နေပြည်တော်၊ ဇန်နဝါရီ ၁၄
ဝေမိုး(နေပြည်တော်)
လူကုန်ကူးမှု တားဆီးနှိမ်နင်းရေးတွင် လိုအပ်သည့် အချက်အလက်များနှင့် အခွင့်အရေးများ ရရှိရေးအတွက် လူကုန်ကူးခံရသူများကိုယ်တိုင် ပါဝင်ကာ ဖော်ထုတ်နိုင်ရန် အရေးကြီးကြောင်း ပြန်လည်ထူထောင်ရေး ဦးစီးဌာန ညွှန်ကြားရေးမှူးချုပ်က ဆိုသည်။
ဇန်နဝါရီလ(၁၄)ရက် နေပြည်တော် မင်္ဂလာသီရိဟိုတယ်၌ ပြုလုပ်ခဲ့သည့် “ဝန်ဆောင်မှု ပေးနေသူများအတွက် လူကုန်ကူးမှုနှင့်သက်ဆိုင်သော ထိုင်းနိုင်ငံ၏ တရားစွဲဆိုရေးနှင့် ဖြစ်ရပ်စီမံခန့်ခွဲခြင်း လုပ်ငန်းစဉ်ဆိုင်ရာ စွမ်းရည်မြှင့်သင်တန်း” ဖွင့်ပွဲတွင် သင်တန်းသား(၂၆)ယောက်အား နှစ်ရက်တာသင်ကြားမည့် အခမ်းအနား၌ ပြန်လည်ထူထောင်ရေးဦးစီးဌာန ညွှန်ကြားရေးမှုးချုပ်ဖြစ်သူ ဦးဝင်းနိုင်ထွန်းမှ ပြောကြားခဲ့ခြင်းဖြစ်သည်။
“လူကုန်ကူးမှုတွေမှာ လူကုန်ကူးခံရသူဟာ အဓိကသက်သေဖြစ်ပါတယ်။ ဒါကြောင့် ကာယကံရှင်ကိုယ်တိုင် တရားစီရင်ရေး လုပ်ငန်းစဉ်တွေမှာ လိုလိုလားလား ပါဝင်လာဖို့က အရေးကြီးပါတယ်။ ဒီလိုပါဝင်လာခြင်းအားဖြင့် အနီးကပ်စောင့်ရှောက်နေကြတဲ့ လူမှုဝန်ထမ်းသမားများအနေနဲ့ တရားစီရင်ရေးလုပ်ငန်းစဉ်၊ ဒီလုပ်ငန်းစဉ်ထဲမှာ ရပိုင်ခွင့်နဲ့အခွင့်အရေး၊ ရသင့်ရထိုက်တဲ့ လုပ်ခလစာ၊လျော်ကြေးစတဲ့ သတင်းအချက်တွေကို လူကုန်ကူး ခံရသူများကို ပံ့ပိုးပေးနိူင်မှာဖြစ်ပါတယ်”ဟု ဦးဝင်းနိုင်ထွန်းကပြောသည်။
မြန်မာနိူင်ငံတွင် ဖြစ်ပွားခဲ့သည့် လူကုန်ကူးမှုအမျိုးအစားများမှာ အဓ္ဓမထိမ်းမြားလက်ထပ်ခြင်း ၊ပြည်တန်ဆာပြုခြင်း ကလေးသူငယ်လူကုန်ကူးခြင်းနှင့် ကြွေးမြီဖြင့် နှောင်ဖွဲ့ခိုင်းစေခြင်းဆိုသည့် ပုံစံ(၅)မျိုးရှိသည်ကို လေ့လာတွေ့ရှိထားကြောင်း ဒုတိယသမ္မတဖြစ်သူ ဦးဟင်နရီဗန်ထီးယူမှ လူကုန်ကူးမှု တိုက်ဖျက်နေ့တွင် ပြောကြားခဲ့သလို မြန်မာနိူင်ငံတွင် ၂၀၁၈ခုနှစ်အတွင်း ကိန်းဂဏန်းများအရ အဓ္ဓမထိမ်းမြားလက်ထပ်မှုသည် ၇၅ဒသမ၂၄ ရာခိုင်နှုန်းရှိကြောင်း ၎င်းကဆိုခဲ့သည်။
ယခုသင်တန်းသည် ထိုင်းနိူင်ငံ၏ တရားစီရင်ရေး လုပ်ငန်းစဉ်နှင့် ဖြစ်ရပ်စီမံခန့်ခွဲခြင်းများကို ယင်းနိူင်ငံအတွင်း တရားစီရင်ရေး လုပ်ငန်းစဉ်များတွင် လူကုန်ကူးခံရသူများအား လိုက်ပါကူညီ ဆောင်ရွက်ပေးနေသည့် IJM (Thailand)မှ ကျွမ်းကျင်သူများမှ ထိုင်းနိုင်ငံ၏ လူကုန်ကူးမှုနှင့်သက်ဆိုင်သော တရားစွဲဆိုရေးနှင့် ဖြစ်ရပ်စီမံခန့်ခွဲခြင်း လုပ်ငန်းစဉ်များအား မျှဝေဆွေးနွေးသွားမည်ဖြစ်ကြောင်း ညွှန်ကြားရေးမှူးချုပ်က ဆိုခဲ့သည်။
“မြန်မာနိူင်ငံနဲ့ ထိုင်းနိုင်ငံက လူကုန်ကူးမှုတိုက်ဖျက်ရေးဆိုင်ရာ နားလည်မှုစာချွန်လွှာကို ၂၀ဝ၉ခုနှစ်မှာ လက်မှတ်ရေးထိုးခဲ့ပါတယ်။ ဒီနားလည်မှု စာချွန်လွှာကို လက်ရှိအခြေအနေနဲ့ ကိုက်ညီမှုရှိအောင် ပြန်လည်ပြင်ဆင်ခဲ့ပါတယ်။ မကြာမီမှာလည်း နှစ်နိူင်ငံအတည်ပြု လက်မှတ်ရေးထိုး သွားမှာဖြစ်ပါတယ်။ ဒီစာချွန်လွှာမှာတော့ ကာကွယ်တားဆီးခြင်း(Prevention)၊ ကြိုတင်ကာကွယ်ခြင်း(Protection)နဲ့ စွဲချက်တင်ခြင်း(Prosecution) ကဏ္ဍတွေပါဝင်ပါတယ်”ဟု ညွှန်ကြားရေးမှုးချုပ်ဖြစ်သူ ဦးဝင်းနိုင်ထွန်းက ပြောသည်။
ဆဌမအကြိမ်မြောက် လူကုန်ကူးမှုတိုက်ဖျက်ရေးနေ့ ပြီးဆုံးသည့် အချိန်မှစတင်၍ ယနေ့အချိန်ထိ လူကုန်ကူးမှု(၂၁၀)မှု၊ တရားစွဲတင်ခဲ့မှု(၁၅၆)မှုနှင့် လူကုန်ကူးသူ တရားခံအမျိုးသား (၁၅၂)ဦးအပြင် အမျိုးသမီး(၃၃၄)ဦးအား ထိရောက်သည့်ပြစ်ဒဏ်ရရှိရေး ဆောင်ရွက်ခဲ့ကြောင်း ဒုတိယသမ္မတဖြစ်သူ ဦးဟင်နရီဗန်ထီးယူမှ စက်တင်ဘာ(၁၃)ရက်နေ့ လူကုန်ကူးမှုတိုက်ဖျက်ရေးနေ့ အခမ်းအနားတွင် ပြောကြားခဲ့သည်။
MeKongNews
Mekong News 