တာချီလိတ်၊ ဇန်နဝါရီ ၁၄
ရှမ်းပြည်နယ်(အရှေ့ပိုင်း)တာချီလိတ်မြို့နယ်တွင် ၂၀၁၉-၂၀၂၀ ဘဏ္ဍာနှစ် ပြည်ထောင်စု/ပြည်နယ်ရန်ပုံငွေဖြင့် ကျေးရွာ ၁၄ ရွာ သောက်သုံးရေ ရရှိရေးအတွက် စိမ့်စမ်းရေ သွယ်တန်းခြင်း ဆောင်ရွက်သွားမည်ဖြစ်ကြောင်း တာချီလိတ်မြို့နယ် ကျေးလက်ဒေသဖွံ့ဖြိုးတိုးတက်ရေး ဦးစီးဌာနမှ သိရသည်။
ကျေးရွာ ၁၄ ရွာ သောက်သုံးရေ ရရှိရေးအတွက် စိမ့်စမ်းရေ သွယ်ယူခြင်းလုပ်ငန်းနှင့် ဝန်ထမ်းအိမ်ယာတည်ဆောက်ခြင်း လုပ်ငန်းများ ဆောင်ရွက်သွားမည့် ကိစ္စရပ်နှင့် ပတ်သက်ပြီး ဇန်နဝါရီလ ၁၃ရက် နံနက် (၁၀)နာရီတွင် တာချီလိတ်မြို့နယ်၊ ကျေးလက်ဒေသဖွံ့ဖြိုးတိုးတက်ရေး ဦးစီးဌာန ရုံးတွင် ရှင်းလင်းဆွေးနွေးကြသည်။
အဆိုပါ ရှင်းလင်းဆွေးနွေးပွဲသို့ တာချီလိတ်မြို့နယ်မှ အမျိုးသားလွှတ်တော် ကိုယ်စားလှယ် ဦးစိုင်းလုံစံခတ်၊ တာချီလိတ်ခရိုင်ကျေးလက်ဒေသ ဖွံ့ဖြိုးတိုးတက်ရေးဦးစီးဌာန ခရိုင်ဦးစီးမှူး ဦးဝင်းမြတ်သိန်း ၊ တာချီလိတ်မြို့နယ် ဒုတိယမြို့နယ် အုပ်ချုပ်ရေးမှူး ဦးမင်းအောင်၊ တာချီလိတ်မြို့နယ် ကျေးလက်ဒေသဖွံ့ဖြိုးတိုးတက်ရေး ဦးစီးဌာန မြို့နယ်ဦးစီးမှူး ဦးဇော်မိုးနှင့် ကျေးရွာများမှ တာဝန်ရှိသူများ၊ တင်ဒါအောင် ကုမ္ပဏီများမှ တာဝန်ရှိသူများ တက်ရောက်သည်။
၂၀၁၉-၂၀၂၀ ဘဏ္ဍာနှစ် ပြည်ထောင်စု ဘတ်ဂျက်ဖြင့် တာချီလိတ်မြို့နယ်အတွင်းရှိ မုန်းမွန်းပလောင်ပါ (၆)ရွာ၊ ပါဘီး-၃ ကျေးရွာ၊ ကျတဲတိုဘိုကျေးရွာ၊ တာပုံကျေးရွာ၊ ဖက်ဟိ(အာခါ)ကျေးရွာ၊ ရွှေပြည်အေးကျေးရွာ၊ ဖလောက်ကျေးရွာ၊ လွန်းကျိုင်းကျေးရွာနှင့် ပါခါးကျေးရွာတို့တွင် သောက်သုံးရေရရှိရေးအတွက် စိမ့်စမ်းရေးသွယ်တန်းခြင်းနှင့် ဂါလံ ၁၀ဝဝဝ ဆံ့ကန် တည်ဆောက်ခြင်းတို့ကို လုပ်ဆောင်သွားမည် ဖြစ်ပြီး အဆိုပါလုပ်ငန်းများ ဆောင်ရွက်ရန်ရာတွင် တင်ဒါပါ စည်းမျဉ်း၊ စည်းကမ်းအညီ လုပ်ဆောင်ရန်နှင့် လိုအပ်ချက်များရှိပါက တင်ပြအကူအညီတောင်းခံရန် အမျိုးသားလွှတ်တော် ကိုယ်စားလှယ် ဦးစိုင်းလုံစံခတ်က ပြောဆိုရှင်းလင်းခဲ့သည်။
တာချီလိတ်မြို့နယ်အတွင်း ကျေးရွာသောက်သုံးရေ ရရှိရေးအတွက် ကျေးလက်ဒေသဖွံ့ဖြိုးတိုးတက်ရေး ဦးစီးဌာနက ၂၀၁၂-၂၀၁၃ဘဏ္ဍာနှစ်မှ စတင်လုပ်ဆောင်ခဲ့ရာ ၂၀၁၈-၂၀၁၉ ဘဏ္ဍာနှစ်အထိ ကျေးရွာပေါင်း (၃၂၀) တွင် သောက်သုံးရေ ရရှိရန် စိမ့်စမ်းရေ သွယ်တန်းသည့် လုပ်ငန်းပေါင်း (၇၈)ခုလုပ်ဆောင်ပြီးစီးကြောင်း သိရသည်။
Mekong News 