တာချီလိတ်၊ ဒီဇင်ဘာ ၁၁
တာချီလိတ်မြို့တွင်ပြုလုပ်သည့် နိုင်ငံတော်အတိုင်ပင်ခံပုဂ္ဂိုလ်နှင့်အဖွဲ့ကို ထောက်ခံပွဲတွင် ပွဲသို့တက်ရောက်ခြင်း မရှိသည့် ရှမ်းတိုင်းရှင်းသားများဒီမိုကရေစီအဖွဲ့ချုပ်-SNLD အမည်ပါ ဆိုင်းဘုတ်ကို မှားယွင်းကိုင်ဆောင်မိသည့် အတွက် ထောက်ခံပွဲဖြစ်မြောက်ရေး ကော်မတီက ဒီဇင်ဘာလ ၁၁ရက် နေ့လည်ပိုင်းက သွားရောက်တောင်းပန် သည်။
ထောက်ခံပွဲဖြစ်မြောက်ရေးကော်မတီ ဥက္ကဌ ဒေါက်တာမြင့်အောင်၊ အတွင်းရေးမှူး ဦးမျိုးမင်းသိန်းနှင့် စီမံခန့်ခွဲရေးမှူး ဦးတင့်ဆွေတို့က တာချီလိတ်မြို့နယ် SNLD ပါတီရုံးကို သွားရောက်ကာ SNLD ပါတီဥက္ကဌထံ လိပ်မူထားသည့် တောင်းပန်ခြင်းနှင့်မှားယွင်းမှုအပေါ်ရှင်းလင်းတင်ပြထားသည့် စာကို သွားရောက်ပေးအပ်ခဲ့သည်။
“ထောက်ခံပွဲမှာ လာရင်အဆင်သင့်ဖြစ်အောင် နိုင်ငံရေးပါတီတွေ၊ လူမှုရေးအဖွဲ့အစည်းတွေ ဆိုင်းဘုတ်ကိုကြိုလုပ် ထားပြီး ဘေးမှာ ချထားတယ်။ အဲဒီမှာ ရှမ်းတိုင်းရင်းသားများအဖွဲ့နဲ့ ရှမ်းတိုင်းရင်းသားများဒီမိုကရေစီ အဖွဲ့ချုပ်က စာက ရှမ်းတိုင်းရင်းသားများဆိုပြီးဆင်နေတော့ ယူကိုင်မိတာပေါ့။ သိသိချင်းပြန်လဲလိုက်ပါတယ်။ ဒီဆိုင်းဘုတ်ကိုကိုင်ပြီးတော့ မြို့ပတ်တာတော့မဟုတ်ဘူး။ ဒါပေမယ့်ကျွန်တော်တို့ရဲ့လစ်ဟင်းမှုအတွက် လာတောင်းတာပေါ့” ဟု ထောက်ခံပွဲဖြစ်မြောက်ရေး ကော်မတီဥက္ကဌ ဒေါက်တာမြင့်အောင်က ပြောသည်။
SNLD ပါတီအနေဖြင့် ထောက်ခံပွဲသို့ မတက်ရောက်ဘဲ ဆိုင်းဘုတ်ပါဝင်နေခြင်းအတွက်သာ ကန့်ကွက်ခြင်းဖြစ်ပြီး ထောက်ခံပွဲကို ကန့်ကွက်ပြောဆိုခြင်းမဟုတ်ကြောင်း တာချီလိတ်မြို့နယ် SNLD ပါတီ ဥက္ကဌ ဦးစိုင်းနွံတွီက ပြောသည်။
“ကျွန်တော်တို့ပါတီရဲ့ ပုံရိပ်ကို ထိခိုက်သလိုမျိုးဖြစ်သွားတဲ့အတွက် လာတောင်းပန်တာကို ဝမ်းသာပါတယ်” ဟု၎င်းက ပြောသည်။
ထောက်ခံပွဲကျင်းပရေးကော်မတီအနေဖြင့် အဆိုပါဖြစ်ရပ်ကြောင့် SNLDနှင့် NLD ပါတီနှစ်ခုကြား နားလည်မှုလွဲမှား နိုင်သဖြင့် SNLD ကိုတောင်းပန်သလို လိုအပ်ပါက NLD ပါတီကိုလည်း တောင်းပန်သွားမည် ဖြစ်ကြောင်း ထောက်ခံပွဲဖြစ်မြောက်ရေး ကော်မတီဥက္ကဌ ဒေါက်တာမြင့်အောင်က ထပ်လောင်းပြောသည်။
တာချီလိတ်မြို့တွင် နိုင်ငံတော်အတိုင်ပင်ခံနှင့်အဖွဲ့ ထောက်ခံပွဲကို ဒီဇင်ဘာလ ၁၀ရက်က ပြုလုပ်ခဲ့သည့် ဘာသာပေါင်းစုံ၊ တိုင်းရင်းသားပေါင်းစုံမှ လူ ၅၀၀ခန့် ပါဝင်ခဲ့သည်။
MK-001
