တာချီလိတ်၊ ဇန်နဝါရီ ၁၈

ထိုင်းနိုင်ငံ၊ မယ်ဆိုင်မြို့ဘက်သို့ ရောက်ရှိနေသည့် မြန်မာနိုင်ငံသား HIV ပိုးရှိသည့် လူနာများကို ထိုင်းနိုင်ငံဘက်မှ မြန်မာနိုင်ငံဘက်သို့ လွှဲပြောင်းရာတွင် တာချီလိတ်ခရိုင်ပြည်သူ့ဆေးရုံသို့အရောက် ပို့ဆောင်ပေးရန် ထိုင်းနိုင်ငံဘက်မှ သဘောတူညီခဲ့ကြောင်း တာချီလိတ်ခရိုင် ပြည်သူ့ကျန်းမာရေးဦးစီးဌာန၊ ခရိုင်ကျန်းမာရေးဦးစီးမှူး ဒေါက်တာရွှေဝင်းက ပြောသည်။

ဇန်နဝါရီလ ၁၇ရက်က ထိုင်းနိုင်ငံ၊ မယ်ဆိုင်မြို့မှ ဆေးဘက်ဆိုင်ရာ တာဝန်ရှိသူများနှင့် မြန်မာနိုင်ငံ၊ တာချီလိတ်ခရိုင်မှ ဆေးဘက်ဆိုင်ရာ တာဝန်ရှိသူများ တွေ့ဆုံဆွေးနွေးမှု ပြုလုပ်ခဲ့ပြီး HIV ပိုးရှိသည့် လူနာများကို လွှဲပြောင်းရာ၌ လမ်းခုလပ်တွင် ပျောက်ဆုံးသွားခြင်းများ ရှိသည့် ထိုသို့ မဖြစ်စေရန် ထိုင်းနိုင်ငံဘက်မှ တာဝန်ရှိသူများက တာချီလိတ်ခရိုင်ပြည်သူ့ဆေးရုံကြီးသို့အရောက် စေတနာဖြင့် အခမဲ့ လိုက်ပါပို့ဆောင်ပေးရန် သဘောတူညီခဲ့ခြင်းဖြစ်ကြောင်း ဒေါက်တာရွှေဝင်းက မဲခေါင်သတင်းဌာနသို့ ပြောသည်။

“တချို့ကျတော့ မယ်ဆိုင်ဘက်ကနေ လွှဲပေးလိုက်ရင် တာချီလိတ်ဆေးရုံဘက်ကို မလာတော့ဘူး။ နေရပ်ကို တန်းပြန်သွားတော့ ကြားထဲမှာပျောက်သွားတယ်။ ဒါမျိုးမဖြစ်အောင် ထိုင်းဘက်က ဗော်လန်တီယာအနေနဲ့ အရောက်ပို့ပေးဖို့ သဘောတူလိုက်ပါတယ်”ဟု ၎င်းက ပြောသည်။

တာချီလိတ်ခရိုင်ဆေးရုံကြီးသို့ လွဲပြောင်း ရောက်ရှိလာသည့် HIV လူနာများကို လိုအပ်သည့် ဆေးဝါးစောင့်ရှောက်မှုများ ပြုလုပ်ပေးပြီး ၎င်းတို့နေရပ်သို့ ပြန်လိုပါကလည်း သက်ဆိုင်ရာ ဆေးရုံနှင့် ချိတ်ဆက်ကာ လွှဲပြောင်းပေးကြောင်း သိရသည်။

၂၀၁၉ ခုနှစ်အတွင်း မယ်ဆိုင်ဘက်မှ တာချီလိတ်ဘက်သို့ လွှဲပြောင်းလာသည့် HIV ပိုးရှိသူ ၇၀ဦးခန့်ရှိပြီး အများစုမှာ ရွှေ့ပြောင်းအလုပ်သမားများဖြစ်ကြောင်း တာချီလိတ်ခရိုင်ဆေးရုံကြီးမှ အချက်အလက်များ အရ သိရသည်။

တာချီလိတ်မြို့နယ်အတွင်း ART ဆေးသောက်သုံးနေသည့် HIV ပိုးရှိသူ လူကြီး ၁၀၀၀ကျော်နှင့် အသက် (၁၃)နှစ်အောက် ကလေး ၃၉ဦးရှိကြောင်း သိရသည်။

MK – 001

MeKongNews