ဟောင်ကောင်၊ ဖေဖော်ဝါရီ ၄

တရုတ်နိုင်ငံဟူဘေးပြည်နယ်၊ ဝူဟန်မြို့မှာစတင်တွေ့ရှိပြီး ကူးစက်နေသည့် နိုဗယ်ကိုရိုနာဗိုင်းရပ်စ်ကြောင့် တရုတ်ပြည်မကြီးပြင်ပတွင် ဒုတိယမြောက်လူသေဆုံးမှုရှိလာသည်။

အသက် ၃၇ နှစ်အရွယ်အမျိုးသားတစ်ဦး ဗိုင်းရပ်စ်ကူးစက်ပြီးနောက် ဆေးရုံတွင်ကုသမှုခံနေစဉ် ရုတ်တရက်နှလုံးရပ်သေဆုံးခဲ့ကြောင်း ဟောင်ကောင်မီဒီယာများတွင်ဖော်ပြသည်။

ထိုအမျိုးသားမှာ ဟောင်ကောင်တွင် ၁၃ ယောက်မြောက်အတည်ပြုနိုင်သည့်ကူးစက်ခံရသူဖြစ်ပြီး ဇန်နဝါရီ ၃၁ ရက်တွင် ဗိုင်းရပ်စ်ကူးစက်နေကြောင်းတွေ့ရှိခဲ့ရခြင်းဖြစ်သည်။

အဂ်ါ​နေ့လည်တွင် ​​ဟောင်ကောင်ကျန်းမာရေးနှင့်ဆေးရုံအာဏာပိုင်ဌာနက ပြုလုပ်မည့်သတင်းစာရှင်းလင်းပွဲတွင် အသေးစိတ်အချက်အလက်များကြေညာမည်ဟုလည်း ဟောင်ကောင်မီဒီယာများကဖော်ပြသည်။

တနဂ်နွေနေ့တုန်းကလည်း ဝူဟန်မြို့မှရောက်လာသည့်လူနာတစ်ဦး ဖိလစ်ပိုင်နိုင်ငံတွင်သေဆုံးခဲ့ပြီး တရုတ်ပြည်မကြီးပြင်ပတွင် ဗိုင်းရပ်စ်ကြောင့် ပထမဆုံးသေဆုံးမှုဖြစ်သည်။

တရုတ်ပြည်မကြီးမှဟောင်ကောင်သို့ဝင်ပေါက် ၁၃ ပေါက်မှ ၁၀ ပေါက်ကိုပိတ်သိမ်းပြီး ဗိုင်းရပ်စ်ကူးစက်မှုကိုထိန်းချုပ်မည်ဖြစ်ကြောင်း တနလ်ာနေ့တွင် ဟောင်ကောင်ခေါင်းဆောင်ကာရီ လမ်ကကြေညာခဲ့သည်။

ယနေ့အထိ ဝူဟန်ဗိုင်းရပ်စ်ကြောင့် သေဆုံးသူ ၄၂၅ ယောက်ရှိလာပြီး ကူးစက်ခံရသူ ၂၄၀၀၀ ကျော်ရှိလာသည်။

နောက်ထပ်နိုင်ငံနှင့်ဒေသ ၂၃ ခုတွင်လည်း ကူးစက်မှု ၁၅၁ ခုရှိနေသည်။

Source- HongKong Free Press
#ဥက္ကာ #MeKongNews
Photo- HongKong Free Press

တာချီလိတ်၊ ဖေဖော်ဝါရီ ၂

ဝူဟန်ဗိုင်းရပ်စ် ရောဂါဖြစ်ပွားမှု အခြေအနေနှင့် နောက်ဆုံးရ သတင်းအချက်အလက်များကို ပြုစုပြီး နေ့စဉ် နံနက် (၁၀)နာရီ မတိုင်မီ အများပြည်သူသိရှိအောင် ထုတ်ပြန်ပေးရန် ကျန်းမာရေးနှင့် အားကစားဝန်ကြီး ဒေါက်တာမြင့်ထွေးက မှာကြားခဲ့ကြောင်း သိရသည်။
ဖေဖော်ဝါရီလ ၂ရက် ညနေပိုင်းက ကျင်းပသည့် အဆုတ်ရောင်ရောဂါ စောင့်ကြပ်ကြည့်ရှုရေးနှင့် ကာကွယ်ထိန်းချုပ်ရေး ဗဟိုအဆင့် နေ့စဉ် ညှိနှိုင်းအစည်းအဝေး (၆/၂၀၂၀)တွင် လမ်းညွှန်မှာကြားခဲ့ခြင်း ဖြစ်ကြောင်း ကျန်းမာရေးနှင့် အားကစားဝန်ကြီးဌာနက ထုတ်ပြန်သည်။အစည်းအဝေး၌ ပြည်ထောင်စုဝန်ကြီး က လမ်းညွှန်ပြောကြားရာတွင် –
• ယခု ဖြစ်ပွားနေသော အဆုတ်ရောင်ရောဂါ ဖြစ်ပွားမှုနှုန်းသည် တရုတ်ပြည်သူ့သမ္မတနိုင်ငံ၌ နေ့စဉ်ဆက်လက်မြင့်မားနေသည်ကို တွေ့ရှိရသည့်အတွက် ရောဂါကာကွယ်ရေးနှင့် ထိန်းချုပ်ရေးတို့ကို ကျန်းမာရေးနှင့်အားကစားဝန်ကြီးဌာန၏ “ပထမဦးစားပေးအရေးပေါ်” ကိစ္စရပ် (top priority emergency issue) အနေဖြင့် အထူးဂရုပြု၍ အားထုတ်ဆောင်ရွက်ရန်၊
• လုပ်ငန်းများ ဆောင်ရွက်ရာတွင် စနစ်တကျ ချိန်သားကိုက်ပူးပေါင်းချိတ်ဆက်ဆောင်ရွက်မှု (systematic and synchronized coordination) များ ပိုမိုကောင်းမွန်စွာဆောင်ရွက်ရန်၊
• လုပ်ငန်းကဏ္ဍအလိုက်နှင့် သက်ဆိုင်ရာတာဝန်ရှိသူများ၊ ပြည်သူ့ကျန်းမာရေးနှင့်ကုသရေးဦးစီးဌာနအောက်ရှိ သက်ဆိုင်ရာဌာနခွဲများ၊ ဥပမာ – ဗဟိုကူးစက်ရောဂါတိုက်ဖျက်ရေးဌာနခွဲ၊ အမျိုးသားကျန်းမာရေးဆိုင်ရာဓာတ်ခွဲဌာန၊ ကျန်းမာရေးအသိပညာမြှင့်တင်ရေးဌာနခွဲ၊ ဝေဘာဂီအထူးကုဆေးရုံ၊ ဆေးပညာ ပါမောက္ခများ၊ ကူးစက်ရောဂါပါမောက္ခများ၊ ကူးစက်ရောဂါဗေဒပညာရှင်များသည် လုပ်ငန်းတာဝန်ခွဲဝေဆောင်ရွက်မှု (division of labour) ကို တိကျစွာသတ်မှတ်ဆောင်ရွက်ရန်,
• ဆက်သွယ်မှုလမ်းကြောင်း (line of communication) ကို တိကျရှင်းလင်းပြတ်သားစွာ ချမှတ်ဆောင်ရွက်ရန်၊ ဤကိစ္စသည် အထူးအရေးကြီးပါကြောင်း၊ သို့မဟုတ်ပါက သတင်းများ တစ်ခုနှင့် တစ်ခုတူညီမည်မဟုတ်ဘဲ ပြည်သူများ ရှုပ်ထွေးမှုဖြစ်စေခြင်း၊ မလိုလားအပ်သော ကိစ္စများနားလည်မှုလွဲခြင်းများ ဖြစ်ပေါ်နိုင်ပါကြောင်း၊
• တိုင်းဒေသကြီး/ ပြည်နယ်ပြည်သူ့ကျန်းမာရေးနှင့်ကုသရေးဦးစီးဌာနများ၊ အပြည်ပြည် ဆိုင်ရာလေဆိပ်များမှ ကျန်းမာရေးဌာနများ၊ နယ်စပ်ဝင်၊ ထွက်ပေါက်များမှ ကျန်းမာရေး တာဝန်ရှိသူများသည် ဗဟိုကူးစက်ရောဂါတိုက်ဖျက်ရေးဌာနခွဲ (CEU) သို့ နေ့စဉ်၊ နံနက် (၁၀) နာရီမတိုင်မီ သတင်းပေးပို့ရန်၊
• တိုင်းဒေသကြီး/ ပြည်နယ်များတွင် ကျန်းမာရေးအသိပညာပေးနှိုးဆော်မှုလုပ်ငန်းများ ကို သက်ဆိုင်ရာ တိုင်းဒေသကြီး/ ပြည်နယ် ပြည်သူ့ကျန်းမာရေးနှင့်ကုသရေးဦးစီးဌာန၊ ဒုတိယ ညွှန်ကြားရေးမှူးချုပ်နှင့် ညွှန်ကြားရေးမှူးများကို အတိအကျဆောင်ရွက်ရန်ကိစ္စများကို ညွှန်ကြားထားပြီးဖြစ်သဖြင့် ၎င်းအတိုင်း ဆောင်ရွက်မှုရှိ၊ မရှိကို နေ့စဉ် သုံးသပ်ရန်၊• တိုင်းဒေသကြီး/ ပြည်နယ်ပြည်သူ့ကျန်းမာရေးနှင့်ကုသရေးဦးစီးဌာနများ၊ အပြည်ပြည်ဆိုင်ရာလေဆိပ်များမှ ကျန်းမာရေးဌာနများ၊ နယ်စပ်ဝင်၊ ထွက်ပေါက်များမှ ကျန်းမာရေးတာဝန်ရှိသူများအနေဖြင့် နေ့စဉ်၊ နံနက် (၁၀) နာရီထက် နောက်မကျစေဘဲ ဗဟိုကူးစက်ရောဂါတိုက်ဖျက်ရေးဌာနခွဲ (Central Epidemiological Unit) သို့ ပေးပို့ရန် ညွှန်ကြားထားပြီးဖြစ်သဖြင့် ညွှန်ကြားချက်အတိုင်း တိကျစွာလိုက်နာရန်၊
• သို့ဖြစ်၍ ၎င်းတို့မှ ပေးပို့သော သတင်းများကို ဗဟိုကူးစက်ရောဂါတိုက်ဖျက်ရေးဌာနခွဲ (Central Epidemiological Unit) မှ ဆန်းစစ်သုံးသပ် (analysis)ပြုလုပ်ပြီး နေ့စဉ် နံနက်တိုင်းပြုလုပ်သည့် ပြည်ထောင်စုဝန်ကြီး ဦးဆောင်သော အစည်းအဝေး၌ တင်ပြရန်နှင့် အချိန်နှင့်တစ်ပြေးညီ ဆောင်ရွက်ရမည့်ကိစ္စများရှိလျှင်လည်းကောင်း၊ အရေးကြီးသော သတင်းအချက်အလက်များ ထောက်လှမ်းသိရှိရပါကလည်းကောင်း ပြည်ထောင်စုဝန်ကြီးထံသို့ တိုက်ရိုက် သတင်းပေးပို့ရန်၊
• ရောဂါစောင့်ကြပ်ကြည့်ရှုမှုလုပ်ငန်းများကို အရှိန်အဟုန်ဖြင့် ဆောင်ရွက်နေသည်ဖြစ်၍ အပြည်ပြည်ဆိုင်ရာလေဆိပ်များရှိ ကျန်းမာရေးဌာနများတွင် အဆိုင်းလိုက် အလှည့်ကျ တာဝန်ထမ်းဆောင်နိုင်ရေး အခြားဌာနခွဲများမှ ဝန်ထမ်းများကို ထပ်မံအားဖြည့်တာဝန်ပေးရမည်ဖြစ်ပါကြောင်း၊ ဤကိစ္စကို ပြည်ထောင်စုဝန်ကြီးရုံး၊ ညွှန်ကြားရေးမှူးချုပ်မှ ယနေ့ပင် အမိန့်ညွှန်ကြားချက်ထုတ်ရန်၊
• ဗဟိုကူးစက်ရောဂါတိုက်ဖျက်ရေးဌာနခွဲ (CEU) အနေဖြင့် တရုတ်ပြည်သူ့သမ္မတနိုင်ငံ၊ ဟူပေပြည်နယ်၊ ဝူဟန်မြို့မှ ပြန်လည်ရောက်ရှိလာပြီး သီးခြားထားရှိ စောင့်ကြပ်ကြည့်ရှုမှုဆောင်ရွက်နေသည့် မြန်မာနိုင်ငံသားပညာသင်ဦး (၅၉) ဦး၏ ကျန်းမာရေးအခြေအနေများကို နေ့စဉ် (၂) ကြိမ် သတင်းရယူ၍ ပြည်ထောင်စုဝန်ကြီးနှင့် အမြဲတမ်းအတွင်းဝန်၊ ညွှန်ကြားရေးမှူးချုပ် (ပြည်ထောင်စုဝန်ကြီးရုံး) သို့သတင်းပေးပို့ရန်၊
• ဗဟိုကူးစက်ရောဂါတိုက်ဖျက်ရေးဌာနခွဲ (CEU) အနေဖြင့် နေ့စဉ် ဆက်သွယ်ရေးကွန်ရက် (တယ်လီဖုန်း၊ အင်တာနက်) ကို အသုံးပြု၍ ဌာနတွင်း တိုင်ပင်ဆွေးနွေးချိတ်ဆက်မှုများ၊ လုပ်ငန်းဆန်းစစ် သုံးသပ်မှုများ ဆောင်ရွက်ရန်၊
• ရောဂါဖြစ်ပွားမှုအခြေအနေများနှင့် လက်ရှိနောက်ဆုံး သတင်းအချက်အလက်များကို ပြုစု၍ ပြည်သူများသိရှိရန် နေ့စဉ်၊ နံနက် (၁၀) နာရီမတိုင်မီ ထုတ်ပြန်ပေးရန်၊
• နိုင်ငံတော်သမ္မတရုံးသို့ နေ့စဉ်သတင်းပေးပို့နိုင်ရေးအတွက် ပြည်ထောင်စုဝန်ကြီးထံသို့ မူဝါဒနှင့် ကျွမ်းကျင်မှုပိုင်းဆိုင်ရာမှ တည်းဖြတ်ပေးရန်အတွက် အမြန်ဆုံးတင်ပြရန်၊• ဗဟိုကူးစက်ရောဂါတိုက်ဖျက်ရေးဌာနခွဲ (CEU) အနေဖြင့် ထူးခြားဖြစ်စဉ် သတင်းများကို ဝန်ကြီးဌာန၏ အင်တာနက်စာမျက်နှာမှ ပြည်သူများထံ အချိန်နှင့်တစ်ပြေးညီ ထုတ်ပြန်ပေးရန်ဖြစ်ပါကြောင်း၊ ဤကိစ္စကို ဝန်ကြီးဌာန eHealth ဌာနမှ တာဝန်ရှိသူများက ပြည်ထောင်စုဝန်ကြီးရုံးနှင့် ဆက်သွယ်၍ ဆောင်ရွက်ရန်၊
• အခြေခံကျန်းမာရေးဝန်ထမ်းပညာရှင်များနှင့် မြန်မာနိုင်ငံကြက်ခြေနီအသင်း၊ မြန်မာနိုင်ငံ ကျန်းမာရေးမှူးအသင်း၊ မြန်မာနိုင်ငံ သူနာပြုနှင့်သားဖွားအသင်း အပါအဝင် နှီးနွှယ်အဖွဲ့များသို့ ရောဂါဆိုင်ရာ ကျန်းမာရေးအသိပညာအချက်အလက်များ၊ ပြည်သူများမှ ပူးပေါင်းပါဝင် လိုက်နာဆောင်ရွက်နိုင်သည့် အချက်များကို ဖြန့်ဝေပေးအပ်ရန်၊ အခြေခံကျန်းမာရေးဝန်ထမ်း ပညာရှင်များနှင့် နှီးနွှယ်အဖွဲ့များအနေဖြင့် အဆိုပါ အချက်အလက်များကို ပြည်သူများထံ ကျယ်ကျယ်ပြန့်ပြန့် ဖြန့်ဝေပေးရန်၊
• ကျွမ်းကျင်မှုပိုင်းဆိုင်ရာနှင့် ပတ်သက်၍ ပြောကြားလိုသည်မှာ ယခုတရုတ်ပြည်သူ့ သမ္မတနိုင်ငံနှင့် အခြားနိုင်ငံများပညာရှင်များမှ ယခုရောဂါဖြစ်ပွားမှုကို ကွန်ပျူတာဖြင့် မျှော်မှန်းတွက်ချက်ခြင်း (modelling and simulation) လုပ်ဆောင်ရာ၌ ရောဂါဖြစ်ပွားသူတစ်ဦးထံမှ အခြားသူများထံကူးစက်ပျံ့ပွားနိုင်မှု အခြေခံနှုန်း (basic reproduction number (R0)) တန်ဖိုးသည် အချို့ပညာရှင်များက (၂.၂) ခန့်ဟုခန့်မှန်းခဲ့ရာမှ ယခုအခါ အချို့ပညာရှင်များက (၄.၀၃) အထိရှိနိုင်သည်ဟု ခန့်မှန်းထားသည် ဖြစ်သည့်အတွက် ကူးစက်ပျံ့ပွားမှု ပိုမိုမြန်ဆန်နိုင်သည်ကို အထူးသတိပြုရမည်ဖြစ်ပါကြောင်း၊ သို့အတွက် ကမ္ဘာ့ကပ်ရောဂါအသွင် (pandemic situation) သို့ ရောက်ရှိသွားနိုင်ပါကြောင်း၊
• ယခုအချိန်၌ မိမိတို့နိုင်ငံတွင် ဓာတ်ခွဲအတည်ပြု လူနာများ မရှိသေးသော်လည်း မိမိတို့သည် လူနာများ ရှိသကဲ့သို့ သဘောထား၍ လုပ်ငန်းများကို ဆောင်ရွက်ရန်၊
• အပြည်ပြည်ဆိုင်ရာ လေဆိပ် (၃) ခုနှင့် တိုင်းဒေသကြီး/ ပြည်နယ် (၄)ခုမှ မြို့နယ် (၁၀) မြို့နယ်ရှိ ဝင်ထွက်သွားလာနေမှုများသည် အရေးကြီးသဖြင့် ဤကိစ္စကို အမြဲတမ်းအတွင်းဝန်မှ သက်ဆိုင်ရာဝန်ကြီးဌာနများနှင့် မည်သို့ဆောင်ရွက်နေသည်ကို အမြန်ဆုံးသုံးသပ်၍ ယခုထက်ပိုမိုထိရောက်မြန်ဆန်စေရန် ဆွေးနွေးပြီး ပြည်ထောင်စုဝန်ကြီးထံ အမြန်ဆုံးတင်ပြရန်၊
• တိုင်းဒေသကြီး/ ပြည်နယ်များတွင် လွန်ခဲ့သော (၁၄) ရက်အတွင်း တရုတ်ပြည်သူ့သမ္မတ နိုင်ငံသို့ ခရီးသွားရာဇဝင်ရှိသူများရှာဖွေစုံစမ်း၍ ရောဂါစောင့်ကြပ်ကြည့်ရှုရန်၊
• လုပ်ငန်းများဆောင်ရွက်ရာတွင် ဝန်ကြီးဌာနရှိ ဌာနပေါင်းစုံမှ ပါဝင်ဆောင်ရွက်ရန်၊
• ယခုအချိန်သည် အရေးကြီးသော အချိန်ကာလဖြစ်သဖြင့် ရောဂါနှိမ်နင်းရေးသာမက ပြည်သူ့ကျန်းမာရေးဝန်ထမ်းများကိုပါ အားဖြည့်တာဝန်ချထားပြီး အားလုံးညီညွတ်စွာဆောင်ရွက်ရမည် ဖြစ်ပါကြောင်း၊ ဗဟိုကူးစက်ရောဂါတိုက်ဖျက်ရေးဌာနခွဲ (CEU) သို့ အခြားဌာနများမှ ဝင်ရောက် ပူးပေါင်းကာလုပ်ငန်းများ ဆောင်ရွက်ရန်၊
• ဤရောဂါသည် လူစုလူဝေးများပြားသည့် ပွဲလမ်းသဘင်များတွင် ပိုမိုကူးစက်ပျံ့ပွားနိုင်သည်ဖြစ်၍ ပွဲလမ်းသဘင်များကို ယခုကာလအတွင်း တတ်နိုင်သမျှလျေှာ့ချခြင်းဖြင့် ရောဂါကူးစက်ပျံ့ပွားမှုများကို ကာကွယ်လျှော့ချနိုင်မည်ဖြစ်သည်ဆိုသည့် အချက်သည် အလေးအနက်ထား ထည့်သွင်းစဉ်းစားရမည့်အချက်ဖြစ်ပါကြောင်း၊
• ယခုကဲ့သို့ နေ့စဉ် လုပ်ငန်းဆန်းစစ်သုံးသပ်မှု၊ ဆွေးနွေးတိုင်ပင်အကြံပြုမှုများဆောင်ရွက်ရာတွင် ပြည်သူ့ကျန်းမာရေးတက္ကသိုလ် (ရန်ကုန်)၊ ကပ်ရောဂါဗေဒဌာနမှ ပါဝင်ပြီး ဖြစ်စဉ်အခြေအနေအရပ်ရပ်ကို သုံးသပ်၍ ကပ်ရောဂါဗေဒရှုထောင့်မှ ဆွေးနွေးအကြံပြုချက်များပေးအပ်ရန်၊
• ဝေဘာဂီအထူးကုဆေးရုံကြီးရှိ ဆောက်လုပ်ဆဲ (၂) ထပ်လူနာဆောင်သစ်နှင့် (၃) ထပ်လူနာဆောင်သစ်များ အမြန်ဆုံး ဆောက်လုပ်ပြီးစီးရေးအတွက်စီစဉ်ဆောင်ရွက်ရန်နှင့် ဝန်ကြီးဌာနမှ လိုအပ်သည်များကို ပံ့ပိုးဆောင်ရွက်မည်ဖြစ်ပါကြောင်း၊
• 2019 Novel Coronavirus (2019-nCoV) ကြောင့်ဖြစ်ပွားသော အဆုတ်ရောင်ရောဂါနှင့်ပတ်သက်၍ ဝန်ကြီးဌာနများ ပေါင်းစပ်ညှိနှိုင်းဆက်သွယ်ရေးကော်မတီ အစည်းအဝေးကို အပတ်စဉ်ပြုလုပ် ဆောင်ရွက်ရန်၊
• ပုဂ္ဂလိက ဆေးရုံ၊ ဆေးခန်းများတွင် 2019 Novel Coronavirus (2019-nCoV) ကြောင့်ဖြစ်ပွားသော အဆုတ်ရောင်ရောဂါ သံသယလက္ခဏာများတွေ့ရှိပါက မဖြစ်မနေသတင်းပေးပို့ရေး (mandatory reporting) အတွက် တည်ဆဲ ဥပဒေများနှင့် အညီဆောင်ရွက်သွားနိုင်ရေးကို ထည့်သွင်းစဉ်းစားရန်၊
• အထက်ပါကိစ္စရပ်များအားလုံးကို ထည့်သွင်းစဉ်းစားရန်နှင့် ယနေ့မိမိလမ်းညွှန်မှာကြားချက်များကို တိကျစွာ အမြန်ဆုံး ဆောင်ရွက်ရန် ပြောကြားခဲ့ကြောင်း သိရသည်။#MeKongNews

မနီလာ၊ ဖေဖော်ဝါရီ ၂

တရုတ်နိုင်ငံပြင်ပမှာ ဝူဟန်ကိုရိုနာဗိုင်းရပ်စ်2019-nCoVကြောင့် လူသေဆုံးတဲ့ပထမဆုံးနိုင်ငံ ဖိလစ်ပိုင်ဖြစ်လာကြောင်းကမ္ဘာ့ကျန်းမာရေးအဖွဲ့ (W.H.O)က တနဂ်နွေနေ့မှာထုတ်ပြန်သည်။

သေဆုံးသူသည် ဗိုင်းရပ်စ်စတင်ပြန့်နှံ့ခဲ့တဲ့ဝူဟန်မြို့မှာနေထိုင်​သောအသက် ၄၄ နှစ်အရွယ်တရုတ်အမျိုးသားဖြစ်သည်။

သေဆုံးသူဟာ ဗိုင်းရပ်စ်ကူးစက်ခံရတယ်လို့ ဖိလစ်ပိုင်မှာ ဒုတိယမြောက်အတည်ပြုနိုင်သူဖြစ်ပြီး စနေနေ့တွင်သေဆုံးခဲ့ကြောင်းဖိလစ်ပိုင်နိုင်ငံဆိုင်ရာ W.H.O ကိုယ်စားလှယ် Rabindra Abeyasingheကပြောသည်။

ဖိလစ်ပိုင်ကျန်းမာရေးအရာရှိတစ်ယောက်ကလည်း တနဂ်နွေနေ့သတင်းစာရှင်းလင်းပွဲမှာ သေဆုံးမှုကိုအတည်ပြုသည်။

တနဂ်နွေနေ့မနက်ပိုင်းတရုတ်အစိုးရရဲ့ထုတ်ပြန်ချက်တွေအရ ဗိုင်းရပ်စ်ကြောင့် တရုတ်နိုင်ငံမှာသေဆုံးသူ ၃၀၄ ယောက်ရှိလာပြီး ကူးစက်ခံရသူ ၁၄၃၀၀ ကျော်လာကြောင်းသိရသည်။

Source- AFP
#ဥက္ကာ #MeKongNews
Photo- People’s Daily China

ဘေကျင်း၊ ဖေဖော်ဝါရီ ၂

ဝူဟန်ဗိုင်းရပ်စ်ကြောင့် သေဆုံးသူအရေအတွက်မှာ ဖေဖော်ဝါရီလ ၁ရက် ညပိုင်းအထိ ၄၃ဦးတိုးလာပြီး သေဆုံးသူ စုစုပေါင်း ၃၀၄ဦးရှိလာပြီဖြစ်ကြောင်း တရုတ်ဆေးဘက်ဆိုင်ရာ အရာရှိများက ပြောသည်။

ရောဂါကူးစက်ခံရသူ အရေအတွက်မှာလည်း ဟူဘေးခရိုင်တစ်ခုထဲတွင် ၂၀၀၀ခန့်တိုးလာပြီး စုစုပေါင်း ၁၄၃၀၀ ဦး ကူးစက်ခံထားရသည်။

ဗြိတိန်၊ ဆွီဒင်နှင့် ရှရုနိုင်ငံများတွင် ရောဂါကူးစက်ခံထားရသူများတွေ့ရှိလာသည်။

Source-CNA
#MeKongNews

​ဘေကျင်း၊ ဖေဖော်ဝါရီ ၁

လူအသေအပျောက်များနေသည့် ကိုရိုနာဗိုင်းရပ်စ်ကူးစက်မှုကို တရုတ်နိုင်ငံတုံ့ပြန်ပုံနှေးခဲ့တာကြောင့် ကူးစက်မှုပို​မြန်ခဲ့ကြောင်း ဝူဟန်မြို့အကြီးဆုံးအရာရှိ ကွန်မြူနစ်ပါတီမြို့တော်အတွင်းရေးမှူးက သောကြာနေ့တွင် ဝန်ခံခဲ့သည်။

ဇန်နဝါရီ ၃၁ ရက်အထိ ဗိုင်းရပ်စ်ကြောင့် တရုတ်နိုင်ငံမှာ သေဆုံးသူ ၂၅၉ ယောက်ရှိနေပြီး ကူးစက်ခံထားရသူ ၁၁၇၉၁ ယောက်ရှိနေသည်။

ဇန်နဝါရီ ၃၀ ရက်ထက် သေဆုံးသူ ၄၆ ယောက်ပိုများလာပြီး ချုံကင်းကလူတစ်ယောက်မှအပ ထပ်တိုးသေဆုံးသူအားလုံး ဝူဟန်ကဖြစ်သည်။

ဗိုင်းရပ်စ်စပြန့်တဲ့ဝူဟန်မြို့မှာ ကျန်းမာရေး အရေးပေါ်အခြေအနေကိုင်တွယ်တဲ့ပုံစံကို တရုတ်နိုင်ငံသားတွေက လူမှုကွန်ရက်မှာဝေဖန်နေကြသည်။

သီတင်းပတ်တွေပိုစောပြီး ဗိုင်းရပ်စ်ကူးစက်မှုကိုသိပေမဲ့ ၂၀၁၉ နှစ်ကုန်အထိ ကူးစက်မှုနဲ့ပတ်သက်တဲ့သတင်းအချက်အလက်တွေကိုဖုံးဖိထားတယ်ဆိုပြီး ဝူဟန်အာဏာပိုင်တွေကို ဝေဖန်နေကြခြင်းဖြစ်သည်။

လက်ရှိမှာ အပြစ်ရှိသလိုခံစားနေရပြီး ကိုယ့်ကိုယ်ကိုအပြစ်တင်မိတယ်လို့ ပါတီအတွင်းရေးမှုမာဂေါင်ကျွင်းက ပြောပါသည်။

ပိုတင်းကြပ်တဲ့ထိန်းချုပ်ရေးလုပ်ငန်းစဉ်တွေလုပ်ခဲ့ရင် အခုထက်ရလဒ်ပိုကောင်းနေမယ်လို့လည်း တရုတ်အစိုးရပိုင်CCTVရုပ်သံနဲ့တွေ့ဆုံမေးမြန်းချိန်မှာ မာကပြောပါသည်။

ဇန်နဝါရီ ၂၃ ရက်ကစပြီး လူ ၅၆ သန်းလောက်နေထိုင်ကြ​သော ဝူဟန်နဲ့ ဟူဘေးပြည်နယ်ကပတ်ဝန်းကျင်မြို့များကို ဝင်ထွက်ခွင့်ပိတ်ထားသည်။

သို့​သော် အမေရိကန်တွင် အများပြည်သူဆိုင်ရာကျန်းမာရေးအရေးပေါ်အခြေအနေကြေညာပြီး တရုတ်နိုင်ငံသား​တွေကိုဝင်ခွင့်ပိတ်လိုက်တဲ့အပြင် အဓိကအမေရိကန်လေကြောင်းလိုင်းတွေကလည်း တရုတ်နိုင်ငံခရီးစဉ်တွေ ဖျက်သိမ်းလိုက်ပါသည်။

စနေနေ့မနက်ပိုင်းမှာ အိန္ဒိယနိုင်ငံသား ၃၀၀ ကျော်ကိုတင်သွားတဲ့လေယာဉ် ဝူဟန်မြို့မှ နယူးဒေလီမြို့ကိုထွက်ခွာသွားသည်။

စပိန်နိုင်ငံတွင်လည်း ကူးစက်မှုရှိနေသည်။

Source- Agencies

ဥက္ကာ #MeKongNews

Photo- People’s Daily China

နေပြည်တော်၊ ဖေဖော်ဝါရီ ၁

မြန်မာနိုင်ငံသို့လာရောက်မည့် တရုတ်နိုင်ငံမှ ကမ္ဘာလှည့်ခရီးသွားများအား ဆိုက်ရောက်ဗီဇာထုတ်ပေးခြင်းကို ယာယီရပ်ဆိုင်းလိုက်ကြောင်း နိုင်ငံခြားရေးဝန်ကြီးဌာနက ဖေဖော်ဝါရီလ ၁ရက်တွင် သတင်းထုတ်ပြန်လိုက်သည်။

တရုတ်ပြည်သူ့သမ္မတနိုင်ငံ ဟူပေပြည်နယ်၊ ဝူဟန်မြို့မှ စတင်ဖြစ်ပွားခဲ့သည့် 2019 CoronaVirus (2019n-CoV) ကြောင့် အဆုတ်ရောင်ရောဂါ ကူးစက်ပြန့်ပွားမှုနှင့် ပတ်သက်၍ ကမ္ဘာ့ကျန်းမာရေးအဖွဲ့ကြီး (WHO) မှ ကမ္ဘာလုံးဆိုင်ရာ အရေးပေါ်အခြေအနေအဖြစ် ဇန်နဝါရီလ ၃၀ ရက်နေ့မှ စတင်၍ ကြေညာခဲ့ပြီး မလိုအပ်ဘဲ ခရီးသွားလာခြင်း မပြုရန်နှင့် ကာကွယ်ကုသထိန်းချုပ်ရေး လုပ်ငန်းများ တိုးမြှင့်ဆောင်ရွက်ကြရန် ထုတ်ပြန်ခဲ့သည်။

ယင်းသို့ ဗိုင်းရပ်စ် ကူးစက်ပြန့်ပွားမှု အထူးစိုးရိမ်ဖွယ်ရာ အခြေအနေသို့ ရောက်ရှိလာခြင်းကြောင့် လည်းကောင်း၊ မြန်မာနိုင်ငံ ပြည်သူပြည်သားများ၏ ကျန်းမာရေးအတွက် ယင်းကူးစက်ရောဂါကို ကာကွယ်ထိန်းချုပ်ရန်အတွက် လည်းကောင်း တရုတ်ပြည်သူ့သမ္မတနိုင်ငံမှ မြန်မာနိုင်ငံသို့ လာရောက်ကြမည့် ကမ္ဘာလှည့်ခရီးသွားများအား ဆိုက်ရောက်ဗီဇာ (Visa on Arrival) ထုတ်ပေးခြင်းကို ယာယီရပ်ဆိုင်းထားရန် သက်ဆိုင်ရာဌာနများသို့ ယနေ့ အကြောင်းကြားထားခဲ့ပြီး ဖြစ်ပါကြောင်း အသိပေး ဖော်ပြအပ်ပါသည် ဟု နိုင်ငံခြားရေးဝန်ကြီးဌာနက ထုတ်ပြန်သည်။

#MeKongNews

စင်ကာပူ၊ ဇန်နဝါရီ ၃၁

ဗိုင်းရပ်စ်များကာကွယ်ရန် လူများ နှာခေါင်းစည်းများမှားယွင်းအသုံးပြုပါက လုံခြုံသည်ဟုမှားယွင်းခံစားရနိုင်ကြောင်း ဆေးပညာကျွမ်းကျင်သူများက အသိပေးသည်။

ဝူဟန်ဗိုင်းရပ်ဟ်ကမ္ဘာအနှံ့ပြန့်ပွားမှုကြောင့် နှာခေါင်းစည်း၀ယ်ယူအသုံးပြုသူများနေချိန်တွင် အသိပေးခြင်းဖြစ်သည်။

တခြားသူများကို ကာကွယ်ရန် နေမကောင်းသူများနှင့် ချောင်းဆိုးသူများသာ နှာခေါင်းစည်းများတပ်ဆင်အသုံးပြုသင့်ကြောင်း ကမ္ဘာ့ကျန်းမာရေးအဖွဲ့ (W.H.O)၏ မလေးရှား၊ ဘရူနိုင်းနှင့်စင်ကာပူနိုင်ငံများမစ်ရှင်နှင့်ကိုယ်စားပြုခေါင်းဆောင် ဒေါက်တာဂျက်ကလင်း ယင်ယူလိုကပြောသည်။

“နှာခေါင်းစည်း၀တ်တာအပြင် လုပ်နိ်ုင်တာတွေအများကြီးရှိတယ်။ လုပ်ရမယ့်အရာတွေအများကြီးရှိတယ်”ဟု CANသတင်းဌာနကို ဒေါက်တာယင်ကပြောသည်။

“နှာခေါင်းစည်း၀တ်ထားတာကပဲ ကူးစက်မခံရဖို့ အဖြေမဟုတ်ပါဘူး”ဟုလည်းပြောသည်။

“ကျွန်တော်ထင်တာတော့ နှာခေါင်းစည်းတွေက လုံခြုံတယ်ဆိုတဲ့အသိမှားတစ်ခု လူတွေကြားထဲရောက်သွားနိုင်တယ်လို့ ကျွန်တော်တော်တော်တွေးမိပါတယ်” ဟုလည်း W.H.O၏ ကမ္ဘာ့ရောဂါပြန့်ပွားမှုနှင့် နိုးကြားမှုတုံ့ပြန်ရေးကွန်ရက်ဥက္ကဋ္ဌ ပါမောက္ခဒေးလ် ဖစ်ရှာကလည်းပြောသည်။

“ကျန်းမာရေးလုပ်သားတွေကတော့ နှာခေါင်းစည်းဘယ်လိုတပ်ရမလဲ၊ စနစ်တကျဘယ်လိုပစ်ရမလဲ၊ ဘယ်အချိန်မှာသုံးရမလဲဆိုတာ လေ့ကျင့်ထားပြီးသားလေ။ လူတော်တော်များများ နှာခေါင်းစည်းတပ်နေကြတာ ကျွန်တော်တွေ့တယ်။ နဖူးပေါ်ရောက်လို့ရောက်၊ မေးစေ့အောက်ရောက်လို့ရောက်နဲ့။ စနစ်တကျဘယ်လိုတပ်ရမလဲသိကြပုံမရဘူး” ဟုလည်း ပါမောက္ခဖစ်ရှာကပြောသည်။

နှာခေါင်းစည်းများကိုထိပြီးနောက် မျက်စိနှင့်မျက်နှာတို့ကိုလက်နှင့်ထိမိပါက အသက်ရှူလမ်းကြောင်းဗိုင်းရပ်စ်များပြန့်နှံ့နိုင်သည်ဟုလည်း အသိပေးသည်။

လက်ရှိတွင် ဝူဟန်ဗိုင်းရပ်စ်ကြောင့် တရုတ်နိုင်ငံတွင်သေဆုံးသူ ၂၁၃ ယောက်ရှိလာပြီး လူ ၁၀၀၀၀ နီးပါးအထိကူးစက်နေသည်။

နောက်ထပ်နိုင်ငံ ၁၈ နိုင်ငံတွင် ကူးစက်ခံရသူ ၉၈ ယောက်ရှိနေသော်လည်း သေဆုံးမှုမရှိချေ။

ဝူဟန်ဗိုင်းရပ်စ်သည် ကမ္ဘာ့ကျန်းမာရေးအရေးပေါ်အခြေနေဟု ကြာသပတေးနေ့တွင် W.H.Oမှ ကြေညာခဲ့သည်။

Source- CNA
#ဥက္ကာ #MeKongNews
Photo- People’s Daily

စင်ကာပူ၊ ဇန်နဝါရီ ၃၁

မကြာသေးခင်က တရုတ်နိုင်ငံသွားရောက်ခဲ့သည့်မှတ်တမ်းရှိသောခရီးသည်များကို ပြည်ဝင်ခွင့်ရပ်ဆိုင်းရန်နှင့် တရုတ်နိုင်ငံကူးလက်မှတ်ကိုင်ဆောင်သူများကို ဗီဇာဆိုင်းငံ့ရန်စီစဥ်နေသည်ဟု စင်ကာပူနိုင်ငံက သောကြာနေ့တွင် ကြေညာသည်။

စနေနေ့တွင်စတင်သက်ရောက်မည့်ပိတ်ဆို့မှုတွင် စင်ကာပူဒေသခံများနှင့် အလုပ်ပါမစ်ကိုင်ထားသူများကို ကင်းလွတ်ခွင့်ပြုမည်ဟုလည်း စင်ကာပူကျန်းမာရေးဝန်ကြီးဌာနကထုတ်ပြန်သည်။

စင်ကာပူမှလေယာဥ်ပြောင်းစီးသူများလည်း အကြုံးဝင်ကြောင်းပြောသည်။

စနေနေ့ည ၁၁နာရီ ၅၉ မိနစ်တွင် ဗီဇာဆိုင်းငံမှုချက်ချင်းအသက်ဝင်မှုဖြစ်သဖြင့် ခရီးသွားများကို ကြိုတင်သတိပေးထားနိုင်ရန်ထုတ်ပြန်ခြင်းဖြစ်သည်ဟု South China Morning Post သတင်းစာ က ဖော်ပြသည်။

စင်ကာပူ၏အကြီးဆုံးကုန်သွယ်ဖက်မှာ တရုတ်နိုင်ငံဖြစ်ပြီး စင်ကာပူသည် တရုတ်ခရီးသွားများကြားရေပန်းစားသောနေရာတသ်နေရာထြစ်သည်။

စင်ကာပူခရီးသွားဘုတ်အဖွဲ့ထုတ်ပြန်ချက်အရ ပြီးခဲ့သည့်နိုဝင်လာတွင် စင်ကာပူသို့တရုတ်ပြည်မကြီးမှလာရောက်သူ ၂၄၈၀၀၀ ယောက်ရှိသည်။

သောကြာနေ့အထိ စင်ကာပူတွင် ကိုရိုနာဗိုင်းရပ်စ်သစ်2019-nCoVကူးစက်ခံရသူ ၁၁ ယောက်ရှိပြီး ဝူဟန်မြို့မှ လာရောက်သူများဖြစ်သည်။

လက်ရှိအချိန်အထိ လူထုအကြားကူးစက်မှုမရှိကြောင်း စင်ကာပူကျန်းမာရေးအာဏာပိုင်များအလေးပေးပြောဆိုသည်။

Source- Bangkok Post

ဥက္ကာ #MeKongNews

Photo- Bloomberg

ဘန်ကောက်၊ ဇန်နဝါရီ ၃၁

တရုတ်နိုင်ငံသို့ခရီးသွားခဲ့သည့်မှတ်တမ်းမရှိသူတစ်ယောက်အပါအဝင် လူ ၅ ယောက်ကို စစ်ဆေးခဲ့ရာ ဝူဟန်ကိုရိုနာဗိုင်းရပ်စ်2019-nCoVကူးစက်ခံထားသူတစ်ယောက်တွေ့ရှိခဲ့သည်ဟု ထိုင်းရောဂါထိန်းချုပ်ရေးဌာနကပြောသည်။

​ထိုင်းနိုင်ငံတွင်း ပထမဆုံးလူလူချင်းကူစက်ခံရသူမှာ ထိုင်းလူမျိုးအငှားယာဉ်မောင်းတစ်ယောက်ဟုအတည်ပြုသော်လည်း အသေးစိတ်များကို ဌာနဒုတိယညွှန်ကြားရေးမှူး တာနာရက် ပီပတ်က ပြောဆိုခဲ့ခြင်းမရှိချေ။

ယခုဖြစ်ရပ်ကြောင့် ထိုင်းနိုင်ငံတွင် ကူးစက်ခံရသူ ၁၉ ယောက်ရှိလာသည်။

ယခုကူးစက်ခံရသည့်အငှားယာဥ်မောင်းမှအပ ကျန်သူများမှာ ဝူဟန်မြို့ရှိသည့်ဟူဘေးပြည်နယ်မှတရုတ်လူမျိုးများဖြစ်သည်။

ထိုယာဉ်မောင်းနှင့်အနီးကပ်ထိတွေ့နေသည့်မိသားစုဝင် ၅ ယောက်နှင့် ခရီးသည် ၈ ယောက်ကိုလည်း ကူးစက်နိုင်ကြောင်းသံသယဖြင့်စောင့်ကြည့်နေသည်။

ယခုတစ်ပတ်အစောပိုင်းက ထိုင်းတွင် ကိုရိုနာဗိုင်းရပ်စ်သစ်ကို ရာနှုန်းပြည့်ထိန်းချုပ်မည်ဟုပြောထားသောထိုင်းဝန်ကြီးချုပ်ပရာရွတ် ချန်အိုချာက ယခုဖြစ်ရပ်အတွက် ရုတ်ခြည်းမှတ်ချက်မပြုသေးပေ။

တရုတ်နိုင်ငံပြင်ပတွင် ဂျပန်နှင့်ဂျာမနီပြီးနောက် ထိုင်းသည် တတိယမြောက်လူလူချင်းဗိုင်းရပ်စ်ကူးစက်သည့်နိုင်ငံဖြစ်လာသည်။

Source- Khaosod
#ဥက္ကာ  #MeKongNews
Photo- Khaosod

လားရှိုး၊ ဇန်နဝါရီ ၃၁

ကောလာဟလများ ထွက်ပေါ်နေသကဲ့သို့ ရှမ်းပြည်နယ်မြောက်ပိုင်းတွင် ဝူဟန်ဗိုင်းရပ်ကူးစက်ခံထားရသူ မရှိကြောင်း ရှမ်းပြည်နယ်မြောက်ပိုင်း ပြည်သူ့ကျန်းမာရေးဦးစီးဌာနက ဇန်နဝါရီလ ၃၁ရက် နံနက်ပိုင်းတွင် မီဒီယာများနှင့် တွေ့ဆုံရှင်းလင်းသည်။

တရုတ်နိုင်ငံအတွင်း ဝူဟန်ဗိုင်းရပ်စ် စတင်ဖြစ်ပေါ်စဉ်က လားရှိုးမြို့၊ ရပ်ကွက်(၁)မှ အမျိုးသမီးတစ်ဦး ဖျားနာသေဆုံးမှုကို စစ်ဆေးခဲ့ပြီး ဝူဟန်ဗိုင်းရပ်စ်ပိုးမဟုတ်ကြောင်း၊ ရပ်ကွက် (၅)မှ ဖျားနာသူတစ်ဦး၊ ရွှေလီမှ ပြန်လာသူ (၂)ဦး၊ တရုတ်နယ်စပ်မှ ပြန်လာသည့် ရပ်ကွက် (၈)တွင် နေထိုင်သည့် ဖျားနာသူတစ်ဦးတို့ကိုလည်း စစ်ဆေးခဲ့ပြီး ဝူဟန်ဗိုင်းရပ်စ်နှင့် စပ်ဆိုင်ခြင်း မရှိကြောင်း ရှမ်းပြည်နယ်မြောက်ပိုင်း ပြည်သူ့ကျန်းမာရေးဦးစီးဌာန ဒုတိယပြည်နယ်ဦးစီးမှူး ဒေါက်တာ တင်မောင်ထွန်းက သတင်းစာရှင်းလင်းပွဲတွင် ပြောသည်။

“ရပ်ကွက် (၈)က လူနာက နမ့်ခမ်းဘက်မှာ ဆေးသုတ်တဲ့အလုပ်သွားလုပ်တာပါ။ ပြန်လာတာ ၄၊ ၅ရက်ရှိပြီ။ ဖျားနေတယ်ဆိုလို့ စစ်ဆေးလိုက်တော့ TB ဖြစ်နေတာ ကြောင့် TB ဆေးတွေ ပေးခဲ့ပါတယ်။ ဒီမနက်ပဲ အဖျားလည်း ကျသွားပါပြီ” ဟု ၎င်းက ပြောသည်။

ထို့ပြင် ရှမ်းပြည်နယ်မြောက်ပိုင်းတွင် တရုတ်နိုင်ငံနှင့် ထိစပ်နေသည့် မူဆယ်၊ လောက်ကိုင်၊ ဟိုပန်၊ နမ့်ခမ်း၊ တန့်ယန်း နယ်စပ်ဝင်ပေါက် (၅)ခုစလုံးတွင် ကျန်းမာရေးဝန်ထမ်းများ လုံလောက်စွာ ချထားပြီး အဖျားစစ်ဆေး တိုင်းတာမှုများ ပြုလုပ်နေသလို ဖေဖော်ဝါရီ (၁)ရက်မှ စတင်ကာ လားရှိုးလေဆိပ်တွင်လည်း စစ်ဆေးမှုများ လုပ်ဆောင်သွားမည် ဖြစ်ကြောင်း ဒေါက်တာ တင်မောင်ထွန်းက ပြောသည်။

ထိုသို့ စစ်ဆေးမှုများလုပ်ဆောင်ရန်အတွက် ရှမ်းပြည်နယ်မြောက်ပိုင်းတွင် ဝန်ထမ်းအင်အား လုံလောက်စွာ ရှိသလို လိုအပ်သည့် ကျန်းမာရေးသုံး ပစ္စည်းများလည်း လုံလောက်စွာရှိကြောင်း သတင်းစာရှင်းလင်းပွဲတွင် ပြောကြားသည်။
MK – 001

MeKongNews