တာချီလိတ်၊ ဒီဇင်ဘာ ၁၃
မိုင်းကိုးကျေးရွာအုပ်စုအတွင်းရှိ ကျေးရွာ ၂ရွာမှ လယ်သမား ၃၀ကျော် မှီခိုနေသည့် မယ်ဖုံးလုံလက်ရိုက်ဆည်ကို ရေရှည်ခိုင်ခံသော စိုက်ပျိုးရေးဆည်တမံ တည်ဆောက်နိုင်ရေးအတွက် ဆည်ဖြစ်မြောက်ရေးကော်မတီကို တာချီလိတ်မြို့နယ်တွင် ဒီဇင်ဘာလ ၁၁ရက်က ဖွဲ့စည်းလိုက်ကြောင်း သိရသည်။
မယ်ဖုံးလုံရွာနှင့်မုံးမိုင်းရွာများမှ တောင်သူ (၃၄)ဦး၏ လယ်ဧက ၈၇ ဒဿမ ၅၃ဧက အတွက် စိုက်ပျိုးရေအသုံးပြုသည့် မယ်ဖုံးလုံဆည်မှာ မိုးသည်းထန်စွာရွာသွန်းသည့်အခါ ဆည်ကျိုးပေါက်သဖြင့် တောင်သူများ စိုက်ပျိုးရေလုံလောက်စွာမရရှိခြင်း၊ စပါးထွက်နှုန်းကျဆင်းခြင်းများ ဖြစ်ပေါ်နေသဖြင့် ခိုင်ခံသည့် စိုက်ပျိုးရေဆည်တမံဖြစ်ပေါ်လာရေး တင်ပြသဖြင့် ယခုကဲ့သို့ ဆည်ဖြစ်မြောက်ရေးကော်မတီကို ဖွဲ့စည်းဆောင်ရွက်ခြင်းဖြစ်ကြောင်း ဆည်ဖြစ်မြောက်ရေးကော်မတီမှ သိရသည်။
“ကျွန်တော်တို့ လာမယ့် ဒီဇင်ဘာလ တတိယပတ်အတွင်းမှာ စတင်ပြီး ကွင်းဆင်းဆောင်ရွက်ပါမယ်” ဟု ဆည်ဖြစ်မြောက်ရေးကော်မတီဝင်ဦးမင်းအောင်က ပြောသည်။
အဆိုပါဆည်ဖြစ်မြောက်ရေးကော်မတီတွင် ဥက္ကဌအဖြစ် တာချီလိတ်မြို့နယ် ဆည်မြောင်းဦးစီးဌာန၊ ဦးစီးအရာရှိ ဦးဟန်ထွန်းက ဥက္ကဌ၊ တာချီလိတ်မြို့နယ် စိုက်ပျိုးရေးဦးစီးဌာန ဦးစီးအရာရှိ ဦးစိုင်းခင်ဇော်လတ်က အတွင်းရေးမှူးအဖြစ် ပါဝင်ပြီး ရပ်ကျေးသူကြီးများအပါအဝင် အဖွဲ့ဝင် ၁၁ဦးပါဝင်ကြောင်းသိရသည်။
MK – 001
