တာချီလိတ်၊ ဇန်နဝါရီ ၂၆

ညွှန်ချုပ်အဆင့်ဝန်ထမ်းများကို ကားတင်သွင်းခွင့်ပြုပြီးပါက ကျန်ဝန်ထမ်းများကို ဆက်တိုက်ကားတင်သွင်းခွင့် ပြုသွားမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ပြောသည်။

ဇန်နဝါရီလ ၂၆ရက်က ကျိုင်းလပ်မြို့သို့ ရောက်ရှိစဉ် မဲခေါင်သတင်းဌာန၏ မေးမြန်းမှုကို ဖြေကြားရာ၌ ထည့်သွင်းပြောဆိုခြင်းဖြစ်သည်။

“ဆက်တိုက်သွားမှာပဲ။ ပထမ အဆင်ပြေအောင်လို့ ညွှန်ချုပ်အကြီးတန်းတွေကို ယာယီခွင့်ပြုလိုက်တာ။ ဆင့်ကဲ ဆင့်ကဲသွားမှာပဲ။ နောက်ချန်တာတော့ မဟုတ်ဘူး။ ညွှန်ချုပ်အဆင့်က လူနည်းတော့ ပထမဆုံး စနစ်တကျဖြစ်အောင် လုပ်လိုက်တာ။ ဒါတွေက နောက်ဆက်တိုက်သွားမှာ” ဟု ပြည်ထောင်စုဝန်ကြီး ဒေါက်တာသန်းမြင့်က ပြောသည်။

ကားတင်သွင်းခွင့်ပြုမည့် အစီအစဉ်များကို မကြာမီ ရက်ပိုင်းအတွင်း ထုတ်ပြန်သွားမည်ဖြစ်ပြီး အမှားအယွင်း မရှိအောင် ညှိနှိုင်းစစ်ဆေးမှုများ ပြုလုပ်နေကြောင်း ပြည်ထောင်စုဝန်ကြီးက ပြောသည်။

ဝန်ထမ်းများကို ကားတင်သွင်းခွင့်ပြုမည်ဆိုသည့် အစိုးရ၏ မူဝါဒကြောင့် ဝန်ထမ်းများအနေဖြင့် စိတ်လှုပ်ရှားမိသလို ကိုယ့်အလှည့်ရောက်မည့် အချိန်ကို စောင့်ဆိုင်းနေကြောင်း တာချီလိတ်မြို့မှ ဦီးစီးအရာရှိ အဆင့်ရှိ ဝန်ထမ်းတစ်ဦးက ပြောသည်။

“မျှော်လင့်နေတာပေါ့။ ဒါပေမယ့် ညွှန်ချုပ်တွေကိုပဲ အရင်ပေးဦးမယ်ဆိုတော့ ကိုယ်တွေအလှည့် ဘယ်တော့ရောက်မလဲ စောင့်နေရတာပေါ့” ဟု ၎င်းက ပြောသည်။

အစိုးရဝန်ထမ်းများကို ကားတင်သွင်းခွင့်ပြုမည့် မူဝါဒကြောင့် အစိုးရဝန်ထမ်းများအကြား မျှော်လင့်စောင့်စားမှုများ ရှိနေပြီး အစိုးရအနေဖြင့် ပထမဆုံး ညွှန်ချုပ်အဆင့်ရှိ ဝန်ထမ်းများကို ကားတင်သွင်းခွင့်ပြုမည် ဖြစ်ကြောင်း ကြေညာထားသည်။

MK – 001

MeKongNews