တာချီလိတ်၊ ဇန်နဝါရီ ၂၃
တာချီလိတ်မြို့အတွင်းရှိ လောင်းကစားဂိမ်းခုံများတွင် မူးယစ်ဆေးဝါသုံးစွဲရင်းဖြင့် ခင်မင်ရင်းနှီးလာသည့် လူငယ်တစ်စုထံမှ စိတ်ကြွဆေးပြား အပြား (၄၀၀၀)ကျော်ကို ဇန်နဝါရီလ ၂၂ ညပိုင်းက တာချီလိတ်မြို့၊ ရန်အောင်မြေရပ်ကွက်တွင် ဖမ်းဆီးရမိသည်။
မူးယစ်တပ်ဖွဲ့ဝင်များ ပါဝင်သည့် ပူးပေါင်းအဖွဲ့သည့် ဇန်နဝါရီလ ၂၂ရက် ညပိုင်းက သတင်းအရ တာချီလိတ်မြို့၊ ရန်အောင်မြေရပ်ကွက်၊ ပါလျံ (၃)ရှိ တည်းခိုခန်းတစ်ခုတွင် စောင့်ဆိုင်းနေစဉ် ဆိုင်ကယ် (၂)စီးဖြင့် ရောက်ရှိလာသည့် ဝေယံ(ခ) ရီဝေယံ၊ တင်အောင်လင်း(ခ)ကုလားနှင့် ရဲရင့်သူရတို့ကို စစ်ဆေးရာ ဝေယံလွယ်ထားသည့် လွယ်အိတ်အတွင်းမှ စိတ်ကြွဆေးပြား (၄၀၀၀)ပြားကို ဖမ်းဆီးရမိခြင်းဖြစ်ကြောင်း တာချီလိတ်မြို့မ ရဲစခန်းမှ သိရသည်။
ရဲတပ်ဖွဲ့၏ စစ်ဆေးချက်အရ ၎င်းတို့ (၃)ဦးသည် မယ်ခေါင်ရပ်ကွက်အတွင်းရှိ လောင်းကစားဂိမ်းခုံတွင် မူးယစ်ဆေးဝါ သုံးစွဲရင်း ခင်မင်ရင်းနှီးကာ စိတ်ကြွဆေးပြားများကို ဝယ်ယူရောင်းချဖြစ်ကြောင်း သိရသည်။
မူးယစ်ဆေးဝါးများနှင့်အတူ လက်ဝယ်ဖမ်းမိသည့် အသက် (၂၂)အရွယ် ဝေယံ(ခ) ရီဝေယံ၊ အသက် (၃၉)နှစ်အရွယ် တင်အောင်လင်း(ခ)ကုလားနှင့် အသက် ၃၃နှစ်အရွယ် ရဲရင့်သူရတို့ကို တာချီလိတ်မြို့မ ရဲစခန်းတွင် မူးစိတ်ပုဒ်မ ၁၉(က)/၂၁ အရ အမှုဖွင့်အရေးယူထားပြီး ကွင်းဆက်တရားခံများကို ဖမ်းဆီးရမိရေး ဆောင်ရွက်လျှက်ရှိကြောင်း သိရသည်။
Mekong News 