တာချီလိတ်၊ ဖေဖော်ဝါရီ ၁၀

တာချီလိတ်မြို့၊ မိုင်းကိုးကျေးရွာအုပ်စု၊ ရန်ရှင်း(၄)ရွာ၌ ကြက်ဥ ခိုးစားသည်ဟုဆိုပြီး စကားများ ရန်ဖြစ်ရာမှ ဓါးဖြင့်ခုတ်သဖြင့် အမျိုးသားတစ်ဦး ဖေဖော်ဝါရီလ ၁၀ရက် နံနက်ပိုင်းက သေဆုံးသွားကြောင်း သိရသည်။

ဖေဖော်ဝါရီ ၁၀ ရက်နံနက် ၇ နာရီခွဲခန့် တာချီလိတ်မြို့၊ မိုင်း ကိုးကျေးရွာအုပ်စု၊ ရန်ရှင်း(၄)ရွာတွင် လီရှီး(၄၀ နှစ်)နှင့် မောရှေ(၆၀ နှစ်)တို့ နှစ်ဦးသည် နေအိမ်တဲ့၏ မီးဖိုချောင်အရှေ့ ကွပ်ပြစ်တွင် အတူထမင်းစားနေစဉ် လီရှီးမှ မောရှေအား ကြက်ဥ ခိုးစား သည်ဟု စွပ်စွဲရာမှ စကားများရန်ဖြစ်ကြပြီး မောရှေမှ တောင်ယာ ခုတ်ရန် ယူဆောင်လာသော ဓါးဖြင့် ခုတ်ရာ လီရှီးတွင် လည်ဂုတ် ပြတ်ရှဒဏ်ရာ တစ်ချက်ဖြင့် သေဆုံးသွားခဲ့ကြောင်း သိရသည်။

အမှုမှ ဓာဖြင့်ခုတ်သူ မောရှေ(၆၀ နှစ်)အား တာချီလိတ်မြို့မ ရဲစခန်းမှ အမှုဖွင့် အရေးယူဆောင်ရွက်ထားကြောင်း သိရသည်။

MeKongNews

ချိုင်ရာဖုန်၊ ဖေဖော်ဝါရီ ၁၀

ကိုရတ်မြို့ရှိ ‌ဈေးဝယ်စင်တာတစ်ခုတွင် လူ ၂၉ ယောက်ကို သေနတ်သမားတစ်ယောက်က ပစ်ခတ်ခဲ့ပြီးနောက် ဒေသတွင်း ‌ဈေးဝယ်စင်တာနောက်တစ်ခုတွင် ပစ်ခတ်မည်ဟု ခြိမ်းခြောက်သူ တစ်ယောက်ကို ထိုင်းအရှေ့မြောက်ပိုင်းရှိ ရဲတပ်ဖွဲ့ဝင်များက ဖမ်းဆီးခဲ့သည်။

လူမှုကွန်ရက်တွင်တင်ခဲ့ပြီးနောက် ချိုင်ရာဖုန်ခရိုင်နေ ပီရာပတ် ချူဆန် ၂၈ နှစ်ကို ဖမ်းဆီးပြီး ဆိုက်ဘာမှုခင်းကျူးလွန်မှုဖြင့် စွဲချက်တင်ခဲ့သည်။

ထိတ်လန့်နေသည့် ထိုင်းနိုင်ငံသားအင်တာနက်အသုံးပြုသူများ ထံမှ တိုင်ကြားချက်များ လက်ခံရခဲ့ပြီးနောက် ခြေရာခံဖမ်းဆီးခဲ့ခြင်းဖြစ်ကြောင်း ထိုင်းရဲအရာရှိများက ‌ပြောသည်။

“ကိုရတ်က တာမင်နယ် ၂၁ တော့ပြီးသွားပြီ။ ငါ့အလှည့်ပဲ။ ရော်ဘင်ဆန်ချိုင်ရာဖုန်” လို့ ပီရာပတ်က ပြောင်းတိုသေနတ် ၂ လက်ကိုပြသထားသည့် ပုံတွင်ရေးသားခဲ့သည်။

ချစ်သူနှင့် စကားများပြီးနောက် အရက်မူးနေသောကြောင့် ထိုစာများရေးသားခဲ့ခြင်းဖြစ်ကြောင်း ပီရာပတ်ကဝန်ခံခဲ့သည်ဆိုပြီး ရဲများကပြောသည်။

ကွန်ပြူတာပြစ်မှု အက်ဥပဒေကို ချိုးဖောက်ကြောင်း စွဲချက်တင်ထားကြောင်းလည်း ပြောသည်။

Source- Khaosod

ဥက္ကာ #MeKongNews

Photo- Khaosod

တာချီလိတ်၊ ဖေဖော်ဝါရီ ၁၀

အွန်လိုင်းလောင်းကစားဂိမ်းကဲ့သို့ အင်တာနက် အသုံးပြုပြီး လုပ်ဆောင်သည့် မှုခင်းကိစ္စရပ်များကို တားဆီးနိုင်ရန်အတွက် အင်တာနက်လိုင်းဝန်ဆောင်မှုပေးသည့် ကုမ္ပဏီများ အနေဖြင့် ပူပေါင်းသတင်းပေးရန် တာချီလိတ်ခရိုင်အုပ်ချုပ်ရေးမှူးက ဖေဖော်ဝါရီလ ၁၀ရက်က ခေါ်ယူဆွေးနွေးသည်။

နေအိမ်များနှင့် ဟိုတယ်များမှ အင်တာနက်လိုင်းများ ရယူရာတွင် လိုအပ်သည့် ပမာဏထက် ပိုမိုများပြားသည့် ပမာဏများရယူခြင်း၊ အင်တာနက်သွားရောက် တပ်ဆင်ပေးရာတွင် အင်တာနက်လောင်းကစားပြုလုပ်ရန် ပြင်ဆင်နေမှုများ တွေ့ရှိပါက ကြိုတင်တားဆီးနိုင်ရန်အတွက် အင်တာနက်ကုမ္ပဏီများမှ အာဏာပိုင်များထံ သတင်းပေးပြီး ပူးပေါင်းဆောင်ရွက်ရန် တာချီလိတ်ခရိုင်အုပ်ချုပ်ရေးမှူး ဦးမြင့်နိုင်က အင်တာနက် ကုမ္ပဏီများကို ပြောသည်။

“အွန်လိုင်းဂိမ်းဆိုတဲ့ ဟာတွေက အင်တာနက်မရှိဘဲ ဘယ်လိုမှ လုပ်လို့မရပါဘူး။ ဒါကြောင့် ပူးပေါင်းပါဝင်ကြဖို့ ပြောကြားရခြင်း ဖြစ်ပါတယ်” ဟု ၎င်းက ပြောသည်။

အင်တာနက်ကုမ္ပဏီများဘက်မှ တာဝန်ရှိသူတစ်ဦးက ပြန်လည်ဆွေးနွေးရာတွင် သုံးစွဲသူမှ အင်တာနက်လိုင်းရယူပါက အင်တာနက် ကုမ္ပဏီ အနေဖြင့် သွားရောက်တပ်ဆင်ပေးရုံသာ ဖြစ်ပြီး မည်သည့်ရည်ရွယ်ချက်အတွက် အသုံးပြုရသည်ကို သိရှိခြင်း မရှိကြောင်း၊ နောက်ပိုင်းသုံးစွဲမှုများကို အင်တာနက် ကုမ္ပဏီများ အနေဖြင့် ဝင်ရောက် ကြည့်ရှူ့ခြင်းလည်း မရှိကြောင်း တင်ပြဆွေးနွေးသည်။

အဆိုပါဆွေးနွေးပွဲကို ဖေဖော်ဝါရီလ ၁၀ရက် နံနက်ပိုင်းတွင် တာချီလိတ်ခရိုင် OSS ရုံးအစည်းအဝေး ခန်းမ၌ ကျင်းပပြုလုပ်ခြင်း ဖြစ်ပြီး ရှမ်းပြည်နယ်ရဲတပ်ဖွဲ့ ဒုတိယပြည်နယ်ရဲတပ်ဖွဲ့မှူး ရဲမှူးကြီး တင်ဇော်ထွန်း၊ တာချီလိတ်ခရိုင်အုပ်ချုပ်ရေးမှူး ဦးမြင့်နိုင်နှင့် ခရိုင်အဆင့် ဌာနဆိုင်ရာတာဝန်ရှိသူများ၊ မြို့နယ်အဆင့် ဌာနဆိုင်ရာ တာဝန်ရှိသူများ တက်ရောက်သည်။

ဆွေးနွေးပွဲတွင် ရဲတပ်ဖွဲ့တာဝန်ရှိသူများကို ရဲတပ်ဖွဲ့အနေဖြင့် လုပ်ဆောင်မည့် ကိစ္စရပ်များကို ပြောကြားပြီး တာချီလိတ်ခရိုင်ဥပဒေအရာရှိကလည်း လောင်းကစားဥပဒေနှင့် သက်ဆိုင်သည့် ကိစ္စရပ်များကို ဆွေးနွေးတွင်ပြသည်။

တာချီလိတ်မြို့နယ်အတွင်း MPT၊ MyTel၊ Im-Net၊ Htin Htin အပါအဝင် အင်တာနက် ကုမ္ပဏီ ၁၀ ခုခန့်မှ Fiber အင်တာနက် ဝန်ဆောင်မှု ပေးလျှက်ရှိသည်။

MK – 001

MeKongNews

ဘန်ကောက်၊ ဖေဖော်ဝါရီ ၁၀

ကျန်းမာရေးသုံးနှာခေါင်းစည်းများကို ကုန်စည်နှင့်ဝန်ဆောင်မှု ဈေးနှုန်းများဆိုင်ရာ ဗဟိုကော်မတီ၏ သတ်မှတ်ဈေးထက် ပိုမိုတင်ရောင်းသည့် အရောင်းဆိုင်ရှင် (၄)ဦးကို ထိုင်းတွင် ဖမ်းဆီးလိုက်သည်။

ဘန်ကောက်ခရိုင်ပြင်ပရှိ ခရိုင် ၇၆ခုတွင် စီးပွားရေးအရာရှိများက ဖေဖော်ဝါရီလ ၉ရက်၌ ဈေးကွက် စုံစမ်းမှုများ ပြုလုပ်ခဲ့ကြောင်း စီးပွားရေးဝန်ကြီးဌာန အမြဲတမ်းအတွင်းဝန် ဘွန်ရာရစ် ကန်လာယနမစ်က ဖေဖော်ဝါရီ ၁၀ရက် သတင်းစာရှင်းလင်းပွဲတွင် ပြောသည်။

“၂ ယောက်က ဖူးခတ်ကပါ။ တစ်ယောက်က ချွန်ဘူရီက၊ နောက်တစ်ယောက်တော့ ဆူရတ်ဌာနီကပါ။ သူတို့ကို ရဲတပ်ဖွဲ့ဆီကို လွှဲပြောင်းပေးထားပြီး ကုန်စည်နဲ့ဝန်ဆောင်မှု ဈေးနှုန်းများဆိုင်ရာ ဥပဒေကို ဖောက်ဖျက်မှုနဲ့ တရားစွဲထားပါတယ်။ ဒီဥပဒေအရ အမြင့်ဆုံး ဒဏ်ငွေ ဘတ် ၁သိန်း၄သောင်း၊ ဒါမှမဟုတ် ထောင် ၇နှစ်၊ ဒါမှမဟုတ် ပြစ်ဒဏ် ၂ရပ်လုံးလည်း ကျနိုင်ပါတယ်” ဟု၎င်းက ပြောသည်။

လက်လီဈေးဆိုင်ပိုင်ရှင်များအနေဖြင့် ကုန်စည်နှင့်ဝန်ဆောင်မှု ဈေးနှုန်းများဆိုင်ရာ ဥပဒေကို တိတိကျကျ လိုက်နာရန်လည်း စီးပွားရေးအရာရှိများက အကြုံပြုခဲ့ကြောင်း အမြဲတမ်းအတွင်းဝန်က အကြံပြုသည်။

အဆိုပါဥပဒေတွင် ကုန်ပစ္စည်းများကို ခိုင်လုံသည့်အကြောင်းပြချက်မရှိဘဲ ဈေးမတင်ရန်၊ ဝယ်လိုအားမြင့်တက်နေသည့် ကုန်စည်များကို သိုလှောင်ထားခြင်း မပြုရန်နှင့် ပစ္စည်းတန်ဖိုးများကို မြင်သာသည့် နေရာတွင် ကပ်ထားရန် ပြဌာန်းထားသည်။

“စီးပွားရေးဆိုင်ရာအရာရှိတွေဟာ ဒုဝန်ကြီးချုပ်နဲ့ ကျန်းမာရေးဝန်ကြီးဖြစ်တဲ့ ကျူရင် လက်စနာဝိဆစ်ရဲ့ အမိန့်အတိုင်း သက်ဆိုင်ရာခရိုင်က ဈေးကွက်တွေထဲမှာ ကျန်းမာရေးသုံးနှာခေါင်းစည်း၊ အသင့်သုံးလက်ဆေးရည်နဲ့ ကျန်းမာရေးသုံပစ္စည်းတွေရဲ့ဈေးနှုန်းကို နေ့စဉ်စစ်ဆေးနေမှာပါ” ဟု အမြဲတမ်းအတွင်းဝန်က ပြောသည်။

ထို့ပြင် ဈေးနှုန်းမြှင့်တင်ရောင်းချမှုများကို ဖော်ထုတ်အရေးယူရန် အရေးပေါ်တုံ့ပြန်ဆောင်ရွက်မှုအဖွဲ့ကိုလည်း ဖွဲ့စည်းထားပြီး ဖြစ်ကြောင်း ၎င်းက ပြောသည်။

ပြည်သူများအနေဖြင့်လည်း ထုတ်လုပ်သူများ၊ လက်ကားသမားများ၊ လက်လီရောင်းသမားများ၏ မတန်တဆ အမြတ်ထုတ်မှုများကို ပြည်တွင်းကုန်သွယ်ရေးဦးစီးဌာန ဟော့လိုင်းနံပတ် ၁၅၆၉ သို့ ဆက်သွယ် သတင်းပေးနိုင်ကြောင်း သိရသည်။

Ref: The Nation Thailand
Photo: The Nation

MeKongNews

တာချီလိတ်၊ ဖေဖော်ဝါရီ ၁၀

တာချီလိတ်မြို့တွင် ဖြစ်ပွားခဲ့သည့် မှုခင်းများ ဖော်ထုတ်နိုင်ရေးအပါအဝင် ဒုစရိုက်မှုများကို ကြိုတင်ကာကွယ်ရေး အတွက် ‘ကျားမင်း’ စီမခံချက်ကို ချမှတ်ပြီး ဆောင်ရွက်နေပြီ ဖြစ်ကြောင်း ရှမ်းပြည်နယ်ရဲတပ်ဖွဲ့ ဒုတိယပြည်နယ် ရဲတပ်ဖွဲ့မှူး ရဲမှူးကြီး တင်ဇော်ထွန်းက ဖေဖော်ဝါရီလ ၁၀ရက်တွင် ပြောသည်။

ဖေဖော်ဝါရီလ ၁၀ရက် နံနက်ပိုင်းက တာချီလိတ် OSS ရုံးတွင် ကျင်းပပြုလုပ်သည့် ဒုစရိုက်မှု ကာကွယ်နှိမ်နင်းရေး အစည်းအဝေး အပြီး သတင်းမီဒီယာများနှင့် တွေ့ဆုံစဉ်ပြောဆိုလိုက်ခြင်း ဖြစ်သည်။

တာချီလိတ်မြို့တွင် ဖြစ်ပွားခဲ့သည့် ဒုစရိုက်အမှုကြီးများကို ဖော်ထုတ်နိုင်ရန်၊ မှုခင်းကျဆင်းရေးဆောင်ရွက်ရန်၊ မှုခင်းများနှင့် ဆက်စပ်နိုင်သည့် လောင်းကစားမှုများ နှိမ်နင်းရေးအတွက် စီမံချက်တစ်ရပ်ကို ချမှတ်ဆောင်ရွက်ခြင်း ဖြစ်ကြောင်း ရဲမှူးကြီး တင်ဇော်ထွန်းက ပြောသည်။

“နောက်ပြီးတော့ အခုဆို အလုပ်လက်မဲ့တွေ များလာတယ်။ အဲဒီကနေတဆင့် ကာလတစ်ခုအတွင်းမှာ ငွေကြေးလိုအပ်ချက်အရ ဒုစရိုက်မှုတွေ ဖြစ်လာနိုင်တယ်။ ဒါကိုလည်း ကြိုတင်ကာကွယ်တဲ့ အနေနဲ့ပေါ့” ဟု ၎င်းက ပြောသည်။

‘ကျားမင်း’ စီမံချက်ကို ရက်(၉၀) ချမှတ် ဆောင်ရွက်သွားမည်ဖြစ်ပြီး ဖေဖော်ဝါရီလ (၁)ရက်မှ စတင်ဆောင်ရွက်နေကြောင်း ရဲမှူးကြီး တင်ဇော်ထွန်းက ပြောသည်။

“ဖြစ်ပွားခဲ့တဲ့ မှုခင်းတွေ ထပ်ပြီးတော့ မဖြစ်ပွားဖို့အတွက် ရဲတပ်ဖွဲ့အင်အားတွေ ထပ်ဖြည့်တင်းပြီး ဆောင်ရွက်နေပါတယ်” ဟု ၎င်းက ပြောသည်။

ဖြစ်ပွားခဲ့သည့် သေနတ်ပစ်မှု၊ ဓားပြမှု၊ လုယက်မှုကဲ့သို့ မှုခင်းဖြစ်စဉ်များကို ပြန်လည်သုံးသပ်သည့် အခါ နေ့လည်ခင်းအချိန်တွင် ဖြစ်ပွားမှုများသည့်အတွက် နေ့ခင်းအချိန်တွင် မှုခင်းဖြစ်ပွားတတ်သည့် နေရာများ၌ လှည့်ကင်း၊ ရပ်ကင်းများ ချထားဆောင်ရွက်နေကြောင်း တာချီလိတ်ခရိုင် ရဲတပ်ဖွဲ့ထံမှ သိရသည်။

ထို့ပြင် ရပ်ကင်းများ ဆောင်ရွက်ရာတွင် လိုအပ်သည့် နေရာများ၌ Police Box များလည်း ချထား ဆောင်ရွက်သွားမည် ဖြစ်ကြောင်း သိရသည်။

MK – 001

MeKongNews

စင်ကာပူ၊ ဖေဖော်ဝါရီ ၉

တရုတ်နိုင်ငံမှစတင်ပြန့်နှံ့ခဲ့သည့်ကိုရိုနာဗိုင်းရပ်စ်သစ်အတွက် ကာကွယ်ဆေးဖော်စပ်နိုင်ရန် အမေရိကန်မှသြစတြေးလျအထိသိပ္ပံပညာရှင်များက နည်းပညာသစ်အသုံးပြုပြီး စံချိန်တင်အချိန်အတွင်းကြိုးစားနေကြသည်။

ကာကွယ်ဆေးများဖော်စပ်ရာတွင် ပုံမှန်အားဖြင့် နှစ်ချီကြာတတ်ပြီး တိရစ္ဆာန်များကိုစမ်းသပ်ရာတွင်ကြာညောင်းသကဲ့သို့ လူများကိုစမ်းသပ်ရာနှင့်ခွင့်ပြုချက်တောင်းခံရာတွင်လည်း စောင့်ဆိုင်းရတတ်သည်။

သို့သော် ပေါ်ထွက်လာသည့်ရောဂါများကိုတိုက်ခိုက်ရန်ရည်ရွယ်သည့်နိုင်ငံတကာပူးပေါင်းအဖွဲ့ကထောက်ခံပေးထားသော ကျွမ်းကျင်သူအဖွဲ့များစွာက မြန်မြန်ဖော်စပ်နိုင်ရန် ကြိုးပမ်းနေပြီး ၆ လအတွင်းအဆင်သင့်ဖြစ်နိုင်သည်ဟု သြစတြေးလျအဖွဲ့တစ်ဖွဲ့ကပြောသည်။

ဖိအားများသောအခြေအနေဖြစ်နေပြီး ဝန်ပိနေသည်များရှိနေကြောင်း သြစတြေးလျနိုင်ငံ၊ ကွင်းစ်တက္ကသိုလ်မှအဖွဲ့ဝင် အကြီးတန်းသုတေသီ ကိတ် ချတ်ပယ်ကပြောသည်။

အားထုတ်မှုများကို ကပ်ရောဂါကြိုတင်ပြင်ဆင်ထားမှုဖန်တီးမှုများပူးပေါင်းအဖွဲ့ CEPI ကထောက်ခံထားသည်။

ယနေ့အထိ ကိုရိုနာဗိုင်းရပ်စ်သစ်ကြောင့် တရုတ်ပြည်မကြီးတွင် သေဆုံးသူ ၈၁၁ ယောက်ရှိပြီး ကူးစက်ခံထားရသူ ၃၇၁၉၈ ယောက်ရှိနေသည်။

၂၀၀၃ ခုနှစ်က တရုတ်ပြည်မကြီးနှင့်ဟောင်ကောင်တွင်ဖြစ်ပွားခဲ့သောအလားတူကိုရိုနာဗိုင်းရပ်စ်ကြောင့်ဖြစ်သည့် ဆားစ်ရောဂါထက် သေဆုံးသူပိုများနေပြီဖြစ်သည်။
Source- AFP
#ဥက္ကာ #MeKongNews
Photo- People’s Daily China

တာချီလိတ်၊ ဖေဖော်ဝါရီ ၉

တောင်ကြီးမြို့ တွေ့ဆုံပွဲတွင် တာချီလိတ်မြို့နှင့် ပတ်သက်ပြီး သမ္မတ၏ ပြောကြားချက်များထဲမှ အချက်အလက် အချို့မှာ မှားယွင်း နေကြောင်း ဝေဖန်ကြသည်။

ဖေဖော်ဝါရီလ ၉ရက် နံနက်ပိုင်းက တာချီလိတ်မြို့ 1G18 ဟိုတယ်တွင် ပြုလုပ်သည့် တာချီလိတ်မြို့ ဟိုတယ်လုပ်ငန်းများ ထိခိုက်မှုအပေါ် ဟိုတယ်လုပ်ငန်းရှင်များနှင့် မြို့မိမြို့ဖများ၊ သတင်းမီဒီယာများ ဆွေးနွေးအကြံဉာဏ်ရယူပွဲတွင် ဆွေးနွေးသူ အချို့က ပြောဆို ဝေဖန်ထောက်ပြခဲ့ခြင်း ဖြစ်သည်။

သမ္မတ ဦးဝင်းမြင့်က ဖေဖော်ဝါရီလ ၆ရက် နံနက်ပိုင်း တောင်ကြီးမြို့တွင် ဌာနဆိုင်ရာများနှင့် တွေ့ဆုံရာ၌ တာချီလိတ်မြို့တွင် လောင်းကစားမှုများ များပြားနေပြီး နိုင်ငံခြားသားများမှသာ အကျိုးအမြတ်ရရှိပြီး မြန်မာနိုင်ငံသားများက ပေးလိုက်ရခြင်းဖြစ်ကြောင်း ထည့်သွင်းပြောဆိုခဲ့ရာ ယင်းအချက်မှာ မှားယွင်းနေကြောင်း ဆွေးနွေးပွဲသို့ တက်ရောက်သည့် ရွှေတြိဂံဒေသသတင်းလွှာ အယ်ဒီတာချုပ် ကိုထွန်း(မိုင်းဖြတ်)က ဝေဖန်ထောက်ပြသည်။

“တကယ်တော့ နိုင်ငံခြားသားတွေ ဝင်လာတာက ဒေသခံတွေအတွက် အလုပ်အကိုင် အခွင့်အလမ်းတွေ အများကြီး ဖြစ်ပေါ်စေပါတယ်။ လောင်းကစားလုပ်တယ် ဆိုရင်လည်း အနိုင်အရှုံးက ရှိစမြဲဖြစ်ပါတယ်” ဟု ၎င်းက ထည့်သွင်းဆွေးနွေးခဲ့သည်။

လောင်းကစားရုံများမှ တဆင့် ဒုစရိုက်မှုများ၊ မူးယစ်ဆေးဝါး သုံးစွဲမှုများ ဖြစ်ပေါ်သည်ဟု ဆိုရာတွင်လည်း အခြေအနေကို ခွဲခြားသိရှိရန် လိုကြောင်း တာချီလိတ်သတင်းအေဂျင်စီ၏ စီအီးအို ကိုဇောင်းက ဆွေးနွေးတင်ပြသည်။

“မူးယစ်ဆေးဝါးတွေ ဆက်နွယ်တယ် ဆိုတာက ရပ်ကွက်တွင်းက လောင်းကစားရုံတွေက ဖြစ်တာလား။ ဟိုတယ်တွေက ကာစီနိုရုံတွေက ဖြစ်တာလား ခွဲခြားသိရှိ ဖို့ လိုပါတယ်။ အခုလို ဟိုတယ်က ကာစီနိုတွေ ပိတ်လိုက်တာက အလုပ်သမား ထောင်နဲ့ချီပြီး အလုပ်လက်မဲ့ ဖြစ်စေပါတယ်” ဟု၎င်းက ဆွေးနွေးသည်။

ထိုသို့ ဝေဖန်ဆွေးနွေးမှုများနှင့် ပတ်သက်ပြီး တာချီလိတ်မြို့နယ်၊ အမျိုးသားလွှတ်တော် ကိုယ်စားလှယ် ဦးစိုင်းလုံစံခတ်ထံဆက်သွယ် မေးမြန်းရာ တာချီလိတ်မြို့ရှိ ကာစီနိုရုံများ ပိတ်သိမ်းရသည့် ကိစ္စမှာ ယခုကဲ့သို့ အခြေအနေထိ ဖြစ်မသွားသင့်ကြောင်း၊ သို့သော် ထိန်းထိန်းသိမ်းသိမ်း လုပ်ဆောင်ခြင်းမရှိဘဲ ပေါ်ပေါ်ထင်ထင် လုပ်ဆောင်နေသည့် ကိစ္စအချို့ကြောင့် ယခုကဲ့သို့ ဖြစ်ရခြင်း ဖြစ်ကြောင်း ပြောဆိုသည်။

“တကယ်ဆို ဒီလောက်အထိ မဖြစ်သွားသင့်ဘူး။ အခုဟာက လမ်းသွားရင်းတောင် မြင်ရတယ်” ဟု၎င်းက ပြောသည်။

ထို့ပြင် အုပ်ချုပ်ရေးပိုင်း အနေဖြင့်လည်း သမ္မတ ပြောဆိုမှ လုပ်ဆောင်ခြင်းမှာ သမ္မတပြောသည့်အပေါ် အရွှဲ့တိုက်ခြင်းသာ ဖြစ်ကြောင်း ဦးစိုင်းလုံစံခတ်က ပြောသည်။

“နောက်တစ်ခုက ဒီကာစီနိုရုံတွေမှာ ထိုင်းနိုင်ငံသားတွေ အများကြီး အလုပ်လာလုပ်တယ်။ တို့ဘက်ကလူ ဟိုဘက်ကို သွားလုပ်ရင် နည်းမျိုးစုံနဲ့ အညစ်ခံရတယ်။ သူတို့ကျတော့ သာသာယာယာပဲ၊ လစာကလဲ ပိုများသေးတယ်။ ဒါတွေကို ဘယ်သူမှ မကျပ်မတ်ဘူး” ဟု၎င်းက ပြောသည်။

ကာစီနို လုပ်ငန်းများ သတ်မှတ်ချက် တစ်ခုဖြင့် လုပ်ကိုင်ခွင့် ရရန် ဟိုတယ်လုပ်ငန်းရှင်များ ပူးပေါင်းပြီး နိုင်ငံတော်သမ္မတထံ အခြေအနေမှန်ကို တင်ပြ တောင်းဆိုပါက အမျိုးသား လွှတ်တော်ကိုယ်စားလှယ်တစ်ဦး အနေဖြင့် ထောက်ခံသွားမည် ဖြစ်သလို ပူးပေါင်းပါဝင်သွားမည် ဖြစ်ကြောင်းလည်း ဦးစိုင်လုံစံခတ်က ဆိုသည်။

နိုင်ငံတော်သမ္မတ၏ ပြောကြားချက်အပြီး နာရီပိုင်းအတွင်း တာချီလိတ်မြို့ရှိ ငါးမန်းခုံဟုခေါ်သည့် လောင်းကစားဂိမ်းခုံငယ်များ သာကမ ဟိုတယ်များရှိ ကာစီနိုရုံများကိုပါ ပိတ်ခဲ့ရသည်။

ထိုသို့ပိတ်လိုက်ရသည့်အတွက် ဟိုတယ်များတွင် အလုပ်လုပ်ကိုင်နေသည့် အလုပ်သမား ၇၀၀၀ ထောင်ခန့် အလုပ်လက်မဲ့ ဖြစ်သွားကြောင်း ဟိုတယ် လုပ်ငန်းရှင်များထံမှ သိရသည်။

“ပိတ်လိုက်ရတော့ အလုပ်သမားတွေလည်း အလုပ်လက်မဲ့ ဖြစ်တယ်။ ရင်းနှီးမြုပ်နှံဖို့ လာတဲ့သူတွေအတွက်လည်း ယုံကြည်မှု ကင်းမဲ့စေတယ်။ တကယ်ဆို ပြသနာဖြစ်စေတာက ဘယ်ဟာလဲ။ ဘယ်ဟာက အကျိုးအမြတ် ဖြစ်ထွန်းစေတာလဲ ဆိုတာကို သေသေချာချာခွဲခြားပြီး တားသင့်တာတား၊ ခွင့်ပြုသင့်တာ ခွင့်ပြု လုပ်သင့်တယ်” ဟု ဟိုတယ်လုပ်ငန်းရှင် တစ်ဦးက ဆိုသည်။

MK – 001

MeKongNews

ကိုရတ်၊ ဖေဖော်ဝါရီ ၉

အထက်အရာရှိအပါအဝင် အပြစ်မဲ့လူပေါင်း ၂၁ဦးကို သေနတ်ဖြင့် လိုက်လံသတ်ဖြတ်ကာ တစာခံများ ဖမ်းဆီးထားသည့် ထိုင်းစစ်တပ်မှ တပ်ကြပ်ကြီး အဆင့်ရှိသူကို ပစ်ခတ်ကာ သုတ်သင်နိုင်ခဲ့ပြီဖြစ်ကြောင်း ထိုင်းရဲတပ်ဖွဲ့က ဖေဖော်ဝါရီလ ၉ရက် နံနက်ပိုင်းက ထုတ်ပြန်သည်။

အဆိုပါထိုင်းစစ်သားကို ပစ်သတ်နိုင်လိုက်ပြီဖြစ်ကြောင်း ထိုင်းဒုတိယဝန်ကြီးချုပ် အနူတင်ချန်ဗီရခူလ်က အတည်ပြုပေးခဲ့ပြီး ၎င်း၏ ပစ်ခတ်မှုကြောင့် အနည်းဆုံး လူ ၂၁ဦး သေဆုံးသွားကြောင်း သိရသည်။

ယခု ပစ်ခတ်မှုမှာ ထိုင်းခေတ်သစ်သမိုင်းတွင် အကြီးများဆုံး လူအစုလိုက်အပြုံလိုက် သတ်ဖြတ်ခံရမှု ဖြစ်သည်။

ထိုင်းနိုင်ငံ၊ နခွန်ရတ်ချာဆီမာခရိုင်က ကိုရတ်မြို့ ဆူရာသမ်ပီတက်စစ်အခြေစိုက်စခန်းမှ ထိုင်းတပ်ကြပ် ဂျာကရာပန့် သွမ်မာ ဖေဖော်ဝါရီလ ၈ရက် ညနေပိုင်းက ၎င်း၏ အရာရှိဖြစ်သူကို ပစ်သတ်ကာ လက်နက်တိုက်မှ သေနတ်နှင့် ကျည်အမြောက်အများကို ယူဆောင်ထွက်ပြေးသွားပြီး လမ်းတွင်တွေ့သည့် လူအုပ်ထဲသို့ သေနတ်ဖြင့် ပစ်ခတ်ခဲ့သည်။

ပစ်ခတ်မှုကြောင့် လူအမြောက်အများသေဆုံးခဲ့ပြီး ၎င်းက အနီးရှိ Terminal 21 ဈေးဝယ်စင်တာသို့ ဝင်ရောက်ခဲ့ပြီး လူအများအပြားကို ဓားစာခံအဖြစ် ထိန်းသိမ်းထားခဲ့သည်။

Ref: Khaosod English

MeKongNews

နခွန်ရတ်ချာဆီမာ၊ ဖေဖော်ဝါရီ ၉

ထိုင်းနိုင်ငံ၊ နခွန်ရတ်ချာဆီမာခရိုင်က ကိုရတ်မြို့လယ်ရှိစျေးဝယ်စင်တာတစ်ခုတွင် စျေးဝယ်သူများကိုသေနတ်ဖြင့်ပစ်ခတ်သည့် ထိုင်းစစ်သားသေနတ်သမားကိုချေမှုန်းရန် ထိုင်းရဲအသေခံတပ်ဖွဲ့များရောက်ရှိနေပြီး စင်တာမြေညီထပ်မှဓားစာခံများကို ကယ်ထုတ်ထားနိုင်နေပြီဖြစ်သည်။

စင်တာထဲပိတ်မိနေသူများကို ဘေးကင်းကင်းကယ်ထုတ်နိုင်ကြောင်းလည်း ထိုင်းသတင်းများတွင်ဖော်ပြနေသည်။

စနေနေ့ည ၈ နာရီခန့်တွင် ဓားစာခံ ၁၄ ဦးထိန်းသိမ်းထားပြီးနောက် ည ၁၀ နာရီကျော်တွင် ကယ်ထုတ်နိုင်ခြင်းဖြစ်ရာ ဓားစာခံများပါဝင်ခြင်းရှိ၊ မရှိလည်းမရှင်းလင်းသေးချေ။

သံသယတရားခံမှာ အသက် ၃၂ နှစ်ရှိ ထိုင်းတပ်ကြပ် ဂျာကရာပန့် သွမ်မာဖြစ်ပြီး လက်ရှိအချိန်အထိစာရင်းများအရ လူ ၂၀ ကိုအကြောင်းမဲ့ပစ်သတ်ခဲ့သည့်အပြင် အာဏာပိုင်များနှင့် ပြေးလွှားပစ်ခတ်နေသည်။

ထိုတိုက်ခိုက်သူက သူ၏လူမှုကွန်ရက်တွင် စတိုက်ခိုက်ကတည်းက စာများနှင့်ဗီဒီယိုများ ဆက်တိုက်တင်နေသည်။

မည်သည့်အကြောင်းကြောင့်တိုက်ခိုက်ကြောင်းမသိရသေးသော်လည်း စနေနေ့ညနေ ၇ နာရီခန့်က အကောင့်ဖျက်ခဲ့သည့် သူ၏Facebookစာမျက်နှာတွင် လက်စားချေသည်ဟု ရေးသားထားသည်။

ထိုစစ်သားမှာ ခရိုင်အတွင်းရှိဆူရာသမ်ပီတက်စစ်အခြေစိုက်စခန်းမှဖြစ်ကြောင်း ထိုင်းကာကွယ်ရေးဝန်ကြီးဌာနက အတည်ပြုသည်။

၎င်း၏ Facebook စာမျက်နှာမပျက်ခင်က ၂၀၁၁ ခုနှစ်တွင် ကလေးအများစုပါသော လူ ၆၀ ကျော်ကိုသတ်ခဲ့သည့်နော်ဝေးနိုင်ငံသားအစွန်းရောက်တစ်ဦး၏ လုပ်ရပ်ကိုလေ့လာနေကြောင်း တင်ခဲ့သည်။

နေ့လည်ပိုင်းက ကိုယ်ပိုင်အိမ်တစ်လုံးတွင် လူ ၂ ယောက်ကိုစတင်ပစ်ခတ်ခဲ့ပြီး စစ်အခြေစိုက်စခန်းတစ်ခုသို့သွားကာ လက်နက်များနှင့်ဟမ်းဘီးကားတစ်စင်းခိုးယူခဲ့သည့်အ​ပြင် အစောင့်တစ်ယောက် အပါအဝင် တပ်ဖွဲ့ဝင်များကိုလည်းပစ်ခတ်ခဲ့သည်။

စခန်းမှ ဟမ်းဘီးကားနှင့် ထွက်ပြေးခဲ့ပြီးနောက် လိုက်ဖမ်းသည့်ရဲတစ်ယောက်ကိုလည်း ပစ်ခတ်ခဲ့ပြီး စင်တာအဝင်တွင် ဓာတ်ငွေ့အိုးကို သေနတ်ဖြင့်ပစ်ခတ်ဖောက်ခွဲခဲ့သည်။

ပြီးခဲ့သည့်လကလည်း လော့ဘူရီခရိုင်တွင် ရွှေဆိုင်တစ်ဆိုင်ကိုဝင်ရောက်လုယက်ပြီးနောက် စကားပြောတတ်ကာစကလေးငယ်တစ်ယောက်အပါအဝင် လူ ၃ ယောက်ကိုပစ်သတ်ခဲ့သည့်ဖြစ်ရပ်ဖြစ်ပွားခဲ့သည်။

Source- Coconuts
#ဥက္ကာ #MeKongNews
Photo- Coconuts

တာချီလိတ်၊ ဖေဖော်ဝါရီ ၈

ကျိုင်းတုံမြို့တွင် ပြုလုပ်မည့် မြန်မာနိုင်ငံဟိုတယ်ဆိုင်ရာ လုပ်ငန်းရှင်များအသင်း(ရွှေတြိဂံဇုန်) အတွက် အလုပ်အမှုဆောင်အဖွဲ့ ပြည်လည်ရွေးချယ်ပွဲအကြို ညှိနှိုင်းအစည်းအဝေးကို တာချီလိတ်မြို့၊ 1G18 ဟိုတယ်တွင် ဖေဖော်ဝါရီလ ၈ရက် နံနက်ပိုင်းက ကျင်းပပြုလုပ်သည်။

ဖေဖော်ဝါရီ ၁၄ရက်တွင် ကျိုင်းတုံမြို့ Amazing Hotel ၌ အလုပ်အမှုဆောင်အဖွဲ့ကို ပြန်လည်ရွေးချယ်မည် ဖြစ်ရာ အဆိုပါအလုပ်အမှုဆောင်အဖွဲ့သစ်အတွက် တာချီလိတ်မြို့ ဟိုတယ်လုပ်ငန်းရှင်များ အသင်းမှ ဝင်ရောက်ယှဉ်ပြိုင်မည့် သူများကို အကြိုညှိနှိုင်းပြီး စည်းကမ်းသတ်မှတ်ချက်များကို ကြိုတင်ရှင်းပြသည်။

ရွှေတြိဂံဇုန်အတွက် အလုပ်အမှုဆောင် ပြန်လည်ရွေးချယ်ရာတွင် ဥက္ကဌနေရာကို တာချီလိတ်မြို့ ဟိုတယ်လုပ်ငန်းရှင်များထဲမှ တစ်ဦးဦးကို တာဝန်ထမ်းဆောင်ရန် အများက အလိုရှိသည့်အတွက် အဆိုပါ ဥက္ကဌနေရာ ဝင်ရောက်ယှဉ်ပြိုင်မည့်သူကို ကြိုတင်ညှိနှိုင်းရွေးချယ်ခြင်း ဖြစ်ကြောင်း မြန်မာနိုင်ငံဟိုတယ်ဆိုင်ရာ လုပ်ငန်းရှင်များအသင်း(ရွှေတြိဂံဇုန်)၏ လက်ရှိ ဒုတိယဥက္ကဌ ကိုအာကာက ပြောသည်။

“ရွှေတြိဂံဇုန်ဆိုတဲ့ အထဲမှာ ကျိုင်းတုံ၊ တာချီလိတ်၊ မိုင်းဖြတ်၊ မိုင်းဆက် အကုန်ပါပါတယ်။ ၁၄ရက်နေ့မှာ ကျိုင်းတုံမှာ ဆန္ဒမဲပေးပြီးတော့ ရွေးချယ်မှာ ဖြစ်ပါတယ်။ အဲဒီအတွက် အဆိုပြုမယ်လူကို ကြိုတင်ပြီးတော့ ဆန္ဒကောက်ခံတာ ဖြစ်ပါတယ်” ဟု ၎င်းက ပြောသည်။

ကြိုတင်ညှိနှိုင်းရာတွင် ဥက္ကဌနေရာအတွက် ဟိုတယ်တာချီလိတ်ပိုင်ရှင် ဦးထွန်းနေဦးက ဝင်ရောက်ယှဉ်ပြိုင်ရန် သဘောတူကြပြီး ဒုဥက္ကဌနေရာအတွက် 1G1 ဟိုတယ်မှ ဦးအောင်နိုင်က ဝင်ရောက်ယှဉ်ပြိုင်ရန် သဘောတူခဲ့ကြောင်း ကိုအာကာ ကပြောသည်။

ထို့အပြင် အလုပ်အမှုဆောင်အဖွဲ့ဝင်အဖြစ် ဝင်ရောက်ယှဉ်ပြိုင်မည့် သူအချို့လည်း ပေါ်ထွက်လာခဲ့ကြောင်း သိရသည်။

ရွှေတြိဂံဇုန် အလုပ်အမှုဆောင်အဖွဲ့ ရွေးချယ်ပွဲပြီးပါက တာချီလိတ်တွင် ရုံးခန်းဖွင့်လှစ်ကာ ဟိုတယ်လုပ်ငန်းကဏ္ဌ တိုးတက်ရေးအတွက် စုပေါင်းဆောင်ရွက်သွားမည် ဖြစ်ကြောင်း ဥက္ကဌအဖြစ် ဝင်ရောက် ရွေးချယ်ခံမည့် ဦးထွန်းနေဦးက ပြောသည်။

မြန်မာနိုင်ငံဟိုတယ်ဆိုင်ရာ လုပ်ငန်းရှင်များအသင်း(ရွှေတြိဂံဇုန်)တွင် တာချီလိတ်၊ ကျိုင်းတုံ၊ မိုင်းဖြတ်၊ မိုင်းဆတ်တို့မှ ဟိုတယ် ၇၀ကျော်၏ ပိုင်ရှင်နှင့် ကိုယ်စားလှယ်များပါဝင်ပြီး ယင်းထဲတွင် ဟိုတယ် ၅၃လုံးမှာ တာချီလိတ်မှ ဖြစ်သည့်အတွက် ဥက္ကဌ နေရာကို တာချီလိတ်မှ ဟိုတယ်လုပ်ငန်းရှင်တစ်ဦးဦးကို အများက တာဝန်ထမ်းဆောင်စေလိုခြင်း ဖြစ်ကြောင်း သိရသည်။

MK – 001

MeKongNews