တာချီလိတ်၊ ဇန်နဝါရီ ၁၇
တာချီလိတ်မြို့တွင် နေထိုင်သည့် ထိုင်းနိုင်ငံသားတစ်ဦးကို မူးယစ်ဆေးဝါးရှာဖွေခွင့် ဝရမ်းဖြင့် ၎င်းနေအိမ်တွင် ဝင်ရောက်ဖမ်းရာ ပစ္စတို (၂)လက်နှင့် ကျည်ဆံအချို့ကို ဇန်နဝါရီလ ၁၆ရက် နေ့လည်ပိုင်းက ဖမ်းဆီးရမိသည်။
တာချီလိတ်မြို့၊ ရန်အောင်မြေရပ်ကွက်၊ ပါလျံ(၂) ရှိ ထိုင်းနိုင်ငံသား နိုင်ဝမ်နိုင် ထောင်ပိုင်ထောင်း(ခ) စိုင်းလုံနေထိုင်သည့် အိမ်ကို ရဲတပ်ဖွဲ့ဝင်များပါဝင်သည့် ပူးပေါင်းအဖွဲ့က ဇန်နဝါရီလ ၁၆ရက် နေ့လည့်ပိုင်းက ဝင်ရောက်ရှာဖွေရာ အဆိုပါထိုင်းနိုင်ငံသားကို Glock အမျိုးအစား ပစ္စတိုတစ်လက်၊ ကျည်ကတ်တစ်ခုနှင့် ကျည်ဆံ (၉)တောင့်၊ Para အမျိုးအစား ပစ္စတိုတစ်လက်၊ ကျည်ကတ်တစ်ခုနှင့် ကျည် (၈)တောင့်၊ လိုင်စင်မဲ့ ကား (၂)စီး၊ ထိုင်းနိုင်ငံ K-Bank စာအုပ် (၅)အုပ်နှင့် SCB Bank စာအုပ် တစ်အုပ်တို့ကို ဖမ်းဆီးရမိကြောင်း တာချီလိတ်မြို့မ ရဲခစခန်းမှ သိရသည်။
“လောလောဆယ်မှာ ရှမ်းလက်နက်မှုနဲ့ အမှုဖွင့်ထားတယ်။ ပြီးရင် လဝကမှု၊ လိုင်စင်မဲ့ကား လက်ဝယ်ထားမှု တွေနဲ့ ထပ်ဖွင့်မယ်။ ထိုင်းနိုင်ငံက အလိုရှိတဲ့ တရားခံပြေး ဟုတ်၊ မဟုတ်တော့ အတည်ပြုမေးမြန်းဖို့ လုပ်ဆောင်နေပါတယ်”ဟု တာချီလိတ်မြို့မရဲစခန်းမှူး ဒုရဲမှူးအောင်ဆန်းဦးက ပြောသည်။
အဆိုပါ ထိုင်းနိုင်ငံသား နိုင်ဝမ်နိုင် ထောင်ပိုင်ထောင်း(ခ) စိုင်းလုံကို တာချီလိတ်မြို့မရဲစခန်းတွင် ဇန်နဝါရီလ (၁၆)ရက် ညပိုင်းက တရားမဝင်လက်နက်ကိုင်ဆောင်မှုဖြင့် အမှုဖွင့် ဆောင်ရွက်ထားကြောင်း သိရသည်။
Mekong News 