တာချီလိတ်၊ ဒီဇင်ဘာ ၂၉

ရှေ့မှ ယာဉ်ကိုကျော်တက်လာသည့် မော်တော်ကားနှင့် မျက်နှာချင်းဆိုင်မှလာသည့် ဆိုင်ကယ်တို့ ဒီဇင်ဘာလ ၂၈ရက် နံနက်ပိုင်းက တာချီလိတ်-ဝမ်ပုံသွား ကားလမ်းမပေါ်တွင် တိုက်မိပြီး ဆိုင်ကယ်မောင်းသူ သေဆုံးသွားသည်။

မိုင်းဖုန်း(ခ) ကျေးရွာအုပ်စု၊ ဆွတ်ဆိုင်ကျေးရွာအနီး တာချီလိတ်-ဝမ်ပုံသွား ကားလမ်းမပေါ်တွင် ယာဉ်မောင်း အိုက်ကျောက်မောင်းနှင်လာသည့် မော်တော်ယာဉ်သည် ၎င်းအရှေ့ရှိ မော်တော်ယာဉ်ကို ကျော်တက်ရာမှ တဖက်လမ်းမှလာသည့် မော်တော်ဆိုင်ကယ်ကို ဝင်ရောက်တိုက်မိခြင်း ဖြစ်သည်။

ယာဉ်တိုက်မှုကြောင့် မော်တော်ဆိုင်ကယ်မောင်းနှင်သူ စိုင်းကဘီးမှာ အခင်းဖြစ်ရာနေရာတွင် သေဆုံးသွားပြီး မော်တော်ဆိုင်ကယ်နောက်မှ လိုက်ပါလာသူ နန်းဝုန်းနှင့် မော်တော်ယာဉ်မောင်း အိုက်ကျောက်တို့မှာ ဒဏ်ရာ(မစိုးရိမ်ရ) ရရှိခဲ့ကြောင်း သိရသည်။

အဆိုပါယာဉ်တိုက်မှု ဖြစ်စဉ်တွင် ယာဉ်ကို မဆင်မခြင်မောင်းနှင်ကာ လူသေဆုံး၊ ဒဏ်ရာရစေသည့် မော်တော်ယာဉ်မောင်း အိုက်ကျောက်ကို အမှုဖွင့် အရေးယူထားကြောင်း သိရသည်။

MeKongNews

ဘန်ကောက်၊ ဒီဇင်ဘာ ၂၈

ထိုင်းနိုင်ငံတောင်ပိုင်းချမ်ဖွန်ခရိုင်က လူပြည့်ကြပ်နေသည့် လန်ဆွန်ထောင်၏လုံခြုံရေးကင်မရာမှတ်တမ်းများကို ထိုးဖောက်ဝင်ရောက်ရယူ(Hack)ပြီး ယူတျူ့တွင် ပြန်တင်ခဲ့သည့်ဖြစ်ရပ်ဖြစ်ပွားခဲ့သည်။

ပြုပြင်ရေးဌာနက ထိုဖြစ်ရပ်အကြောင်း သူ့ကိုအသိပေးခဲ့သည်ဟု တရားရေးဝန်ကြီးဆွမ်ဆက် သက်ဆူသင်ကပြောသည်။

မှတ်တမ်းများမည်ကဲ့သို့ ‌ပေါက်ကြားကြောင်း အာဏာပိုင်များမသိသေးပေ။
သြစတြေးလျနှင့်ရုရှားအပါအဝင် အခြားနိုင်ငံများတွင်လည်း အလားတူဖြစ်ရပ်များဖြစ်ခဲ့ဖူးသည်ဟု ဆွမ်ဆက်ကပြောသည်။

ရဲတပ်ဖွဲ့ထံတိုင်စာပို့ထားရန် ဌာနကိုညွှန်ကြားထားပြီး မည်သို့ဖြစ်ခဲ့ကြောင်းနှင့် လက်သည်ကိုဖော်ထုတ်ရန် အထူးစုံစမ်းရေးဌာနကို တာဝန်ချထားသည်ဟုလည်းပြောသည်။

ပေါက်ကြားမှုကြောင့် အကျဉ်းသားများ၏အခွင့်အရေးချိုးဖောက်မှုများဖြစ်လာနိုင်မည်ကို စိုးရိမ်နေသည်။

ထိုင်းအကျဉ်းထောင်များတွင် လုံခြုံရေးကင်မရာစနစ်များကို ပုဂ္ဂလိကကန်ထရိုက်တာများက ဝယ်ယူရေးလုပ်ငန်းစဉ်များဖြင့် တပ်ဆင်ကြကြောင်း ထိုင်းတရားရေးဝန်ကြီးဌာန သတင်းရင်းမြစ်တစ်ဦးက ဘန်ကောက်ပို့စ်သတင်းစာကိုပြောသည်။

အခွင့်ရသူများချိန်နှင့် တစ်ပြေးညီစောင့်ကြည့်နိုင်ရန် စနစ်များကို အင်တာနက်ချိတ်ဆက်ထားသည်။

လုံခြုံရေးကင်မရာမှပုံရိပ်များကို စမတ်ဖုန်းများမှတစ်ဆင့် ထောင်မှူးများနှင့်အရာရှိကြီးများကြည့်ရှုနိုင်သည်။

ဝင်ခွင့်နံပါတ်များပြင်ပပေါက်ကြားသွားခြင်းဖြစ်နိုင်ပြီး ထိုသူများက စနစ်ထဲဝင်ပြီးနောက် မှတ်တမ်းများကို ယူတျူ့တွင်တင်ခဲ့ပြီးဖြစ်နိုင်သည်ဟု တရားရေးဝန်ကြီးဌာနကပြောသည်။

လူပြည့်ကြပ်နေသည့် အခြေအနေများကိုဖော်ပြနေသည့် မှတ်တမ်းများပေါက်ကြားသည့် ထိုဖြစ်ရပ်ကြောင့် ထိုင်းအကျဉ်းထောင်များ၏ ဂုဏ်ကျက်သရေထိခိုက်နိုင်ကြောင်းလည်း ပြောသည်။

ထိုင်းဘန်ကောက်ထောင် လုံခြုံရေးကင်မရာတိုက်ရိုက်ထုတ်လွှင့်မှုဟု အမည်ရေးထိုးထားသော ထိုဗီဒီယိုကို အင်္ဂါနေ့က ယူတျူ့တွင်တင်ခဲ့သည်။

လန်ဆွန်ထောင်မှ အကျဉ်းသားများ၏ နေ့စဉ်နေထိုင်မှုများ ပြသနေသောထိုဗီဒီယိုတွင် ထောင်တွင်းနေရာများမှအချိန်နှင့် တပြေးညီပုံရိပ်များပါဝင်သည်။

သို့သော်လည်း တိုက်ရိုက်ထုတ်လွှင့်မှုသည် အချိန် ၂ နာရီနောက်ကျနေသည်ဟု အာဏာပိုင်များက ထောက်ပြသည်။

တနင်္လာနေ့ညက ထောင်လုံခြုံရေးကင်မရာစနစ်ကို ထိုးဖောက်ဝင်ရောက်ခံခဲ့ရနိုင်သည်ဟု သတင်းရင်းမြစ်တစ်ဦးကပြောသည်။

ထိုဗီဒီယိုတင်ခဲ့သော ယူကျူ့အကောင့် Big Brother’s Gazeသည် ရုရှား၊ သြစတြေးလျနှင့် အမေရိကန်တို့မှထောင်များ၏ ပေါက်ကြားထားသော လုံခြုံရေးကင်မရာပုံရိပ်များကိုလည်း တင်ခဲ့သည်။

Source-Bangkok Post

ဥက္ကာ #MekongNews

Photo-Bangkok Post

ဘန်ကောက်၊ ဒီဇင်ဘာ ၂၈

ရဲအရာရှိ ၃ ဦးက ဘန်ကောက်မြို့လယ်တွင် ပြင်သစ်နိုင်ငံသားတစ်ဦးကိုဖမ်းဆီးကာ ခြိမ်းခြောက်ငွေတောင်းသည်ဟု ဆိုသည့်ဖြစ်ရပ်အတွက် စုံစမ်းစစ်ဆေးနေကြောင်း သောကြာနေ့တွင် ထိုင်းရဲတပ်ဖွဲ့ကပြောသည်။

သူ့ကို မူးယစ်ဆေးမှုများဖြင့်စွပ်စွဲသည်ကို ဖယ်ရှားရန် ထိုင်းရဲအရာရှိ ၃ ဦးက သူ့ထံမှ အမေရိကန်ဒေါ်လာ ၈၀ဝ၀ (ဘတ် ၂၄၅၀ဝ၀) တောင်းခံခဲ့သည်ဟု ပြင်သစ်နိုင်ငံသားစီးပွားရေးလုပ်ငန်းရှင် ဂျင်း ဆီဘက်ရှန်က လူမှုကွန်ရက်တွင်ရေးသားခဲ့ပြီးနောက် သန်လောရဲစခန်း၏ဆိုးရွားသော မူးယစ်ဆေးစမ်းသပ်မှုမူဝါဒအကြောင်း မီးမောင်းထိုးပြနိုင်ခဲ့သည်။

ရဲစခန်းမှူးက စွပ်စွဲချက်များကို တနင်္လာနေ့တွင် ငြင်းခဲ့သော်လည်း သောကြာနေ့တွင် ရဲအရာရှိ ၃ ဦးကို ယာယီတာဝန်ရပ်စဲထားပြီး စုံစမ်းစစ်ဆေးနေသည်ဟု အတည်ပြုသည်။

အောက်တိုဘာ ၂၈ ရက်က ဆွိုင်ဆူခမ်ဗစ်တွင်လမ်းလျှောက်နေစဉ် ရဲအရာရှိများကို သူ့ကိုရပ်ခိုင်းပြီး မူးယစ်ဆေးဝါးရှာဖွေခဲ့သည်ဟု ဆီဘတ်ရှန်ကပြောသည်ဟု ဘန်ကောက်မြို့တော်ရဲတပ်ဖွဲ့ရဲမှုးချုပ် ကပြောသည်။

မူးယစ်ဆေးမတွေ့ခဲ့သော်လည်း သူ့ကိုဆေးရုံတွင် ရဲများက ဆီးစစ်ခဲ့သည်ဟုလည်းပြောသည်။

ဆေးရလဒ်အရ ဆေးခြောက်သုံးစွဲသည်ဟုတွေ့ရှိခဲ့ပြီးနောက် သူ့မိတ်ဆွေဆီ ဆီဘတ်ရှန်ကို ဆက်သွယ်ခွင့်ပြုခဲ့ပြီး စွဲချက်လွတ်ကင်းရန် ဒေါ်လာ ၈၀ဝ၀ ပေးခိုင်းခဲ့သည်။

ဆီဘတ်ရှန်ကသဘောတူခဲ့ပြီးနောက် နောက်ပိုင်းတွင် ထိန်းသိမ်းထားရာမှလွှတ်ပေးခဲ့သည်။

ထို့နောက် ဆီဘတ်ရှန်က ပြင်သစ်သံရုံးကိုဆက်သွယ်တိုင်ကြားခဲ့ပြီး ထိုင်းအမျိုးသား အဂတိလိုက်စားမှုတိုက်ဖျက်ရေး ကော်မရှင်ထံလည်းတိုင်ကြားခဲ့သည်။

ပြစ်ဒဏ်ထင်ရှားပါက ရဲများကို ရဲစည်းကမ်းအရအပြစ်ပေးသွားမည်ဟု ထိုင်းရဲတပ်ဖွဲ့ပြောခွင့်ရသူက ကြာသပတေးနေ့တွင်ပြောသည်။

သန်လောရဲစခန်းမှအရာရှိများက နိုင်ငံခြားသားများကိုပစ်မှတ်ထားပြီး မူးယစ်ဆေးစမ်းသပ်မှုများ လုပ်နေသည်ဟုလည်း တိုင်ကြားမှုများရှိနေသည်။

SOURCE- KHAOSOD

ဥက္ကာ #MEKONGNEWS

PHOTO-KHAOSOD

တာချီလိတ်၊ ဒီဇင်ဘာ ၂၈

အာခါတိုင်းရင်းသား စုပေါင်းနှစ်သစ်ကူးပွဲတော်ကို ကျိုင်းတုံမြို့တွင်သာ ပြုလုပ်လေ့ရှိသော်လည်း တာချီလိတ်ရှိ အာခါတိုင်းရင်းသားအားလုံး ပါဝင်ဆင်နွှဲနိုင်စေရန်အတွက် တာချီလိတ်မြို့တွင် ပထမဆုံးအကြိမ် ကျင်းပပြုလုပ်ရခြင်း ဖြစ်ကြောင်း တာချီလိတ်မြို့နယ် အာခါတိုင်းရင်းသား စုပေါင်းနှစ်သစ်ကူးပွဲ ဖြစ်မြောက်ရေး ကော်မတီမှ သိရသည်။

(၄၅)ကြိမ်မြောက် အာခါတိုင်းရင်းသား စုပေါင်းနှစ်သစ်ကူးပွဲတော်ကို တာချီလိတ်မြို့နယ်တွင် ပထမဆုံးအကြိမ် ကျင်းပခြင်းဖြစ်ပြီး တာချီလိတ်မြို့နယ်၊ မိုင်းကိုးကျေးရွာအုပ်စု၊ ကော်မယ်လိတ်ကျေးရွာတွင် ဒီဇင်ဘာလ ၂၈ရက် နံနက်ပိုင်းက ပြုလုပ်ခဲ့သည်။

“ခါတိုင်းက ၄၄ကြိမ်မြောက်မှာ ကျိုင်းတုံမှာ ကျင်းပတဲ့အခါကျတော့ တာချီလိတ်အနေနဲ့ ကိုယ်စားလှယ်တွေလောက်သာ တက်ရောက်နိုင်တယ်။ ဒီနေ့မှာကျတော့ လူမြောက်များစွာနဲ့ လာပြီးတော့ ပါဝင်နိုင်တယ်” ဟု တာချီလိတ်မြို့နယ် အာခါတိုင်းရင်းသား စုပေါင်းနှစ်သစ်ကူးပွဲ ဖြစ်မြောက်ရေး ကော်မတီ အတွင်းရေးမှူး ဦးယာကုပ်က ပြောသည်။

တာချီလိတ်မြို့တွင် ပထမဆုံးအကြိမ် ကျင်းပသည့် အာခါတိုင်းရင်းသား စုပေါင်းနှစ်သစ်ကူးပွဲတော်သို့ အာခါတိုင်းရင်သားခေါင်းဆောင်များ စုံညီစွာ တက်ရောက်ကြောင်း ဦးယာကုပ်က ပြောသည်။

“လာမယ်နှစ်တွေမှာလည်း ကော်မတီသေသေချာချာဖွဲ့စည်းပြီးမှ လုပ်ဆောင်မှာ ဖြစ်တဲ့အတွက် အားလုံးပါဝင်ကြဖို့ ပြောချင်ပါတယ်။ ဘာသာမခွဲခြားပဲ အားလုံးပါဝင်စေချင်ပါတယ်”ဟု ၎င်းက ပြောသည်။

ပထမဆုံးအကြိမ် အာခါတိုင်းရင်းသား စုပေါင်းနှစ်သစ်ကူးပွဲကို ၁၉၇၅ ခုနှစ်က ကျိုင်းတုံမြို့တွင် စတင်ကျင်းပခဲ့ခြင်းဖြစ်ပြီး ယင်းမတိုင်မီက အာခါနှစ်သစ်ကူးပွဲကို ကျေးရွာများတွင်သာ သီးခြားစီကျင်းပလေ့ရှိကြောင်း သိရသည်။

MK – 001

MeKongNews

တာချီလိတ်၊ ဒီဇင်ဘာ ၂၇

ဘူးသီးတောင်မြို့နယ် NLD ပါတီ ဥက္ကဌ အပါအဝင် အကြမ်းဖက်မှုဖြစ်စဉ်များကြောင်း သေဆုံးခဲ့ရသူများအတွက် အကြမ်းဖက် လုပ်ရပ်များကို ပြင်းထန်စွာ ရှုတ်ချကြောင်း ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက ဒီဇင်ဘာလ ၂၇ရက် ညပိုင်းက သတင်းထုတ်ပြန်သည်။

ဘူးသီးတောင်မြို့နယ် NLD ဥက္ကဌ အပါအဝင် ကျောက်မဲမြို့နယ် ပြည်ခိုင်ဖြိုးပါတီ အလုပ်အမှုဆောင်အဖွဲ့ဝင် ဦးစိုင်းအောင်ဌေးနှင့် အခြားသူများအပေါ် အကြမ်းဖမ်းသတ်ဖြတ်မှုများကို ကြားသိရပြီး ပြည်ခိုင်ဖြိုးပါတီ အနေဖြင့် နိုင်ငံရေးအရမတူကွဲပြားမှုများကို ဆွေးနွေးညှိနှိုင်မှုဖြင့်သာ ပြေလည်မည်ဟု ယုံကြည်ထားကြောင်း ထုတ်ပြန်ချက်တွင် ထည့်သွင်းဖော်ပြထားသည်။

အကြမ်းဖက်မှု ဖြစ်စဉ်များကြောင်း အသက်ဆုံးရှုံးခဲ့ရသူများနှင့် ကိုယ်စိတ်နှစ်ပါး ဒဏ်ရာရခဲ့သည့် မိသားစုဝင်များအတွက် ပြည်ခိုင်ဖြိုးပါတီအနေဖြင့် ထပ်တူဝမ်းနည်းရပြီး အဆိုပါလုပ်ရပ်များကို ပြင်းထန်စွာ ရှုတ်ချကြောင်း ထုတ်ပြန်ချက်တွင် ထည့်သွင်းဖော်ြပထားသည်။

နိုင်ငံတဝှမ်းဖြစ်ပေါ်နေသည့် နိုင်ငံသားများ လုံခြုံရေးဆိုးရွားစွာ ချိုးဖောက်ခံနေရမှုရပ်တန့်နိုင်ရန် အစိုးရအနေဖြင့် ဆောလျင်စွာ စီမံဆောင်ရွက်ပေးပါရန်လည်း ပြည်ခိုင်ဖြိုးပါတီက တိုက်တွန်းထားသည်။

MK – 001

MeKongNews

ဘန်ကောက်၊ ဒီဇင်ဘာ ၂၅

ဆာမွတ်ဆာခွန်ခရိုင်ရှိ ဘုန်းတော်ကြီးတစ်ပါးကို ဗလက်ကာယလုပ်မှုနှင့် အသက်မပြည့်သေးသူများကိုစော်ကားမှုအပါအဝင် အမှု ၅ မှုဖြင့် ဖမ်းဆီးခဲ့သည်။

ကိုရင် ၃ ပါးက လိင်ပိုင်းစော်ကားခံခဲ့ရသည်ဟုပြောခဲ့ပြီးနောက် ဖမ်းဆီးခဲ့ဖြင်းဖြစ်သည်။

လူကုန်ကူးမှုတိုက်ဖျက်ရေးဌာနတပ်မှူးကြီး ရဲဗိုလ်ချုပ်ဝိုရာဝတ် ဝတ်နက်ခွန်ဘန်ချာက ဆာမွန်ဆာခွန်ရဲများနှင့်အတူ ဘုန်းတော်ကြီးကို ဖမ်းဆီးခဲ့သည်။

စုံစမ်းစစ်ဆေးမှုများအရ အသက် ၄ နှစ်နှင့် ၁၅ နှစ်ကြားရှိ ကိုရင် ၁၉ ပါးနှင့် အငယ်ဆုံးအသက် ၈ နှစ်ရှိဘုန်းကြီးကျောင်းသား ၁၀ ယောက်ကို လိင်ပိုင်းစော်ကားခဲ့သည်ဟုတွေ့ရှိခဲ့သည်ဆိုပြီး ရဲများကပြောသည်။

ဆက်ဆံခဲ့သည်မျာကို ဓာတ်ပုံများစုဆောင်းထားသည်ဟုလည်းသိရသည်။

ထိုဘုန်းတော်ကြီးသည် အမျိုးသားသက်ငယ်ပြည့်တန်ဆာပြုရာတွင်ပါဝင်နေသည်ဟုလည်း ရဲများကစွပ်စွဲထားသည်။

သူကျူးလွန်ခဲ့သည်ဟုဆိုသော ပြစ်မှုများကိုကာကွယ်ရန် ကျောင်းတွင် ဆဲလ်ဖုန်းအသုံးပြုခွင့် ထိန်းချုပ်ထားပုံရသည်ဟုလည်း ရဲများက ပြောသည်။

သို့သော်လည်း ပြုကျင့်ခံရသူတစ်ယောက်က ဓာတ်ပုံရိုက်ပြီး မိဘများထံပို့နိုင်ခဲ့သောကြောင့် ဘုန်းတော်ကြီး၏ တရားမဝင်အပြုအမူများဟု ဆိုသောဖြစ်ရပ် ပေါ်ပေါက်လာခြင်းဖြစ်သည်ဟုလည်း ရဲတပ်ဖွဲ့ကပြောသည်။

ကုလားထိုင်တွင်ချည်ထားပြီး အခြားတစ်ဦးနှင့်လိင်ဆက်ဆံခိုင်းခဲ့ခြင်းကို ဘုန်းတော်ကြီးက ကြည့်နေသည့်အပြင် အုပ်စုဖွဲ့လိင်ဆက်ဆံရန် အခြားလူများကိုပါ ဘုန်းတော်ကြီးကဖိတ်ခေါ်ခဲ့သည်ဟုဆိုကာ ကိုရင်တစ်ပါးက ရဲတပ်ဖွဲ့ထံတိုင်ကြားခဲ့သည်ဟုသိရသည်။

စွဲချက်များအားလုံးကို ဘုန်းတော်ကြီးက ငြင်းဆိုထားသည်။

Source-The Nation

MeKongNews #ဥက္ကာ

Photo- The Nation

ဘန်ကောက်၊ ဒီဇင်ဘာ ၂၄

တွစ်တာတွင် ထိုင်းကြက်မွေးမြူရေးလုပ်ငန်းတစ်ခုကို အသရေဖျက်သည်ဟုဆိုပြီး ထိုင်းရုပ်သံသတင်းထောက်တစ်ဦးကို ထောင်နှစ်နှစ်ကျခံရန်ဆုံးဖြတ်ခဲ့သည်ဟု သူ့ရှေ့နေကပြောသည်။

ထိုအချိန်က Voice TVတွင်အလုပ်လုပ်နေသည့် ဆူချာနီ ကလွိုင်တာက သမ်မာဆက်မွေးမြူရေးလုပ်ငန်းရှိ လုပ်ငန်းခွင်အခြေအနေများအကြောင်းဥပဒေအရအငြင်းပွားမှုကို တွစ်တာတွင်တင်ခဲ့သည်ဟုဆိုကာ ထောင်ဒဏ်သတ်မှတ်ခဲ့ခြင်းဟု ရှေ့နေဝိုရာပွန်း အူထိုင်ရန်ဆီးကပြောသည်။

“ကျွန်မတုန်လှုပ်မိပါတယ်။ အပြစ်ဒဏ်အဲ့လောက်ပြင်းထန်မယ်လို့ မထင်မိဘူးလေ”ဟု ထောင်ဒဏ်ကျခံရပြီးနောက် ရိုက်တာသတင်းအေဂျင်စီကို ဆူချာနီကပြောသည်။

သူ့ ၈ လအရွယ်သားလေးအတွက် စိတ်ပူကြောင်းလည်းပြောသည်။

သမ်မာကဆက်မှအခြေအနေများကို ၂၀၁၆ ခုနှစ်က ထိုင်းအမျိုးသားလူ့အခွင့်အရေးကော်မရှင်ထံ မြန်မာရွှေ့ပြောင်းလုပ်သားတစ်ဖွဲ့က တိုင်ကြားခဲ့ကြောင်း သူ၏တွစ်တာစာသား(တွိ)တွင် ပါဝင်သည်။

အစောပိုင်းတွင် မွေးမြူရေးခြံက လုပ်သားများကို အသရေဖျက်မှုဖြင့်တရားစွဲခြင်းကိုပယ်ချခဲ့ပြီးနောက် လုပ်သားများလျော်ကြေးရသင့်သည်ဟု ထိုင်းတရားရုံးက ယခုနှစ်တွင်ဆုံးဖြတ်ခဲ့သည်။

အစောပိုင်းကတည်းက စွပ်စွဲချက်များကိုငြင်းဆိုခဲ့သော သမ်မာကဆက်က
သတင်းစာဆရာနှင့် တက်ကြွလှုပ်ရှားသူအယောက် ၂၀ ကိုလည်း တရားစွဲထားသည်။

အယူခံဝင်သွားမည်ဖြစ်ပြီး လက်ရှိတွင်တော့ အာမခံရထားသည်ဟု ဆူချာနီကပြောသည်။

Source-Reuters

ဥက္ကာ #MeKongNews

Photo- NBT News Youtube