တာချီလိတ်၊ ဇန်နဝါရီ ၂၂

တာချီလိတ်တွင် ဇန်နဝါရီလ ၂၂ ရက် နံနက်အစောပိုင်းက လူ (၄)ဦး စီးလာသည့် မော်တော်ဆိုင်ကယ်ကို အရှိန်ဖြင့် ကွေ့ရာမှ တိမ်းမှောက်ပြီး ဆိုင်ကယ်စီးနင်းလာသူ (၄)ဦးစလုံး ပြင်းထန်စွာ ဒဏ်ရာရခဲ့ကြောင်း တာချီလိတ်မြို့မ ရဲစခန်းမှ သိရသည်။

ရှမ်းပြည်နယ်(အရှေ့ပိုင်း)တာချီလိတ်မြို့၊ ရန်အောင်မြေရပ်ကွက်၊ စည်ပင်ရုံးရှေ့၊ ဗိုလ်ချုပ်လမ်းမပေါ်၌ ဇန်နဝါရီ ၂၂ ရက် နံနက်ပိုင်းက ဆိုင်ကယ်တစ်စီးကို လူ(၄)ဦး စီးနင်းလာပြီး ပါလျှံမီးပွိုင့်ဘက်မှ အမှတ်(၂)ချစ်ကြည်ရေး တံတားလမ်းဆုံမီးပွိုင့်ဘက်သို့ ချိုးကွေ့မောင်းနှင်စဉ် အရှိန်မထိန်းနိုင်ဘဲ လမ်းဝဲဘက်ခြမ်းရှိ စည်ပင်ရုံးရှေ့တွင် တိမ်းမှောက်ခဲ့ပြီး ယာဉ်မောင်းနှင်သူ အိုက်ကျိုင်း (၁၉ နှစ်)၊ စီးနင်းလာသူများဖြစ်သည့် စိုင်းအွန်ခမ်း (၁၉ နှစ်)၊ စိုင်းလျှဲန်း (၁၆ နှစ်)၊ စိုင်းခမ်းလီ (၁၈ နှစ်)၊ မယ်ယန်းရွာ၊ မိုင်းကိုးကျေးရွာအုပ်စု၊ တာချီလိတ်မြို့နေသူ (၄)ဦးလုံး ဒဏ်ရာအသီးသီး ပြင်းထန်စွာရရှိခဲ့ပြီး တာချီလိတ်ပြည်သူ့ဆေးရုံတွင် အတွင်းလူနာအဖြစ် တက်ရောက် ဆေးကုသခဲ့ရသည်။

အမှုမှ ဆိုင်ကယ်အား မဆင်မခြင်ချိုးကွေ့မောင်းနှင်သူ အိုက်ကျိုင်း (၁၉ နှစ်)၊ မယ်ယန်းရွာ၊ မိုင်းကိုးကျေးရွာအုပ်စု၊ တာချီလိတ်မြို့နေသူအား တာချီလိတ်မြို့မရဲစခန်း က ယာဉ်(ပ)၉/၂၀၂၀၊ ရာဇသတ်ကြီးပုဒ်မ ၂၇၉/၃၃၇/၃၃၈ တို့ဖြင့် အမှုဖွင့် အရေးယူဆောင်ရွက်ထားကြောင်း သိရသည်။

MK – 002

MeKongNews

တာချီလိတ်၊ ဇန်နဝါရီ ၂၂

တရုတ်နိုင်ငံတွင်းရှိ ဈေးကွက်လိုအပ်ချက်မှာ ရှမ်းပြည်နယ်အရှေ့ပိုင်းနှင့် ထိပ်စပ်နေသည့် ပြည်နယ်များတွင် လိုအပ်ချက်ပိုမိုများပြားလာသဖြင့် တာချီလိတ်နယ်စပ်ပို့ကုန် တန်ဖိုးမှာ ယခင်နှစ် ကာလတူထက် (၂)ဆခန့် ပိုမိုမြင့်တက်လာကြောင်း တာချီလိတ်နယ်စပ်ကုန်သွယ်ရေး စခန်းမှ သိရသည်။

တာချီလိတ်နယ်စပ်မှ ကုန်သွယ်မှု ပမာဏမှာ ပျမ်းမျှအားဖြင့် တစ်နှစ်လျှင် ပို့ကုန် အမေရိကန်ဒေါ်လာ သန်း (၂၀)နှင့် သွင်းကုန် အမေရိကန်ဒေါ်လာ သန်း (၇၀)ခန့်ရှိပြီး လက်ရှိ ၂၀၁၉-၂၀၂၀ ဘဏ္ဍာနှစ်တွင် အောက်တိုဘာလမှ ဇန်နဝါရီလ ၁၇ရက်အထိ (၄)လတာ ကာလအတွင်း၌ပင် ပို့ကုန် အမေရိကန်ဒေါ်လာ (၁၃)သန်းကျော်နှင့် သွင်းကုန် အမေရိကန်ဒေါ်လာ (၂၄)သန်းကျော် အထိ ရှိလာပြီဖြစ်ကြောင်း တာချီလိတ်နယ်စပ်ကုန်သွယ်ရေး စခန်းမှ ညွန်ကြားရေးမှူး ဦးဝင်းလွင်က ပြောသည်။

“(တရုတ်ရဲ့) မူဝါဒကတော့ မပြောင်းပါဘူး။ ဈေးကွက်ကတော့ ပြောင်းပါတယ်။ ဈေးကွက်အနေအထားအရ တရုတ်နိုင်ငံနဲ့ ကျွန်တော်တို့ ထိစပ်နေတဲ့ နယ်စပ်မျဉ်းကြောင်း တစ်လျှောက်မှာ အဓိကအားဖြင့် ပြောမယ်ဆိုရင် မူဆယ်၊ ရွှေလီဘက်က လိုအပ်ချက်တွေ ရှိသလို ဒီဘက် ကျင်းဟုံဘက်က ကျိုင်းလပ်၊ တာချီလိတ်၊ ဝမ်ပုံပေါ့။ အဲဒီဒေသတွေနဲ့ ဆက်စပ်နေတဲ့ လိုအပ်ချက်တွေ ဖြစ်ပေါ်လာတဲ့ အခြေအနေမျိုးမှာ ကုန်စည်က ပြောင်းလဲပြီးမှ ဆောင်ရွက်တဲ့ အနေအထားဖြစ်ပါတယ်” ဟု ၎င်းက ပြောသည်။

ပြောင်းနှင့် ဆန် တင်ပို့မှုမှာ ပုံမှန်တင်ပို့နေကျဖြစ်သည့် မူဆယ်ဘက်တွင် တင်ပို့မှုလျော့ကျလာပြီး ရှမ်းပြည်နယ်အရှေ့ပိုင်းနှင့် ထိစပ်နေသည့် တရုတ်ပြည်နယ်များတွင် ဈေးကွက် လိုအပ်ချက် ဖြစ်ပေါ်လာသဖြင့် တာချီလိတ်နယ်စပ်မှ ဝယ်ယူမှုပိုမိုများပြားလာကြောင်း တာချီလိတ်နယ်စပ်ကုန်သွယ်ရေး စခန်းမှ ညွန်ကြားရေးမှူး ဦးဝင်းလွင်က ဇန်နဝါရီလ ၂၁ရက်က ပြောသည်။

“ထူးထူးခြားခြား အနေနဲ့ လက်ရှိအချိန်အထိ ပြောင်းဖူးစိတွေ ယခင်နှစ်ကထက် တန်ချိန်ပေါင်း ၂သောင်းကျော်လောက် တင်ပို့ထားနိုင်ပါတယ်။ ဆန်လည်း မနှစ်ကဆို မတင်ပို့နိုင်ဘူး။ ဒီနှစ်မှာ ကျိုင်းလပ်ကနေ တစ်ဆင့်လည်း တင်ပို့နိုင်တာ ရှိတယ်။ တာချီလိတ်ကနေလည်း တင်ပို့နိုင်တာ ရှိပါတယ်” ဟု ၎င်းက ပြောသည်။

လက်ရှိ ဘဏ္ဍာနှစ်အတွင် လာအို-မြန်မာ ချစ်ကြည်ရေးတံတားဖြစ်သည့် ကျိုင်းလပ်တံတားပေါ်မှ တဆင့် ဆန်၊ ပြောင်း၊ စပါး၊ ဆိတ်နှင့် သိုးတို့ကို တရားဝင် တင်ပို့ခွင့်ပြုခဲ့သည့်အတွက် တရုတ်ကုန်သည်များမှ လာအိုမှတဆင့် ဖြတ်သန်းကာ မြန်မာ့ကုန်စည်များကို ဝယ်ယူလာြခင်းကလည်း ကုန်သွယ်မှုတိုးလာခြင်း၏ အကြောင်းရင်း တစ်ချက်ဖြစ်ကြောင်း သိရသည်။

တာချီလိတ်နယ်စပ်ကုန်သွယ်မှုကို လအလိုက်လျာထားချက်နှင့် နှိုင်းယှဉ်ပါက ၂၀၁၉ အောက်တိုဘာလတွင် ၁၀၃ ရာခိုင်နှုန်း၊ ၂၀၁၉ ခုနှစ် နိုဝင်ဘာလတွင် ၁၃၆ ရာခိုင်နှုန်း၊ ၂၀၁၉ ဒီဇင်ဘာလတွင် ၂၁၂ ရာခိုင်နှုန်းကျော် တိုးမြှင့်ဆောင်ရွက်နိုင်ခဲ့ကြောင်း သိရသည်။
တာချီလိတ်နယ်စပ်မှတဆင့် ကုန်သွယ်မှုပမာဏမှာ ၂၀၁၆-၂၀၁၇ ဘဏ္ဍာနှစ်တွင် အမေရိကန်ဒေါ်လာ သန်း (၉၀)ကျော်၊ ၂၀၁၇-၂၀၁၈ ခုနှစ်တွင် အမေရိကန်ဒေါ်လာ (၉၂)သန်းကျော်၊ ၂၀၁၈ မီနီဘတ်ဂျက်တွင် အမေရိကန်ဒေါ်လာ (၄၆)သန်းကျော်နှင့် ၂၀၁၈-၂၀၁၉ ဘဏ္ဍာနှစ်တွင် အမေရိကန်ဒေါ်လာ (၈၉)သန်းကျော် ရှိခဲ့ကြောင်း တာချီလိတ်နယ်စပ်ကုန်သွယ်ရေး စခန်းမှ အချက်အလက်များအရ သိရသည်။

MK – 001

MeKongNews

နယူးယောက်ခ်၊ ဇန်နဝါရီ ၂၂

ဒေါ်နယ်ထရမ့် တာဝန်ထမ်းဆောင်ချိန်မှ စတင်ပြီး လုံခြုံရေးအကြောင်းပြချက်ဖြင့် ပြည်ဝင်ခွင့်ပိတ်သည့် နိုင်ငံစာရင်းတွင် မြန်မာနိုင်ငံအပါအဝင် (၆)နိုင်ငံကို နောက်တိုးထည့်သွင်းရန် ပြင်ဆင်နေကြောင်း ဒေါ်နယ်ထရမ့်က ပြောဆိုလိုက်သည်။

ထရမ့်က ဝေါစထရိဂျာနယ်နှင့် အင်တာဗျူးတစ်ခုတွင် ထည့်သွင်းပြောဆိုခဲ့ခြင်း ဖြစ်ပြီး ၎င်းအနေဖြင့် အငြင်းပွားဖွယ် ပိတ်ဆို့မှုစာရင်းကို ထပ်မံတိုးချဲ့လိုကြောင်းပြောဆိုခဲ့ပြီး နိုင်ငံအမည်များကို ထုတ်ဖော်ပြောဆိုရန် ငြင်းဆိုခဲ့သည်။

သို့သော် နောက်ထပ် မီဒီယာတစ်ခုဖြစ်သည့် Politico ၏ ဖော်ပြချက်အရ ထပ်တိုးနိုင်ငံများမှာ နိုင်ဂျီးရီးယား၊ ဆူဒန်၊ ဘီလာရုစ်၊ မြန်မာ၊ တန်ဇီးနီးယားနှင့် ကာဂျစ်စတန်တို့ ဖြစ်နိုင်ကြောင်း ဖော်ပြထားသည်။

မူစလင်အများစုနေထိုင်သည့် နိုင်ငံများကို ဦးတည်သည့် ပြည်ဝင်ခွင့် ပိတ်ပင်သည့်နိုင်ငံများစာရင်းကို စတင်ထုတ်ပြန်ခဲ့သည့် ၃နှစ်မြောက်နှစ်ပတ်လည် ဖြစ်သည့် လာမည့် တနင်္လာနေ့တွင် နောက်ထပ် ကြေညာချက် ထပ်မံထွက်ပေါ်လာဖွယ် ရှိနေသည်။

စည်းမျဉ်းအသစ်မှာ အဆိုပါနိုင်ငံများမှ နိုင်ငံသားအားလုံးကို ပြည်ဝင်ခွင့်ပိတ်ခြင်းမျိုးထက် အစိုးရအရာရှိများနှင့် ဗီဇာအမျိုးအစားအချို့ကိုသာ ပြည်ဝင်ခွင့်ပိတ်ခြင်းမျိုး ဖြစ်နိုင်ကြောင်း သုံးသပ်ကြသည်။

အိမ်ဖြူတော် ပြောခွင့်ရပုဂ္ဂိုလ် ဟိုဂန်ဂစ်ဒ်လေးကမူ အဆိုပါ အစီအစဉ်ကို အတည်ပြုပြောကြားခြင်း မပြုသေးပေ။ ပြည်ဝင်ခွင့်ပိတ်ခြင်းမှာ နိုင်ငံကို ပိုမိုလုံခြုံအောင် ပြုလုပ်ခြင်းသာဖြစ်ကြောင်းသာ သူက ထပ်လောင်းပြောဆိုသည်။

ပြည်ဝင်ခွင့်ပိတ်သည့် နိုင်ငံများစာရင်းကို ၂၀၁၇ ခုနှစ်က စတင်ကြေညာခဲ့ခြင်းဖြစ်ပြီး မူလက အီရန်၊ လစ်ဗျား၊ ဆိုမားလီးယား၊ ဆီးရီးယားနှင့် ယီမင်တို့ ပါဝင်ခဲ့ပြီး မြောက်ကိုရီးယားနှင့် ဗင်နီဇွဲလားကို ထပ်မံထည့်သွင်းခဲ့သည်။

အမေရိကန် နိုင်ငံ့အတွင်းရေးမှူး မိုက်ပွန်ပီမှာ ယခုနှစ်အစပိုင်းတွင် ဘီလာရုစ်သို့ သွားရောက်လည်ပတ်ရန် စီစဉ်ထားသော်လည်း အီရန်နှင့် အမေရိကန်အကြား တင်းမာမှုကြောင့် အစီအစဉ် ဖျက်လိုက်သည်။

မြန်မာအပေါ် ပိတ်ဆို့မှုမှာမူ တရုတ်၏ ဩဇာလွှမ်းမိုးမှုမှ ထိန်းချုပ်ရန် လုပ်ဆောင်ခြင်းဖြစ်ကြောင်း သုံးသပ်ကြသည်။

Ref: Independent

တာချီလိတ်၊ ဇန်နဝါရီ ၂၁

ကြွက်များနှိမ်နင်းကာကွယ်ရန်အတွက် ဖယ်ခုံမြို့တွင် လွှတ်ပေးခဲ့သည့် မြွေများမှာ လူကို အန္တရာယ်မပြုနိုင်သည့် လင်းမြွေများသာ ဖြစ်ကြောင်း ရှမ်းပြည်နယ်သစ်တောဦးစီးဌာနက ဇန်နဝါရီလ ၂၁ရက် ညနေပိုင်းက ပြန်လည် ရှင်းလင်းခဲ့သည်။

လားရှိုးမြို့နယ်အတွင်းတွင် ပြီးခဲ့သည့်ရက်ပိုင်းက ဖမ်းဆီးရမိခဲ့သည့် လင်းမြွေ (၂၅၂)ကောင်ကို ကြွက်များ သောင်းကြမ်းသည့် ဖယ်ခုံမြို့နယ်အတွင်းမှ ကျေးရွာအချို့တွင် ရှမ်းပြည်နယ်အစိုးရအဖွဲ့ ကယန်းတိုင်းရင်းသားရေးရာ ဝန်ကြီး၏ အစီအမံဖြင့် ဇန်နဝါရီလ ၂၁ရက် နံနက်ပိုင်းက လွှတ်ပေးခဲ့ခြင်း ဖြစ်ကြောင်း ဖယ်ခုံမြို့နယ် သစ်တောဦးစီးဌာနမှ တာဝန်ရှိသူတစ်ဦးက မဲခေါင်သတင်းဌာနသို့ ပြောသည်။

“လွှတ်လိုက်တဲ့ မြွေအားလုံးက လူကို အန္တရာယ် မပြုနိုင်တဲ့ လင်းမြွေတွေပဲ ဖြစ်ပါတယ်။ ဘာအန္တရာယ်မှ မဖြစ်နိုင်ပါဘူး”ဟု ၎င်းက ပြောသည်။

လားရှိုးမြို့နယ်တွင် ဖမ်းဆီးရမိပြီး ပေးပို့လာသည့် လင်းမြွေ (၂၅၂)ကောင်ထဲမှ (၃)ကောင်သေဆုံးခဲ့ပြီး ကျန်သည့် (၂၄၉)ကောင်ကို အလယ်ကယန်းကျေးရွာအုပ်စု၊ ပြင်ဆောင်ကျေးရွာတွင် (၆၃)ကောင်၊ သိကျိတ်ကျေးရွာအုပ်စု၊ မောင်တိုးသစ်ကျေးရွာတွင် (၉၅)ကောင်၊ သိကျိတ်ကျေးရွာအုပ်စု သိကျိတ်ကျေးရွာတွင် (၃၁)ကောင်နှင့် သိကျိတ်ကျေးရွာအုပ်စု၊ လေဒူကောင်းကျေးရွာတွင် (၅၉) ကောင်ဖြင့် လွှတ်ပေးခဲ့ခြင်းဖြစ်ကြောင်း သိရသည်။

ဖယ်ခုံမြို့နယ်အတွင်းရှိ ကျေးရွာများတွင် ရာသီစပါးပေါ်ချိန်၏ ကြွက်များက သီးနှံများကို နှစ်စဉ်ဖျက်ဆီးလေ့ရှိပြီး လက်ရှိအချိန်တွင်မူ သီးနှံပေါ်ချိန်မဟုတ်တော့သည့်အတွက် ကြွက်သောင်းကျန်းမှု နဲသွားခြင်းဖြစ်ကြောင်း ဖယ်ခုံဒေသခံတစ်ဦးက ပြောသည်။

“အခုအချိန်က ကြွက်သောင်းကျန်းတာက နည်းနည်း နည်းသွားတာ မှန်တယ်။ ဘာလို့လဲဆိုတော့ ဖျက်ဆီးစရာ သီးနှံလဲမရှိတော့ဘူး။ နှစ်တိုင်း သီတင်းကျွတ်လောက်ဆို စပါးပေါ်တော့မယ်ဆို ကြွက်တွေက ဖျက်ဆီးပြီ။ နှစ်တိုင်း ကျွန်တော်တို့ ရွာသားတွေခံရတယ်။ ဒါကြောင့်အခုလို လွှတ်ပေးတာ ထိရောက်မှု ရှိမယ်လို့ မျှော်လင့်ပါတယ်။
လင်းမြွေဆိုတာကလည်း လူကို အန္တရာယ်ပေးဖို့ မပြောနဲ့ လူတွေက ပြန်ရိုက်သတ်စားမှာတောင် ကြောက်ရသေးတယ်”ဟု အဆိုပါ ဒေသခံက မဲခေါင်သတင်းဌာနကို ပြောသည်။

လင်းမြွေဖြန့်ဝေ လွှတ်ပေးခြင်းကို ကယန်းတိုင်းရင်းသားရေးရာဝန်ကြီး ဦးခွန်အေးမောင်နှင့် အဖွဲ့က ကိုယ်တိုင်သွားရောက်လွှတ်ပေးခဲ့ခြင်း ဖြစ်ကြောင်းသိရသည်။

MK – 001

MeKongNews

ဘက္ကဒက်၊ ဇန်နဝါရီ ၂၁

အီရတ်နိုင်ငံမြို့တော်ဘက္ကဒက်မှ အစိုးရရုံးများနှင့်သံရုံးများရုံးစိုက်ရာအစိမ်းရောင်နယ်မြေအတွင်းရှိ အမေရိကန်သံရုံးနားသို့ ဒုံးကျည် ၃ စင်းကျရောက်ပေါက်ကွဲခဲ့သည်။

အထိအခိုက်အသေအပျောက်စာရင်း မရသေးချေ။

နှစ်စင်းမှာ အမေရိကန်သံရုံးနားကျရောက်ခဲ့ပြီး တတိယမြောက်တစ်စင်းမှာ အစိမ်းရောင်နယ်မြေအတွင်း ကျရောက်ခဲ့ကြောင်း လုံခြုံရေးသတင်းရင်းမြစ်များကပြောသည်။

ဘက္ကဒက်မြို့စွန်ရှိခရိုင်တစ်ခုမှ ပစ်လွှတ်ခဲ့ခြင်းဖြစ်သည်။

ပြီးခဲ့သည့်သီတင်းပတ်များအတွင်း အလားတူတိုက်ခိုက်မှုများ ရှိခဲ့ပြီးနောက် ယခုဖြစ်ရပ်ဖြစ်ခဲ့ခြင်းဖြစ်သည်။

အင်္ဂါနေ့ညပိုင်းတွင် ဘက္ကဒက်မြောက်ပိုင်းမှ အမေရိကန်ညွှန့်ပေါင်းအခြေစိုက်စခန်း တစ်ခုနားတွင် နောက်ထပ်ဒုံးကျည်ဖြင့် ပစ်ခတ်တိုက်ခိုက်မှုများဖြစ်ခဲ့သဖြင့် အနည်းဆုံ းအီရတ်စစ်သားတစ်ယောက် ဒဏ်ရာရခဲ့သည်။

ပြီးခဲ့သည့်ရက်ပိုင်းကလည်း အမေရိကန်တပ်သားကို နေရာပေးထားသည့် အယ်ဘာလက်လေတပ်စခန်းကို Katyushaဒုံးကျည် ၈ စင်းထိမှန်ခဲ့ပြီး အီရတ်တပ်ဖွဲ့ဝင် ၄ ယောက်ဒဏ်ရာရခဲ့သည်။

ထိုတိုက်ခိုက်မှုများလည်း သူတို့လက်ချက်ဟု မည်သည့်အဖွဲ့ကမှဝန်မခံခဲ့ချေ။

Source- RT

ဥက္ကာ #MeKongNews

Photo- Kurdistan24 News

ဘေကျင်း၊ ဇန်နဝါရီ ၂၁

တရုတ်နိုင်ငံမှ နောက်ထပ်အာရှနိုင်ငံ ၃ နိုင်ငံထံလည်းရောက်ခဲ့သည့် SARSရောဂါဗိုင်းရပ်စ်နှင့် ဆင်တူသည့်ဗိုင်းရပ်သည် လူလူချင်းကူးစက်နိုင်ကြောင်း တရုတ်အစိုးရကျွမ်းကျင်သူတစ်ယောက်က အတည်ပြုခဲ့ပြီး ယခုတစ်ပတ်ထဲတွင် ကူးစက်မှုအကြောင်းဆွေးနွေးရန် အဓိကအရေးပေါ်ကော်မတီတစ်ရပ်တွေ့ဆုံဆွေးနွေးမည်ဟု ကမ္ဘာ့ကျန်းမာရေးအဖွဲ့ WHO ကကြေညာသည်။

အင်္ဂါနေ့တွင် ထိုကိုရိုနာဗိုင်းရပ်စ်ကြောင့် စတုတ္ထမြောက်လူတစ်ယောက်သေဆုံးခဲ့ကြောင်း ဝူဟန်ကျန်းမာရေးအာဏာပိုင်အဖွဲ့ကကြေညာခဲ့ပြီးနောက်
ယခုအတည်ပြုချက်ထွက်ပေါ်လာသည်။

လက်ရှိမှာ ဗိုင်းရပ်စ်ကူးစက်ခံထားရကြောင်းတွေ့ရှိထားသည့်လူ ၂၁၈ ယောက်ရှိနေသည်။

ဘေကျင်းနဲ့ရှန်ဟိုင်းတွင်လည်း ကူးစက်ခံရကြောင်းတနင်္လာနေ့တွင် အတည်ပြုခဲ့ပြီး တရုတ်နိုင်ငံတောင်ပိုင် းဂွမ်ဒေါင်းပြည်နယ်တွင်လည်း ကူးစက်ခံရမှုတစ်ဒါဇင်ကျော်ရှိနေသည်။

ဝူဟန်မြို့မှ ပင်လယ်စာလက်ကား ဈေးတစ်ဈေးသည် ဗိုင်းရပ်စ်ပြန့်ပွားသည့်ဗဟိုချက်ဟု ယုံကြည်နေပြီး ကူးစက်ပုံကို သိပ္ပံပညာရှင်များရှာဖွေခဲ့ကြသော်လည်း မြို့ကိုမရောက်ဘဲနှင့် ဗိုင်းရပ်စ်သစ်ကူးစက်နိုင်ကြောင်း SARSရောဂါပြန့်ပွားမှုပမာဏကို ထိတွေ့နိုင်ခဲ့သည့် တရုတ်အမျိုးသားကျန်းမာရေးကော်မရှင်မှ နာမည်ကြီးသိပ္ပံပညာရှင် ကျုံးနန်ရှန်းကပြောသည်။

ဂွမ်ဒေါင်းတွင် ကူးစက်ခံခဲ့ရသူနှစ်ယောက်မှာ ဝူဟန်ကိုသွားလည်ခဲ့သူ၏ မိသားစုဝင်များဖြစ်ကြောင်းလည်း ကျုံးကရှင်းပြသည်။

ကိုရိုနာဗိုင်းရပ်စ်လူနာများကို ကူညီနေသည့် ဝူဟန်ကျန်းမာရေးဝန်ထမ်း ၁၅ ယောက်လည်း အဆုတ်ယောင်ရောဂါဖြစ်နေကြောင်း ရောဂါတွေ့ရှိခဲ့ပြီး တစ်ယောကမှာ စိုးရိမ်ရတဲ့အခြေအနေတွင် ရှိနေကြောင်း ဒေသအာဏာပိုင်တစ်ယောက်ကပြောသည်။

ကမ္ဘာ့ကျန်းမာရေးအဖွဲ့ကလည်း ဗုဒ္ဓဟူးနေ့တွင် ဂျီနီဗာတွင်တွေ့ဆုံပြီး “နိုင်ငံတကာစိုးရိမ်ရသည့် အများပြည်သူဆိုင်ရာကျန်းမာရေးအရေးပေါ် အခြေအနေ” အဖြစ် ကြေညာရန်ရှိ၊ မရှိဆုံးဖြတ်ရန်ရှိနေသည်။

Source- AFP

ဥက္ကာ #MeKongNews

Photo- CGTN

တာချီလိတ်၊ ဇန်နဝါရီ ၂၀

၂၀၁၉-၂၀၂၀ ဘဏ္ဍာရေးနှစ်၊ မြစိမ်းရောင်ကျေးရွာစီမံကိန်းနှင့် ကျေးရွာဖွံ့ဖြိုးရေးစီမံကိန်း(VDP) အကောင်အထည်ဖော် ဆောင်ရွက် မည့် ကျေးရွာများသို့ ရန်ပုံငွေလွှဲအပ်ခြင်း အခမ်းအနားကို ဇန်နဝါရီ ၂၀ ရက် နံနက်ပိုင်းက တာချီလိတ်မြို့နယ်ကျေးလက်ဒေသ ဖွံ့ဖြိုးတိုးတက်ရေးဦးစီးဌာနရုံး၊ အစည်းအဝေးခန်းမ၌ ကျင်းပခဲ့သည်။

အခမ်းအနားတွင် အမျိုးသားလွှတ်တော်ကိုယ်စားလှယ် ဦးစိုင်းလုံစံခတ်က အဖွင့်အမှာစကားပြောကြားပြီး မြို့နယ် အထွေထွေအုပ်ချုပ်ရေးဦးစီးဌာနမှ ဒုတိယမြို့နယ် အုပ်ချုပ်ရေးမှူး ဦးမင်းအောင်က အမှာစကား ပြောကြားသည်။ ထို့နောက် မြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ မြို့နယ်ဦးစီးမှူး ဦးဇော်မိုးက ဋ္ဌာနစီမံကိန်းများနှင့် ပတ်သက်၍ရှင်းလင်းဆွေးနွေးပြီး အမျိုးသားလွှတ်တော်ကိုယ်စားလှယ် ဦးစိုင်းလုံစံခတ်နှင့် တာဝန်ရှိသူများက ကျေးရွာကော်မတီများထံ ရန်ပုံငွေများ လွှဲပြောင်းပေး အပ်သည်။

၂၀၁၉-၂၀၂၀ ခု ဘဏ္ဍာရေးနှစ်တွင် တာချီလိတ်မြို့နယ်အတွင်း မြစိမ်းရောင်ကျေးရွာစီမံကိန်းကို ၂ ယူနစ် နှစ်ရွာ၊ စုစုပေါင်း ၄၂ ယူနစ် ၆၁ ရွာအား ဆောင်ရွက်သွားမည်ဖြစ်ပြီး Left-Fund နည်းပညာပံ့ပိုးမှုဖြင့် ကျေးရွာပေါင်း ၁၆ ရွာအား ကျေးလက်ဒေသ ဖွံ့ဖြိုးရေးစီမံကိန်းလုပ်ငန်းများကို အကောင်အထည်ဖော် ဆောင်ရွက်သွားမည်ဖြစ်ကြောင်း သိရသည်။

အခမ်းအနားသို့ အမျိုးသားလွှတ်တော်ကိုယ်စားလှယ် ဦးစိုင်းလုံစံခတ်၊ ဒုတိယမြို့နယ် အုပ်ချုပ်ရေးမှူး ဦးမင်းအောင်၊ မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ မြို့နယ်ဦးစီးမှူး ဦးဇော်မိုးနှင့် ဌာနဆိုင်ရာများ၊ ကျေးရွာအုပ်ချုပ်ရေးမှူးများ၊ မြစိမ်းရောင်ကျေးရွာကော်မတီများ၊ မြို့နယ်ကျေးလက်ဦးစီးမှူးနှင့် ဝန်ထမ်းများတက်ရောက်ခဲ့ကြောင်း သိရသည်။

MK – 002

MeKongNews

တာချီလိတ်၊ ဇန်နဝါရီ ၂၁

မော်တော်ယာဉ် ဝမ်းဗိုက်အောက်တွင် ဝှက်၍ စိတ်ကြွရူးသွပ်ဆေးပြားများ သယ်ဆောင်လာသူ အမျိုးသား တစ်ဦးကို တာချီလိတ်မြို့၊ ဆန်ဆိုင်း(က)ရပ်ကွက်၊ ပုံလို့လမ်းနှင့် ရွှေမြေသာယာဈေးလမ်းဆုံ၌ ဇန်နဝါရီ ၂၀ ရက်ညပိုင်း ဖမ်းဆီးရမိသည်။

ဇန်နဝါရီ ၂၀ ရက်ည ၉ နာရီ ၄၀ မိနစ်ခန့်တွင် တာချီလိတ်မြို့မရဲစခန်းအပိုင်နယ်မြေအတွင်း မူးယစ်ဆေးဝါးတားဆီးနှိမ့်နင်းရေး အော်ပရေးရှင်း(၁၅၁၁)အရ ရဲတပ်ဖွဲ့ဝင်များ ပါဝင်သည့် ပူးပေါင်းအဖွဲ့ သည် သက်သေများနှင့်အတူ တာချီလိတ်မြို့၊ ဆန်ဆိုင်း(က)ရပ်ကွက်၊ ပုံလို့လမ်းနှင့် ရွှေမြေသာယာဈေးလမ်းဆုံတွင် ပိတ်ဆို့ရှာဖွေစစ်ဆေးရေးဆောင်ရွက်နေစဉ် ဆန်ဆိုင်း(က)ရပ်ကွက်၊ ပုံလို့လမ်းဘက်မှ ဗိုလ်ချုပ်လမ်းမဘက်သို့ Crown အမျိုးအစား မော်တော်ယာဉ်အား ရပ်တန့် စစ်ဆေးရာ မော်တော်ယာဉ် အတွင်း WY စာတမ်းပါ လိမ္မော်ရောင် စိတ်ကြွဆေးပြား ၄၀ဝ ပြား၊ အလေးချိန် ၃၆ ဂရမ်အား ရှာဖွေတွေရှိခဲ့သည်။

အမှုမှ မူးယစ်ဆေးဝါးများနှင့်အတူ လက်ဝယ်တွေ့ရှိသူ အားရှင် (၂၉ နှစ်)၊ ဝိန်းကျောက်ရပ်ကွက်၊ တာချီလိတ်မြို့နေသူအား တာချီလိတ်မြို့မရဲစခန်းက မယ(ပ)၁၁/၂၀၂၀၊ မူး/စိတ်ပုဒ်မ ၁၉(က)ဖြင့် အမှုဖွင့် အရေးယူဆောင်ရွက်ထားကြောင်း သိရသည်။

MeKongNews

ဘန်ကောက်၊ ဇန်နဝါရီ ၂၁

ဘန်ကောက်မြို့တွင် မီးခိုးမြူအဆင့်များပိုဆိုးနေပြီး ခရိုင် ၅၀ အနက် ၃၄ ခရိုင်တွင် ညစ်ညမ်းမှုများနေကြောင်းတွေ့ ရှိရသည်။

ဖရာနခွန်တွင် အဆိုးဆုံးဖြစ်နေသည်ဟု ဘန်ကောက်မြို့တော်အုပ်ချုပ်ရေးအဖွဲ့က တနင်္လာနေ့မနက်ပိုင်းတွင် ထုတ်ပြန်သည်။

ပြီးခဲ့သည့် ၂၄ နာရီအတွင်း လေထုထဲတွင် အန္တရာယ်ရှိသော PM 2.5အမှုန်ပါဝင်မှု တစ်ကုဗမီတာလျှင် ၅၀ မှ ၈၉ မိုက်ခရိုဂရမ်ရှိနေကြောင်း ဘန်ကောက်မြို့တော်အုပ်ချုပ်ရေးအဖွဲ့၊ အမြဲတမ်းအတွင်းဝန်ဆီလာပါဆွေ ရာဝီဆန်ဆွန်းကပြောသည်။

ဘေးကင်းကြောင်း ဘန်ကောက်အုပ်ချုပ်ရေးအဖွဲ့သတ်မှတ်ထားသော ပမာဏမှာ ၅၀ မိုက်ခရိုဂရမ်ဖြစ်သည်။

တနင်္ဂနေ့တွင် လေမတိုက်ဘဲ ယာဉ်ကြောပိတ်ဆို့မှုပိုများသဖြင့် လေထုအရည်အသွေးပိုဆိုးခဲ့ကြောင်း ညစ်ညမ်းမှုထိန်းချုပ်ရေးဌာနညွှန်ကြားရေးမှူးချုပ် ပရာလောင် ဒမ်ရောင်ထိုင်းကပြောသည်။

Source- Bangkok Post

ဥက္ကာ #MeKongNews

Photo- Bangkok Post

တာချီလိတ်၊ ဇန်နဝါရီ ၂၀

တာချီလိတ်မြို့နယ်၊ တာလေမြို့ရှိ ပါဟုတ်ကျေးရွာမှ ကျေးရွာသားတစ်ဦး၏ နေအိမ်ကို သတင်းအရ ဝင်ရောက်ရှာဖွေရာ ဘိန်းစိမ်း (၁၉၀)ဂရမ်၊ စိတ်ကြွဆေးပြား (၅၀)ပြားနှင့်အတူ ဇန်နဝါရီလ ၁၉ရက် နံနက်ပိုင်းက ဖမ်းဆီးရမိသည်။

တာလေမြို့၊ နားယောင်းကျေးရွာအုပ်စု၊ ပါဟုတ်ကျေးရွာရှိ ဦးအဖွန်း၏ နေအိမ်ကို မူးယစ်ရဲတပ်ဖွဲ့နှင့် ပူးပေါင်းအဖွဲ့က ဝင်ရောက်ရှာဖွေရာ ဦးအဖွန်းကို တွေ့ရှိရပြီး နေအိမ်အတွင်းရှိ ကြက်ခိုးစင်ပေါ်တွင် ဘိန်းစိမ်း (၁၉၀)ဂရမ်၊ စိတ်ကြွဆေးပြား (၅၀)ပြားတို့ကို သိမ်းဆည်းရမိခဲ့သည်။

မူးယစ်ဆေးဝါးများနှင့်အတူ ဖမ်းဆီးရမိသည့် ဦးအဖွန်းကို တာလေနယ်မြေရဲစခန်းတွင် မူးစိတ်ပုဒ်မ ၁၉(က)ဖြင့် အမှုဖွင့် အရေးယူထားပြီး ဆက်စပ်တရားခံများကို ဖမ်းဆီးရမိရေး ဆောင်ရွက်လျှက်ရှိကြောင်း သိရသည်။

MeKongNews