုင်ငံကိုယ်စားပြု တာချီလိတ်မြို့မှ Mister ဇွဲမင်းခန့်က Mister Photogenic Award ဆုရရှိခဲ့ပြီး Mister Universe ဆုတွင်လည်း စကာတင် (၅)ဦးစာရင်း ဝင်ခဲ့ကြောင်း သိရသည်။

“တခြားနိုင်ငံမှာ ပြိုင်ရတာဆိုတော့ အခက်အခဲတွေတော့ အများကြီးပေါ့။ ဘာသာစကားမတူတာရော။ နောက်ပြီး ကျွန်တော်က ဖျားတော့ ဆေးသောက်လိုက်၊ ပြိုင်လိုက် လုပ်ရတယ်။ ပြိုင်ပွဲက Tourism ခေါင်းစဉ်နဲ့ ဆိုတော့ နိုင်ငံအနှံ့မှာ လှည့်ပြီး ဓာတ်ပုံတွေရိုက်ရတယ်။ ပြီးတော့ ပြိုင်ပွဲမှာ အမျိုးသားဝတ်စုံတွေ၊ ရိုးရာဝတ်စုံတွေကိုလည်း အကောင်းဆုံးဖြစ်အောင် ပြင်ဆင်ခဲ့ရတယ်” ဟု Mister ဇွဲမင်းခန့်က ပြောသည်။

Mister ဇွဲမင်းခန့်သည် ၂၀၁၈ ခုနှစ်၊ ဒီဇင်ဘာလအတွင်းက တာချီလိတ်မြို့တွင် ကျင်းပသည့် Mister World Tachileik ပြိုင်ပွဲတွင် ဆုရရှိခဲ့သည်။ ထို့နောက် ရန်ကုန်တွင် ကျင်းပသည့် Mister Myanmar ပြိုင်ပွဲတွင် ဝင်ရောက်ယှဉ်ပြိုင်ရာ Mister Myanmar ပြိုင်ပွဲတွင် ဆုထပ်မံရရှိခဲ့ပြီး ဖိလစ်ပိုင်နိုင်ငံတွင် မြန်မာနိုင်ငံကိုယ်စားပြု ဝင်ရောက်ယှဉ်ပြိုင်ရခြင်းဖြစ်သည်။

MK – 003

MeKongNews