တာချီလိတ်၊ ဇန်နဝါရီ ၁၇

ထိုင်းနိုင်ငံ မယ်ဆိုင်မြို့နှင့် မြန်မာနိုင်ငံ တာချီလိတ်မြို့တို့ကို ဆက်သွယ်ထားသည့် မြန်မာ-ထိုင်း ချစ်ကြည်ရေး တံတား (၁)ပေါ်မှ ဖြတ်သန်းသွားလာသည့် ခရီးသွားများကို ကော်ရိုနာဗိုင်းရပ်စ် ကူးစက်မှုနှင့် ပတ်သက်ပြီး စောင့်ကြည့်မှုများ လုပ်ဆောင်သွားမည်ဖြစ်ကြောင်း တာချီလိတ်ခရိုင် ပြည်သူ့ကျန်းမာရေး ဦးစီးဌာနမှ သိရသည်။

ဆားစ်ရောဂါနှင့် ဆင်တူသည့် အဆိုပါ ကော်ရိုနာဗိုင်းရပ်စ် ကူးစက်ခံရမှုနှင့် ပတ်သက်ပြီး အမှတ်(၁) တံတားပေါ်မှ ဖြတ်သန်းသွားသည့် ခရီးသွားများကို အဖျားတိုင်းတာမှု ပြုလုပ်သွားမည် ဖြစ်ပြီး ဖျားနာမှုရှိပါက လိုအပ်သည့် စစ်ဆေးမှုများ လုပ်ဆောင်သွားမည်ဖြစ်ကြောင်း တာချီလိတ်ခရိုင် ပြည်သူ့ကျန်းမာရေးဦးစီးဌာန ခရိုင်ကျန်မာရေးဦးစီးမှူး ဒေါက်တာရွှေဝင်းက မဲခေါင်သတင်းဌာနကိုပြောသည်။

“အဖျားတိုင်းမယ်။ ဖျားတယ်ဆိုရင် လွန်ခဲ့တဲ့ ၁၄ရက်အတွင် တရုတ်နိုင်ငံ ဝူဟန်မြို့ကို သွားခဲ့ဖူးသလား စစ်ဆေးမယ်။ ဝူဟန်ကို သွားခဲ့ဖူးတယ်ဆိုရင်တော့ လိုအပ်တဲ့ ဓာတ်ခွဲစစ်ဆေးမှုတွေ လုပ်ဆောင်သွားမှာပေါ့” ဟု ၎င်းက ပြောသည်။

ထို့အပြင် အဆိုပါ ကော်ရိုနာဗိုင်းရပ်စ်နှင့်ပတ်သက်သည့် ပညာပေး ဗီနိုင်းများလည်း တံတား (၁)တွင် ချိတ်ဆွဲသွားရန် စီစဉ်ထားကြောင်း သိရသည်။

အဆိုပါ ကော်ရိုနာဗိုင်းရပ်စ်မှာ လူလူခြင်း ကူးစက်မှု မရှိဘဲ မည်သို့ ကူးစက်တတ်သည်ကို လက်ရှိအချိန်တွင် လေ့လာနေဆဲဖြစ်ကြောင်း သိရသည်။

တရုတ်နိုင်ငံ၊ ဝူဟန်မြို့တွင် အဓိက ဖြစ်ပွားနေသည့် အဆိုပါ ဗိုင်းရပ်စ်ပိုးကြောင့် နိုင်ငံတကာ ဝင်ပေါက်ထွက်ပေါက်များတွင် တရုတ်နိုင်ငံမှ လာသည့် ခရီးသွားများကို စစ်ဆေးမှုများ ပြုလုပ်နေပြီး ရောဂါကူးစက်ခံထားရသူ ထိုင်းနိုင်ငံတွင် ၂ဦး၊ ဂျပန်နိုင်ငံတွင် တစ်ဦး တွေ့ရှိထားသည်။

ဝူဟန်မြို့မှပြန်လာပြီး ၁၄ ရက်အတွင်း ဖျားနာ၊ လည်ချောင်းနာ၊ နှာရည်ယို၊ အသက်ရှူကြပ်မှုများခံစားနေရပါက နီးစပ်ရာဆရာဝန်ထံဖြစ်စေ၊ ရောဂါကူးစက်မှု ထိန်းချုပ်ရေးဌာနထံဖြစ်စေ ဆက်သွယ်အသိပေးနိုင်သည်ဟုလည်း ထိုင်းနိုင်ငံတွင် ထုတ်ပြန်ထားသည်။

လက်ရှိအချိန်တွင် တရုတ်နှစ်သစ်ကူးကာလဖြစ်သည့်အတွက် တရုတ်ခရီးသွားများ ပုံမှန်ထက်များပြားနေသည်။

MK – 001

MeKongNews