မြန်မာနိုင်ငံမှာ လူမျိုးတုန်းသတ်ဖြတ်မှုတွေဖြစ်ပွားခဲ့ကြောင်း ဂမ်ဘီယာနိုင်ငံ၏စွပ်စွဲချက်နှင့် ဂမ်ဘီယာနိုင်ငံတောင်းဆိုထားသည့် မြန်မာနိုင်ငံအပေါ် ကြားဖြတ်ကြိုတင် ကာကွယ်ရေးအစီအစဉ် (Provisional Measures)များသတ်မှတ်ပေး၊ မပေး ဇန်နဝါရီ ၂၃ ရက် ကြာသပတေးနေ့တွင် နိုင်ငံတကာတရားရုံး ICJက ဆုံးဖြတ်ရန်ရှိနေသည်။

ဆုံးဖြတ်ရန်ရှိနေကြောင်း ဂမ်ဘီယာတရားရေးဝန်ကြီးဌာန၏ တွစ်တာစာမျက်နှာတွင် ကြေညာထားသည်။

ဘင်္ဂါလီများအပေါ် လူမျိုးတုန်းသတ်ဖြတ်မှု ကာကွယ်ရေးကွန်ဗင်းရှင်းကိုချိုးဖောက်ထားလို့ ကြိုတင်ကာကွယ်သည့် လုပ်ငန်းစဉ်များစတင်ရန် နိုဝင်ဘာ ၁၁ ရက်တွင် အစ္စလာမ်မစ် ပူးပေါင်းဆောင်ရွက်ရေးအသင်း(OIC)ကိုယ်စား ဂမ်ဘီယာနိုင်ငံက မြန်မာနိုင်ငံကို စွဲချက်တင်ရန်လျှောက်ထားခဲ့သည်။

ICJမှ ဂမ်ဘီယာ၏လျှောက်တင်မှုတွင် တပ်မတော်က ဘင်္ဂါလီအမျိုးသမီးများကို မုဒိမ်းကျင့်ခဲ့ကြောင်း၊ မီးရှို့ခဲ့ကြောင်း၊ ဘင်္ဂါလီများ၏စိုက်ပျိုးမြေများကိုသိမ်းယူခဲ့ကြောင်း မြန်မာအစိုးရကပြည်ဝင်ခွင့်ပိတ်ထားသည့် ကုလသမဂ္ဂအချက်အလက်ရှာဖွေရေးမစ်ရှင် FFMကိုကိုးကားပြီး မြန်မာနိုင်ငံကို စွပ်စွဲခဲ့သည်။

၂၀၁၆ ခုနှစ်နှင့် ၂၀၁၇ ခုနှစ်တို့တွင် ARSAအကြမ်းဖက်အဖွဲ့၏ တိုက်ခိုက်မှုကြောင့် တပ်မတော်က နယ်မြေရှင်းလင်းရေး စစ်ဆင်ရေးလုပ်ခဲ့ပြီးနောက်ပိုင်း ဘင်္ဂါလီ ၇ သိန်းကျော် ဘင်္ဂလားဒေ့ရှ်နိုင်ငံဘက်ထွက်ပြေးခဲ့ကြသည်။

ကြားဖြတ်ကြိုတင်ကာကွယ်ရေး အစီအစဉ်လုပ်ရန် ICJ တွင် ဂမ်ဘီယာတောင်းဆိုခြင်းကိုပယ်ချရန်နှင့် ဂမ်ဘီယာနိုင်ငံ၏စွဲချက်ကို ရုတ်သိမ်းပေးရန် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဒီဇင်ဘာ ၁၂ ရက် ကြာသပတေးနေ့တွင် တောင်းဆိုခဲ့သည်။

MeKongNews