တာချီလိတ်၊ ဇန်နဝါရီ ၂၆

ကာလကြာရှည်ပိတ်ထားသည့် ကျိုင်းတုံ-မိုင်းလားဆက်သွယ်ထားသော ဝမ်တာပင်းလမ်းကြောင်းကို လုံခြုံရေးအရ ဆက်လက်ပိတ်ထားရဦးမည် ဖြစ်သည့်အတွက် အဆိုပါလမ်းကြောင်းမှ ကုန်သွယ်ရန် မဖြစ်နိုင်သေးကြောင်း ကုန်သွယ်ရေး ဦးစီးဌာန ညွန်ကြားရေးမှူးချုပ် ဦးမင်းမင်းက ပြောသည်။

တာချီလိတ်မြို့၊ မယ်ယန်းစုပေါင်းစစ်ဆေးရေးဂိတ်တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီးနှင့် တာချီလိတ်မြို့မှ ကုန်သွယ်လုပ်ငန်းရှင်များ ဇန်နဝါရီလ ၂၆ရက် ညနေပိုင်းက တွေ့ဆုံရာတွင် ပြောဆိုခဲ့ခြင်းဖြစ်သည်။

တာချီလိတ်မြို့နယ် ကုန်သွယ်လုပ်ငန်းရှင်များအသင်း အတွင်းရေးမှူး က တရုတ်နိုင်ငံသို့ ဆန်နှင့် စပါး တင်ပို့ရာတွင် ဝမ်တာပင်းလမ်းကြောင်းမှတဆင့် ဖြတ်သန်းတင်ပို့ခွင့်ပြုရန် ပြည်ထောင်စုဝန်ကြီးကို တင်ပြတောင်းဆိုရာ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ ကုန်သွယ်ရေးဦးစီးဌာန ညွှန်ကြားရေးမှူးချုပ် ဦးမင်းမင်းက ပြန်လည်ဖြေကြားခဲ့သည်။

“အဲဒီလမ်း(ဝမ်တာပင်းလမ်း)ကတော့ လုံခြုံရေးအရ ပြန်ဖွင့်ဖို့ မဖြစ်နိုင်သေးဘူး။ အဲဒါကြောင့် ဒီဘက် ကျိုင်းလတ်ဘက်ကနေ တင်ပို့နိုင်ဖို့ လမ်းကြောင်းကို ဖော်ဆောင်ပေးခဲ့တာ ဖြစ်ပါတယ်” ဟု ဦးမင်းမင်းက ပြန်လည်ဖြေဆိုသည်။

ဝမ်တာပင်းလမ်းကြောင်းမှတဆင့် တင်ပို့ခွင့်ရပါက လမ်းကြောင်းတိုသည့်အတွက် ကုန်စည်တင်ပို့မှုစရိတ် ပိုမိုသက်သာပြီး လုပ်ကိုင်ရန်ပိုမှုလွယ်ကူလာမည် ဖြစ်ကြောင်း ကုန်သည်များက ပြောဆိုသည်။

ဝမ်တာပင်းလမ်းကြောင်းကို ၂၀၁၆ ခုနှစ်စက်တင်ဘာလအတွင်းက အထူးဒေသ (၄) ‘ဝ’နှင့် အထူးဒေသ (၂) မိုင်းလားတို့အကြား စစ်ရေးတင်းမာမှုများ ဖြစ်ပွားပြီးနောက် တပ်မတော်မှ လုံခြုံရေးအရ ပိတ်ဆို့လိုက်ခြင်း ဖြစ်သည်။

ကျိုင်းတုံမှတဆင့် မိုင်းလားမြို့သို့ သွားမည်ဆိုပါက ဝမ်တာပင်းလမ်းကြောင်းမှ သွားပါက ၂နာရီခန့်သာ ကြာမြင့်မည် ဖြစ်ပြီး မိုင်းခတ်ဘက်မှ သွားပါက ကြာမြင့်ချိန် ၅နာရီခွဲခန့် ကြာမြင့်သည်။

MK – 001

MeKongNews