ဝူဟန်ဗိုင်းရပ်စ်ကြောင့် ‘ဝ’နှင့် မိုင်းလားတွင် သားရဲတိရိစ္ဆာန်ရောင်းချမှု ပိတ်ပင်

တာချီလိတ်၊ ဇန်နဝါရီ ၂၇

ဝူဟန်ဗိုင်းရပ်စ် ကြိုတင်ကာကွယ်မှု လုပ်ငန်းတစ်ရပ်အနေဖြင့် သားရဲတိရိစ္ဆာန်ရောင်းချမှုကို ဇန်နဝါရီလ ၂၆ရက်မှ စတင်ကာ ပိတ်ပင်လိုက်ကြောင်း အထူးဒေသ (၂) ‘ဝ’နှင့် အထူးဒေသ (၄)  မိုင်းလားတို့က ထုတ်ပြန်ထားသည်။

တရုတ်သမ္မတ ရှီကျင့်ဖျင်က ဝူဟန်ဗိုင်းရပ်စ်နှင့် ပတ်သက်ပြီး သတိပေးပြီးနောက် တရုတ်နိုင်ငံတွင်လည်း ဇန်နဝါရီလ ၂၆ ရက်မှ စတင်ကာ သားရဲတိရိစ္ဆာန် ရောင်းချမှု၊ သယ်ယူမှုကို ပိတ်ပင်လိုက်သလို တရုတ်နိုင်ငံနှင့် ထိစပ်နေသည့် မြန်မာနိုင်ငံ အထူးဒေသ(၂) ‘ဝ’နှင့် အထူးဒေသ (၄) မိုင်းလာတို့တွင်လည်း ပိတ်ပင်လိုက်သည်။

အထူးဒေသ နှစ်ခုစလုံးတွင် ဇန်နဝါရီ ၂၆ရက်မှ စတင်ကာ ဝူဟန်ဗိုင်းရပ်စ် ကာကွယ်ရန်အတွက် တရုတ်နိုင်ငံတွင်းမှ ဝင်ရောက်လာသူများကို အပူချိန် စစ်ဆေးမှု ပြုလုပ်ခြင်း၊ လူစုလူဝေးသည့် ရုပ်ရှင်ရုံ၊ ကစားရုံကဲ့သို့ နေရာများကို ပိတ်ပင်ခြင်း၊ ကျန်မာရေးအတွက် တစ်ကိုယ်ရည်သန့်ရှင်းစွာ နေထိုင်ရန် တိုက်တွန်းခြင်း၊ မမှန်သတင်းများကို မလွှင့်ရန်နှင့် ကောလာဟလများကို မယုံကြည်ကြရန်တို့ကို ထုတ်ပြန်ခဲ့သည်။

ထိုသို့ထုတ်ပြန်ရာတွင် တောရိုင်းတိရိစ္ဆာန်များကို ရောင်းချခြင်း မပြုလုပ်ရန်လည်း ထည့်သွင်းတားမြစ်ခဲ့ကြောင်း အထူးဒေသ (၂) ပြောရေးဆိုခွင့်ရှိသူ ဦးညီရမ်းက မဲခေါင်သတင်းဌာနသို့ ပြောသည်။

ထို့ပြင် အထူးဒေသ (၄) မိုင်းလား၏ ထုတ်ပြန်ချက်တွင်လည်း မြို့မဈေးနှင့် စားသောက်ဆိုင်များတွင် တောရိုင်း တိရိစ္ဆာန်များ ရောင်းချရန် မပြုလုပ်ရန် ထည့်သွင်းဖော်ြပထားသည်။

လင်းနို့နှင့် မြွေကဲ့သို့ တောရိုင်းတိရိစ္ဆာန်များမှ တဆင့်ကူးစက်ခံရသည်ဟု ယူဆရသည့် ဝူဟန်ဗိုင်းရပ်စ်ကြောင့် ဇန်နဝါရီလ ၂၇ရက်အထိ တရုတ်နိုင်ငံတွင်း သေဆုံးသူ ၈၀ ဦး၊ ကူးစက်ခံရသူ ၂၈၀၀ ကျော် ရှိနေပြီး အခြားနိုင်ငံများဖြစ်သည့် ထိုင်း၊ ဩစတျေးလျ၊ မလေးရှား၊ စင်ကာပူ၊ ဂျပန်၊ တောင်ကိုရီးယား၊ ပြင်သစ်၊ အမေရိကန်၊ ဗီယက်နမ်၊ နီပေါ၊ ကနေဒါ၊ ပါကစ္စတန် အထိ ပျံ့နှံလျှက်ရှိသည်။

MK – 001

Photo – Ko Z

#MeKongNews