ကြားဖြတ်သန်းခေါင်စာရင်းကို ခရိုင်အဆင့်ကောက်ကွက် လေးထောင်ကျော်ဖြင့် စတင်ကောက်ခံ

တာချီလိတ်၊ ဒီဇင်ဘာလ ၂၅

မြန်မာတစ်နိုင်ငံလုံးအတိုင်းအတာ အနေဖြင့် ကြားဖြတ်သန်းခေါင်စာရင်းကို ခရိုင်အဆင့် ကောက်ကွက်ပေါင်း ၄၀၀၀ ကျော်ဖြင့် ပြီးခဲ့သည့် နိုဝင်ဘာလမှ စတင်ကာ ကောက်ခံနေပြီဖြစ်ကြောင်း ပြည်သူ့အင်အားဦးစီးဌာန ညွှန်ကြားရေးမှုုး ဒေါ်ခိုင်ခိုင်စိုးမှ နေပြည်တော် Park Royal Hotel၌ ဒီဇင်ဘာ ၂၄ရက်တွင် ပြုလုပ်ခဲ့သည့် လူဦးရေခန့်မှန်းခြင်း ၁၉၈၃-၂၀၁၄ သုတေသနအစီရင်ခံစာ ထုတ်ပြန်ကြေငြာခြင်း အခမ်းအနားတွင် ပြောသည်။

မြန်မာတစ်နိုင်ငံလုံးအတိုင်းအတာဖြင့် သန်းခေါင်စာရင်း ကောက်ကွက်ပေါင်း ၈၀၀၀၀ ကျော်ရှိပြီး အဆိုပါကောက်ကွက်များကို ခရိုင်အဆင့်ကောက်ကွက် ၄၀၀၀ကျော် ပြန်လည်သတ်မှတ်ကာ အဆင့် (၄)ဆင့်ဖြင့် ကောက်ခံနေခြင်းဖြစ်ကြောင်း ဒေါ်ခိုင်ခိုင်စိုးကပြောသည်။

“ကျွန်မတို့ နိုဝင်ဘာလက စကောက်ပါတယ်။ အဆင့် (၄)ဆင့်ခွဲပြီးကောက်ခံပါတယ်။ ပထမအဆင့်က ကချင်ပြည်နယ်၊ ချင်းပြည်နယ်နဲ့ နေပြည်တော်မှာ ကောက်ပါတယ်။ ဒုတိယက ကယား၊ ကရင်၊ မွန်၊ တနင်္သာရီ၊ ဧရာဝတီ (၅)ခုကောက်ပါတယ်။ ပြီးရင် ပဲခူး၊ မကွေး၊ စစ်ကိုင်း (၃)တိုင်းကောက်ပါ့မယ်။ နောက်ဆုံးအဆင့်အနေနဲ့ကတော့ ရန်ကုန်၊ မန္တလေး၊ ရခိုင်နဲ့ရှမ်းကို ကောက်ယူသွားမှာ ဖြစ်ပါတယ်”ဟု ၎င်းက ပြောသည်။

ကြားဖြတ်သန်းခေါင်စာရင်း ကောက်ခံရာတွင် တစ်နိုင်ငံလုံးအတိုင်းအတာဖြင့် ခရိုင်အဆင့်အထိ အချက်အလက်များ ရရှိရန် စီမံချက်ကို ရေးဆွဲပြင်ဆင်ထားပြီး သွားလာရခက်ခဲပြီး ဝေးလံသည့် ဒေသများတွင် ဒေသအာဏာပိုင်များနှင့် ညှိနှိုင်းကာ ဆောင်ရွက်သွားမည် ဖြစ်ကြောင်း ဒေါ်ခိုင်ခိုင်စိုးက ပြောသည်။

မြန်မာနိုင်ငံတွင် ၂၀၁၄ ခုနှစ် သန်းခေါင်စာရင်းအရ လူဦးရေ ၅၁သန်းကျော်ရှိပြီး ၂၀၃၀ ပြည့်နှစ်တွင် လူဦးရေ သန်း ၆၀ ရှိလာမည်ဟု ပြည်သူ့အင်အားဦးစီးဌာနက ခန့်မှန်းထားသည်။

MK-001

#MeKongNews

ထိုင်းအစိုးရအဖွဲ့နှင့်ဝန်ကြီးများအတွက် နာမည်ပြောင်များပြန်ပေး

ဘန်ကောက်၊ ဒီဇင်ဘာ ၂၅

တစ်နှစ်အတွင်းအောင်မြင်မှုများကိုအခြေခံပြီး ထိုင်းအစိုးရအဖွဲ့နှင့်ဝန်ကြီးများအတွက် စုပေါင်းပြီး နာမည်ပြောင်များပေးခြင်းသည် ထိုင်းအစိုးရအိမ်တော်ရှိသတင်းစာအဖွဲ့အစည်းများ၏ နှစ်ကုန်ကာလအစဉ်အလာဖြစ်သည်။

ပြီးခဲ့သည့် ၆ နှစ်အတွင်း ရွေးကောက်ခံအစိုးရမရှိခဲ့သဖြင့် ထိုအစဉ်အလာကိုကာလရှည်ရပ်တန့်ခဲ့ရပြီး နှစ်ပေါင်းများစွာအတွင်း ပထမဆုံးအနေနှင့် ယခုနှစ်တွင် အစိုးရအဖွဲ့နှင့်ဝန်ကြီးများကို နာမည်ပြောင်များပြန်ပေးခဲ့သည်။

အစိုးရအဖွဲ့အမည်ပြောင် – စီယန်ကုန်းအစိုးရ

စီယန်ကုန်းသည် ဘန်ကောက်ရှိ တစ်ပတ်ရစ်ကားပစ္စည်းများကို ဈေးပေါပေါဖြင့်ရောင်းချသောဈေးဖြစ်သည်။ လက်ရှိထိုင်းညွှန့်ပေါင်းအစိုးရတွင်ပါဝင်နေသူများမှာ သက်တမ်းရှည်နိုင်ငံရေးသမားများ၊ အစိုးရဟောင်းများမှနိုင်ငံတော်အဆင့်တာဝန်ရှိသူများပေါင်းစုထားသည့်အစိုးရအဖွဲ့ဖြစ်သောကြောင့် ယခုအမည်တွင်ရသည်။

ထိုင်းဝန်ကြီးချုပ်ဗိုလ်ချုပ်ကြီး ပရာရွတ် ချန်အိုချာ၏အမည်ပြောင် – အရက်မူးလက်ဝှေ့သမား

သတင်းစာဆရာများ၏အမြင်တွင် ပရာရွတ်သည် စိတ်ရှုပ်ထွေးနေသောလက်ဝှေ့သမားတစ်ဦးနှင့်တူနေသည်။ အခြားပါတီများမှ အမတ်များကိုဆွဲဆောင်ခြင်း၊ ပြီးခဲ့သောနိုင်ငံရေးစုဝေးမှုများတွင်ပါဝင်ခဲ့သူများကို ဝန်ကြီးများအဖြစ်ခန့်ထားခြင်းနှင့် အနည်းဆုံးလုပ်ခလစာတိုးမြှင့်ပေးခြင်းကဲ့သို့သော အများကြိုက်မူဝါဒများကိုဝေဖန်ခဲ့သော်လည်း လက်ရှိသူကိုယ်တိုင်ပြန်လည်ကျင့်သုံးနေသည်။ ထို့အပြင် အတိုက်အခံများထံမှမေးခွန်းများရှိလာသည့်အခါ စိတ်ရှုပ်ထွေးပုံရပြီး အခြေအနေတော်တော်များများတွင် အကြောင်းအရာပြောင်းလဲပြောဆိုခဲ့သည်။

ဒုဝန်ကြီးချုပ် ပရာဝတ် ဝမ်ဆူဝမ်၏ နာမည်ပြောင် – ဖျော်ဖြေရေးသမားအစ်ကိုကြီး

P နှင့်စသောထိုင်းထိပ်တန်းခေါင်းဆောင် ၃ ဦးဖြစ်သည့် ပရာဝတ်၊ ပရာရွတ်နှင့် ပေါ့ အနူပေါင်တို့တွင်အကြီးဆုံးဖြစ်သည့် ပရာဝတ်သည် ညီငယ်များကိုစောင့်ရှောက်ရသော အစ်ကိုကြီးဖြစ်သည့်အပြင် ညွှန့်ပေါင်းအစိုးရအဖွဲ့အတွင်း နိုင်ငံတကာပဋိပက္ခများမှ ကြက်မွေးမြူရေးခြံအရှုပ်တော်ပုံအထိ ပြဿနာများကြုံရသောအခါ အစိုးရအဖွဲ့ဝင်များကို စိတ်ပြေအောင်လုပ်ပေးသူဖြစ်သည်။

ဒုဝန်ကြီးချုပ် ဆွမ်ကစ် ဂျာတူဆရီပီတတ်၏ အမည်ပြောင် – မစ္စတာ ပရာချာရတ်

ဆွမ်ကစ်သည် ပြီးခဲ့သည့်ထိုင်းနိုင်ငံလူမှုဖူလုံရေး(ပရာချာရတ်)စီမံကိန်းများကို အစပြိုးခဲ့ပြီး အများစုမှာမအောင်မြင်ခဲ့သောကြောင့် အစိုးရအဖွဲ့ဝင်ပါတီများကြားတွင်ပင် စီမံကိန်းသစ်များ ထောက်ခံမှုမရဖြစ်ခဲ့သော်လည်း လက်ရှိအချိန်အထိ ပရာချာရတ်စီမံကိန်းများကို ဆက်လက်ကိုင်စွဲထားဆဲဖြစ်သည်။

ဒုဝန်ကြီးချုပ်ဝိစာနူး ကရိယာနမ်- ဆရီ သာနွန်ချိုင်း

ထိုင်းအစိုးရ၏ဥပဒေရေးရာဂုရုတစ်ပါးဖြစ်သောဝိစာနူးကို ထိုင်းရိုးရာပုံပြင်များထဲမှ လှည့်စားတတ်ပြီး သမားရိုးကျသူရဲကောင်းစံနှုန်းများမရှိသည့် ဆရီ သာနွန်ချိုင်းနှင့်နှိုင်းယှဉ်ဖော်ပြထားသည်။ ခက်ခဲသည့်အခြေအနေများမှရုန်းထွက်နိုင်ရန် စည်းမျဉ်းစည်းကမ်းများနှင့်ဥပဒေ၊ နည်းဥပဒေများတွင် ဟာကွက်ရှာနိုင်သောအရည်အချင်းကြောင့် ဝိစာနူးနာမည်ကျော်သည်။

ဒုဝန်ကြီးချုပ်နှင့် စီးပွားကူးသန်းဝန်ကြီး ဂျူရင် လန်ဆာနာဝီဆစ်၏ အမည်ပြောင် – လွတ်လပ်သည့်နိုင်ငံတော်

ဂျူရင်သည် ဒီမိုကရတ်ပါတီမှဖြစ်ပြီး ပါတီမှတင်ပြသည့်အဆိုများအတွက် ညွှန့်ပေါင်းမိတ်ဖက်များ၏အမြင်ကိုဂရုမစိုက်ဘဲ သီးသန့်လည်ပတ်နေသကဲ့သို့ဖြစ်နေသောကြောင့် နာမည်ပြောင်ပေးရခြင်းဖြစ်သည်။

ဒုဝန်ကြီးချုပ်နှင့် ပြည်သူ့ကျန်းမာရေးဝန်ကြီး အနူတင် ချာဗီရာကူး၏အမည်ပြောင်- ကြွက်သတ်ဆေး

အနူတင်၏နာမည်ပြောင်သည် နူဖြစ်ပြီး ထိုင်းဘာသာဖြင့် ကြွက်ဟုအဓိပ္ပာယ်ရသည်။ ထိုင်းစိုက်ပျိုးရေးကဏ္ဍတွင် အဆိပ်ဖြစ်စေသည့်ဓာတုပိုးသတ်ဆေးများအသုံးမပြုရန်ပိတ်ပင်သောကြောင့် အဖွဲ့အစည်းတော်တော်များများက ဝေဖန်ခဲ့ပြီးနောက်တွင် ယခုအမည်တွင်ခဲ့သည်။

ဒုစိုက်ပျိုးရေးနှင့်သမဝါယမဝန်ကြီး ဗိုလ်ကြီးသာမာနတ် ပရွမ်ပေါင်၏အမည်ပြောင် – မီးခိုးရောင်ဒေသ

ဘွဲ့လက်မှတ်ယုံကြည်ရမှုရှိမရှိ၊ မူးယစ်ဆေးမှုကြောင့် သြစတြေးလျတွင်ထောင်ကျခဲ့ခြင်းနှင့် အတိုက်အခံပါတီများနှင့် မရိုးဖြောင့်သောနည်းလမ်းများဖြင့်ညှိနှိုင်းခဲ့ခြင်း စသည့်အရှုပ်တော်ပုံများတွင်ပါဝင်ခဲ့ခြင်းကြောင့် မီးခိုးရောင်ဒေသဟုခေါ်ကြခြင်းဖြစ်သည်။

ပို့ဆောင်ရေးဝန်ကြီး ဆက်ဆယမ် ချစ်ချော့၏အမည်ပြောင်- ဖျက်ဆီးရေးသမား

ကိုယ်ပိုင်ကားများအားလုံးတွင် GPSစနစ်တပ်ဆင်ရန်ကဲ့သို့သော အငြင်းပွားဖွယ်အကြံဉာဏ်များထုတ်ပေးခဲ့ရုံသာမက ကောင်းကင်ရထားခနှုန်းများ၊ ယာဉ်မောင်းလိုင်စင်စစ်ဆေးမှုနှင့် ရထားဖြတ်လမ်းဂိတ်များတည်ဆောက်ခြင်းလျှော့ချခြင်းအပါအဝင် စီမံကိန်းများဖျက်သိမ်းရန်သဘောထားရှိသောကြောင့် ဖျက်ဆီးရေးသမားဟု အမည်ပေးခံခဲ့ရသည်။

သဘာဝရင်းမြစ်နှင့်ပတ်ဝန်းကျင်ဝန်ကြီး ဝရာဝတ် ဆီပါအာချာ၏အမည်ပြောင် – အသုသစီစဉ်သူ

အာဏာစရပြီးနောက်ပိုင်း ရှားပါးတောရိုင်းတိရစ္ဆာန်များသေဆုံးခြင်းနှင့်မကြာခဏကြုံတွေ့ခဲ့ရသည့်နောက် ယခုကဲ့သို့နာမည်ပြောင်ပေးခံရခြင်းဖြစ်သည်။ သို့သော်လည်း အရှုပ်များကိုဖြေရှင်းပြီး သဘာဝပတ်ဝန်းကျင်ကိုပိုဂရုစိုက်ရန် နိုင်ငံသားများကိုတိုက်တွန်းမှုကြောင့် သတင်းစာဆရာများက ဝရာဝတ်၏အားထုတ်မှုများကို ချီးကျူးခဲ့သည်။

ယခုနှစ်အတွက် ထိုင်းအစိုးရ၏ကိုးကားစကား

“အခုအထိပဲ ငါ့ကိုစိတ်ပျက်မနေကြနဲ့။ ဒီမှာ ငါအချိန်အကြာကြီးရှိနေဦးမှာ”

နိုဝင်ဘာ ၁၃ ရက်က ထိုင်းအစိုးရအိမ်တော်တွင် ဖိလစ်ပိုင်နိုင်ငံတွင်ကျင်းပမည့်အကြိမ် ၃၀ မြောက်ဆီးဂိမ်းပြိုင်ပွဲသွားရောက်ယှဉ်ပြိုင်ကြမည့်ထိုင်းအားကစားသမားများနှင့် ဝန်ထမ်းများကို ပရာရွတ်ကပြောဆိုခဲ့သည်။

Source-The Nation

ဥက္ကာ #MeKongNews

Photo- The Nation

ကရင်လူ့အခွင့်အရေးလှုပ်ရှားသူကို သတ်မှုဖြင့် ထိုင်ဥယျာဉ်တာဝန်ခံကို အမှု ၆ မှုဖြင့်စွဲချက်တင်

Photo- King-oua Laohong/ Bangkok Post ရှေ့နေဆူရာပေါင်(အလယ်)၊ အမှုသည်ပင်နာပါ(ဝဲ ဒုတိယ)နှင့် ရဲဒုတိယဗိုလ်မှူးကြီးရှာနီ(ယာ ဒုတိယ)တို့ကို ဘန်ကောက်ရှိ DSIရုံးတွင် တနင်္လာနေ့ကမြင်တွေ့ရစဉ်

ဘန်ကောက်၊ ဒီဇင်ဘာ ၂၃

ကရင်တက်ကြွလှုပ်ရှားသူဖိုးလကြီး ရက်ချောင်ချာရွန် (ဘီလီ) ကို ကြိုတင်ကြံစည်သတ်ဖြတ်မှုနှင့် အလောင်းဖျောက်ဖျက်မှုများဖြင့် ကန်ကရာချန်အမျိုးသားပန်းခြံတာဝန်ခံချိုင်ဝတ် လင်လီကစ် အက်ဆွန်ကို အမှု ၆ မှုဖြင့်တရားစွဲဆိုရန် ထိုင်းအထူးစုံစမ်းရေးဌာန DSIက အတည်ပြုပေးလိုက်သည်။

ချိုင်ဝတ်နှင့်အခြား ၃ ဦးကို ကြိုတင်ကြံစည်သတ်ဖြတ်မှု၊ ဥပဒေပထိန်းသိမ်းမှု၊ လက်ရောက်မှု၊ လုယက်မှု၊ အလောင်းဖျောက်ဖျက်မှုနှင့် မလျော်သြဇာသုံးမှုတို့ဖြင့် စွဲချက်တင်လိုက်သည်ဟု ဖိုးလကြီးဇနီးရဲ့ရှေ့နေ ဆူရာပေါင် ခွန်ချန်သူ့က DSIရုံးမှာ တနင်္လာနေ့ကပြောသည်။

“ဘီလီက ရန်သူမရှိတဲ့ လူ့အခွင့်အရေးတက်ကြွသူဆိုတော့ DSIအမှုက ကမ္ဘာ့အာရုံစိုက်ခံရတယ်။ စွဲချက်တွေကို အတည်ပြုပေးလိုက်တဲ့ဆုံးဖြတ်ချက်က ထိုင်းတရားရေးစနစ်ဟာ နိုင်ငံတကာစံနှုန်းတွေနဲ့ ကိုက်ညီတယ်ဆိုတာ နိုင်ငံတကာကိုပြလိုက်တာပဲ။ ဒါဟာ လူ့အခွင့်အရေးနယ်ပယ်မှာ အလုပ်လုပ်နေတဲ့ လူတွေကိုလည်း ယုံကြည်မှုရစေတယ်” ဟု ဆူရာပေါင်ကဆိုသည်။

စုံထောက်များ၏ အစီရင်ခံစာများပါဝင်သည့် ဖိုင် ၁၇ ဖိုင်ကို ထိုင်းရှေ့နေချုပ်ရုံးထံ တနင်္လာနေ့တွင် တင်သွင်းသွားမည်ဖြစ်ပြီး အစီရင်ခံစာကိုင်တွယ်ရန် ပြည်သူ့ရှေ့နေများတွင် အချိန်ရက် ၄၀ ရှိသည်ဟု DSIမှ ဒေသစစ်ဆင်ရေးအရာရှိချုပ် ရဲဒုတိယဗိုလ်မှူးကြီးရှာနီ ကန်ချာနာပတ်ကပြောသည်။

ယခုဖြစ်ရပ်အတွက် DSIက လူသက်သေ၊ ပစ္စည်းသက်သေစုဆောင်းရာတွင် အကောင်းဆုံး လုပ်ဆောင်ပေးခဲ့သည်ဟုလည်း ပြောသည်။

စွဲဆိုခံထားရသူများတင်မည်ဟု ပြောထားသောသက်သေထွက်ဆိုချက် မတင်နိုင်ခဲ့ဟုလည်းပြောသည်။

နိုဝင်ဘာ ၂၈ ရက်တွင် ထွက်ဆိုချက်တင်ရန် DSIကနောက်ဆုံးအချိန်သတ်မှတ်ခဲ့သည်။

DSI၏ဆောင်ရွက်ချက်များကို ကျေနပ်သည်ဟု ဖိုးလကြီး၏ဇနီးသည်ပင်နာပါ ပရွတ်ဆာပန်ကပြောသည်။

တရားရေးစနစ်အလုပ်ဖြစ်ကြောင်းပြသနေပြီး ထိုင်းတရားရေးဝန်ကြီးဌာနက သူ့ကိုကောင်းကောင်း စောင့်ရှောက်ထားသည့်အပြင် ခြိမ်းခြောက်မှုများလည်းရှိမကြောင်း ထပ်မံပြောသည်။

အသက် ၃၁ နှစ်ဖိုးလကြီးသည် ၂၀၁၄ ခုနှစ်၊ ဧပြီတွင်ပျောက်ဆုံးခဲ့သည်။

ဖတ်ချာဘူရီခရိုင်ရှိ ကန်ကရာချန်အမျိုးသားပန်းခြံအတွက် မြေသိမ်းယူရာတွင် ဝါးတဲများနှင့် စပါးကျီများကို မီးရှို့ခံခဲ့ရသည်ဟုဆိုသည့် သူ၏ဆွေမျိုးများက ချိုင်ဝတ်ကိုတရားစွဲနိုင်ရန် ဖိုးလကြီးကူညီခဲ့သည်။

တောထဲတွင် တရားမဝင်ပျားဖွတ်နေသည်ဟုဆိုပြီး ချိုင်ဝတ်နှင့်အရာရှိများက ဖိုးလကြီးကိုဖမ်းဆီးခဲ့သည့် ၂၀၁၄ ခုနှစ်၊ ဧပြီတွင် ဖိုးလကြီးကိုနောက်ဆုံးမြင်တွေ့ခဲ့ရသည်။

ယခုနှစ်နိုဝင်ဘာတွင် ချိုင်ဝတ်နှင့်အခြား ၃ ဦး DSIထံတွင် အဖမ်းခံခဲ့ပြီး စွဲချက်များကိုငြင်းဆိုခဲ့သည်။

DSIက သူတို့ကိုထိန်းသိမ်းခဲ့သော်လည်း အကျင့်ပျက်ခြစားမှုနှင့် မလျော်သြဇာသုံးမှုများဆိုင်ရာ ဗဟိုမှုခင်းတရားရုံးက သူတို့ကို တစ်ဦးလျှင်ဘတ် ၈ သိန်းစီဖြင့် အာမခံပေးခဲ့သည်။

အမျိုးသားပန်းခြံထဲတွင် ယုံကြည်ရသောသက်သေများတွေ့ခဲ့သည်ဟု DSIက အစောပိုင်းတွင်ပြောဖူးပြီး ဖိုးလကြီးကိုသတ်ပြီး ကန်ကရာချန်ရေလှောင်တမံတွင် မြှုပ်ထားသည်ဟုယုံကြည်ရကြောင်းလည်းပြောသည်။

Source-Bangkok Post

ဥက္ကာ

Photo- King-oua Laohong/ Bangkok Post

အယုဒ္ဓယကျောင်းတွင် ဆန်တာကလော့စ်ပုံစံ ဝတ်ထားသောဆင်များက လက်ဆောင်ဝေငှ

ဒီဇင်ဘာ ၂၃၊ အယုဒ္ဓယ

ဗုဒ္ဓဘာသာအများစုရှိသော ထိုင်းနိုင်ငံတွင် နှစ်စဉ်ခရစ္စမတ်ရိုးရာကာလတွင် ဆန်တာကလော့စ်ပုံစံ ဝတ်ဆင်ထားသောဆင်များက လက်ဆောင်များနှင့်သကြားလုံးများ အယုဒ္ဓယရှိကျောင်းသားများကို ဝေငှခဲ့သည်။

အယုဒ္ဓယမြို့ရှိ ဂျီရာဆာ့တ်ဝတ်သရာကျောင်းတွင် ခရစ္စမတ်ပွဲတော်ကျင်းပခဲ့သည်မှာ ၁၅ နှစ်ရှိနေပြီး ယခုနှစ်တွင် ဆင် ၄ ကောင်နှင့် ဆန်တာကလော့စ်ဦးထုပ်များဆောင်းထားသောဆင်ထိန်းများက ကျောင်းသို့လာရောက်ပြီး ကျောင်းသားများကို လက်ဆောင်ပေးခဲ့ခြင်းဖြစ်သည်ဟု အယုဒ္ဓယဆင်နန်းတော်ဆင်စခန်းပိုင်ရှင်ကပြောသည်။

ဆင်များကခဲ့သည့်အပြင် လေ့ကျင့်ထားသောအကွက်များဖြင့်လည်း ကျောင်းသားများကို ဖျော်ဖြေခဲ့သည်။

ဆင်သည် ထိုင်းနိုင်ငံ၏သင်္ကေတဖြစ်ပြီး သမိုင်းနှင့်ရသစာပေများတွင် ပေါ်ပေါက်ခဲ့သည်။

ထိုင်းနိုင်ငံ၏ ၉၈ ရာခိုင်နှုန်းသည် ဗုဒ္ဓဘာသာဝင်များဖြစ်သော်လည်း ခရစ္စမတ်ပွဲတော်ကို နှစ်ကုန်အားလပ်ရက်ရာသီ၏တစ်စိတ်တစ်ပိုင်းအနေနဲ့ ပါဝင်ဆင်နွှဲကြသည်။

Source-Bangkok Post

ဥက္ကာ

Photo-Bangkok Post

မှုခင်းများအားမြန်ဆန်စွာ စစ်ဆေးခြင်းစနစ်ကို တာချီလိတ်ခရိုင်တရားရုံးတွင် စတင်အကောင်အထည်ဖော်မည်

တာချီလိတ်၊ ဒီဇင်ဘာ ၂၃

ပြည်ထောင်စုတရားလွှတ်တော်ချုပ်က အကောင်အထည်ဖော်နေသည့် မှုခင်းစီမံခန့်ခွဲမှု အစီအစဉ် – Case Management Program – CMP စနစ်ဖြင့် မှုခင်းများအား မြန်ဆန်စွာ စစ်ဆေးခြင်းကို တာချီလိတ်ခရိုင် တရားရုံးတွင် လာမည့် ၂၀၂၀ခုနှစ် ဇန်နဝါရီလ ၁ရက်မှ စတင်ကာ အကောင်အထည်ဖော် ဆောင်ရွက်သွားမည် ဖြစ်ကြောင်း တာချီလိတ်ခရိုင် တရားရုံးမှ သိရသည်။

တရားစီရင်ရေးမဟာဗျူဟာ စီမံကိန်း (၂၀၁၈-၂၀၂၀)၏ မဟာဗျူဟာ လုပ်ငန်းနယ်ပယ် (၅)ဖြစ်သော ထိရောက်သော မှုခင်းစီမံခန့်ခွဲမှုနှင့် တရားရုံးကဆောင်ရွက်သော အထူးမှုခင်းကိစ္စရပ်တို့ကို တိုးမြှင့်ဆောင်ရွက်ရန် အတွက် မှုခင်းစီမံခန့်ခွဲမှု အစီအစဉ် – Case Management Program – CMP စနစ်ကို ခရိုင်တရားရုံး (၂၅)ရုံးနှင့် မြို့နယ်တရားရုံး (၁၀၉)ရုံးတွင် ၂၀၂၀ခုနှစ်၊ ဇန်နဝါရီလ (၁)ရက်မှ စတင်ကာ ပြည်ထောင်စု တရားလွှတ်တော်ချုပ်က အကောင်အထည်ဖော်သွားမည် ဖြစ်ပြီး ယင်းထဲတွင် တာချီလိတ်ခရိုင်တရားရုံးလည်း ပါဝင်ကြောင်း သိရသည်။

“ဒီစနစ်နဲ့ ပတ်သက်ပြီး ပြည်ထောင်စုတရားလွှတ်တော်ချုပ်က တာဝန်ရှိသူတွေ ကိုယ်တိုင် ဒီဇင်ဘာလ ၂၉ရက်မှာ တာချီလိတ်မှာ လာရောက်ရှင်းလင်းပါမယ်” ဟု တာချီလိတ်ခရိုင်တရားရုံးမှ တာဝန်ရှိသူတစ်ဦးက ပြောသည်။

အဆိုပါ ရှင်းလင်းပွဲသို့ သတင်းမီဒီယာများကို ဖိတ်ကြားသွားမည်ဖြစ်သလို တာချီလိတ်မြို့နယ်အတွင်းရှိ စိတ်ပါဝင်စားသူများလည်း တက်ရောက်နားထောင် မေးမြန်းနိုင်ကြောင်း သိရသည်။

MK – 001

MeKongNews

လျှပ်စစ်အန္တရာယ်ကင်းရှင်းရေး အင်တာနက်ကုမ္ပဏီများနှင့် မီးလင်းရေးကော်မတီ ဆွေးနွေးမည်

အာခါဈေးမီးပွိုင့်အနီးဓာတ်တိုင်တွင် မီးလောင်နေစဉ် Credit – Photo by Sai Kham Boo

တာချီလိတ်၊ ဒီဇင်ဘာ ၂၁

အင်တာနက်ဖိုက်ဘာကြိုးများရှုပ်ထွေးပြီး မီလောင်ခြင်းကဲ့သို့ ဖြစ်ရပ်များနှင့် အခြားလျှပ်စစ်အန္တရာယ်များ ကင်းရှင်းစေရေးအတွက် တာချီလိတ်မြို့နယ်မီးလင်းရေးကော်မတီ (လျှပ်စစ်ဓာတ်အားဖြန့်ဖြူးရေးလုပ်ငန်း)နှင့် ဖိုက်ဘာကြိုးသွယ်တန်းထားသည့် ကုမ္ပဏီများ လာမည်ရက်ပိုင်းအတွင်း တွေ့ဆုံသွားမည်ဖြစ်ကြောင်း တာချီလိတ်မြို့နယ်မီးလင်းရေးကော်မတီမှ သိရသည်။

လက်ရှိအချိန်တွင် တာချီလိတ်မြို့နယ်အတွင်းမှ အင်တာနက်ကုမ္ပဏီများအနေဖြင့် ဖိုက်ဘာကြိုးများကို မြို့နယ်မီးလင်းရေးကော်မတီ၏ ဓာတ်တိုင်များပေါ်မှ ချိတ်ဆက်သွယ်တန်းထားပြီး ပြီးခဲ့သည့် ရက်ပိုင်းအတွင်းက အင်တာနက်ဖိုက်ဘာကြိုးများ အပူလွန်ကဲပြီး တာချီလိတ်မြို့၊ အာခါဈေးမီးပွိုင့်ရှိ ဓာတ်တိုင်တွင် မီးလောင်မှု ဖြစ်ပွားခဲ့ခြင်း ဖြစ်သည်။

“မီးလင်းရေးကော်မတီရဲ့ ဦးစားပေးလုပ်ငန်းက လျှပ်စစ်အန္တရယ် ကင်းရှင်းရေးနဲ့ ပျောက်ဆုံးယူနစ်လျော့ကျရေးပဲ ဖြစ်ပါတယ်။ ဒါကြောင့် အင်တာနက်ကုမ္ပဏီတွေနဲ့ ညှိနှိုင်းပြီး စည်းကမ်းချက်တွေ ထည့်ဖြည့်သင့်တာ ဖြည့်မယ်။ အင်တာနက်ကလည်း မရှိမဖြစ် အရေးပါလာတဲ့ အရာဆိုတော့ ဖြုတ်ခိုင်းလို့တော့ မရဘူး” ဟု တာချီလိတ်မြို့နယ်မီးလင်းရေးကော်မတီ (လျှပ်စစ်ဓာတ်အားဖြန့်ဖြူးရေးလုပ်ငန်း) ဥက္ကဌ ဦးတင်လှိုင်က ဒီဇင်ဘာလ ၁၉ရက်က ပြောသည်။

တာချီလိတ်မြို့တွင် မီးလင်းရေးကော်မတီပိုင် ဓာတ်တိုင်များပေါ်မှတဆင့် ဖိုက်ဘာကြိုး ချိတ်ဆက်သွယ်တန်းထားသည့် အင်တာနက် ကုမ္ပဏီ (၉)ခုရှိပြီး လစဉ်ကြေးအနေဖြင့် မြို့တွင်း၌ ဓာတ်တိုင် တစ်တိုင်လျှင် (၅)ဘတ်နှုန်း၊ မြို့ပြင်တွင် ဖိုက်ဘာကြိုး တစ်ကီလိုမီတာလျှင် ကျပ်(၂၁၀၀၀)နှုန်းဖြင့် လစဉ်ကြေး ပေးသွင်းလျှက်ရှိကြောင်း သိရသည်။

MK – 001

MeKongNews

ဝင်ငွေနည်းသူများကို ကူညီရန်အစီအစဉ်များ ထိုင်းအစိုးရအတည်ပြု

ဘန်ကောက်၊ ဒီဇင်ဘာ ၂၀

လာမည့် ၂၀၂၀ ပြည့်နှစ်တွင် ဝင်ငွေနည်းသူများကိုကူညီရန် အကူအညီအစီအစဉ်များကို ထိုင်းအစိုးရက ဆက်လက်အတည်ပြုထားသည်။

လူ့အသိုက်အဝန်းတွင် အခွင့်အရေးပိုနည်းသူများကိုကူညီရန် နောက်ထပ်လုပ်ငန်းများ အစိုးရက စီစဉ်နေသည်ဟု ဒုတိယဝန်ကြီးချုပ် ဆွမ်ကစ် ဂျာတူဆရီပီတတ်ကပြောသည်။

ဆင်းရဲမှုတိုက်ဖျက်ပြီး ဝင်ငွေကွာဟမှုလျှော့ချရန် ပိုမိုခိုင်မာသော အရေးယူဆောင်ရွက်မှုများ လိုနေသည်ဟုလည်း ပြောသည်။

ထိုင်းရင်းနှီးမြှုပ်နှံမှုဘုတ်အဖွဲ့အနေနှင့် စိုက်ပျိုးရေး၊ ခရီးသွားနှင့် ဝန်ဆောင်မှုကဏ္ဍများတွင် ထုတ်လုပ်မှုအတွက် လိုအပ်သည့်စီးပွားရေးလုပ်ငန်းများကို ပိုမြှင့်တင်ပေးသင့်ကြောင်းလည်း ဆွမ်ကစ်ကပြောသည်။

ထိုင်းဘဏ္ဍာရေးနှင့် စက်မှုဝန်ကြီးဌာနများ၏ကူညီမှုနှင့် ပုဂ္ဂလိကကုမ္ပဏီကြီးများထံမှ အထောက်အကူများနှင့် အများပါဝင်နိုင်သော ရင်းနှီးမြှုပ်နှံမှုအထူးအခွင့်အလမ်းများကို အစီအစဉ်သစ်များက ကမ်းလှမ်းသင့်သည်ဟုလည်း ပြောသည်။

ဆန်စက်များ၊ လယ်ယာထွက်ကုန်အခြေခံများ အခြောက်ခံခြင်းနှင့် လယ်ယာထွက်ကုန်လုပ်ငန်း ဆောင်ရွက်ခြင်းများတွင် ရင်းနှီးမြှုပ်နှံမှုများကိုလည်း ခြုံငုံမိသင့်သည်ဟုပြောသည်။

ဖေဖော်ဝါရီတွင် ထိုင်းဝန်ကြီးချုပ်သဘာပတိ အဖြစ်ဆောင်ရွက်မည့် ထိုင်းရင်းနှီးမြှုပ်နှံမှု ဘုတ်အဖွဲ့အစည်းအဝေးတွင် လုပ်ဆောင်မှုအသစ်များကို မိတ်ဆက်မည်ဟုလည်း ဆွမ်ကစ်ကပြောသည်။

Source-Bangkok Post

ဥက္ကာ #MeKongNews

Photo- Bangkok Post

တစ်နိုင်ငံလုံးတောက်တခတ်ခတ်

တစ်နိုင်ငံလုံးစိတ်ဝင်စားကြသည့် ဗစ်တိုးရီးယားလေး အဓမ္မကျင့်ခံရမှုတွင် စွဲချက်တင်ခံထားရသည့် သံသယတရားခံ အောင်ကြီးကို တရားရုံးက ဒီဇင်ဘာလ ၁၈ရက်က တရားရှင်လွှတ်လိုက်သည်။ မြန်မာတစ်နိုင်ငံလုံးမှ လူထုများက တရားခံမှာ အောင်ကြီးမဖြစ်နိုင်ကြောင်း ပြောဆိုနေချိန်တွင် အောင်ကြီးကို စွဲချက်မတင်မီ တရားရှင်လွှတ်လိုက်ခြင်း အပေါ် ပြည်သူအများက နှစ်ထောင်းအားရကြသည်။

ပြည်သူများ အများ ကျေနပ်နေချိန်တွင် ရတတ်မအေးသူများက ရဲတပ်ဖွဲ့ အကြီးအကဲများပင် ဖြစ်သည်။ တရားရုံး အမိန့်မချမီကပင် အောင်ကြီးကို တရားခံဟု စွပ်စွဲပြောဆိုခဲ့သည့် ရဲတပ်ဖွဲ့အနေဖြင့် ပြည်သူ့မေတ္တာကို မခံယူနိုင်ဘဲ သတင်းစာရှင်းလင်းပွဲ လုပ်ကာ အောင်ကြီးကိုပင် တရားခံဟုပင်ယူဆကြောင်း ထပ်မံ ပြောဆိုသည်။ ထို့အပြင် တစ်နိုင်ငံလုံးက ဂရုဏာသက်ကာ နာမည်ရင်းကို ဖျောက်ပေးထာသည့် ဗစ်တိုးရီးယားလေး၏ နာမည်ရင်း အပါအဝင် အချက်အလက်များကို ထုတ်ပြောလိုက်သည်။

ကလေးသူငယ်အကာအကွယ်ပေးရေးဆိုင်ရာ ဥပဒေအရ ပြစ်မှုမြောက်သည့် အချက်အလက်များကို ရဲတပ်ဖွဲ့၏ အဆင့်မြင့်ဆုံး အရာရှိများကိုယ်တိုင် ထုတ်ပြောလိုက်ခြင်းသည် မြန်မာတစ်နိုင်ငံလုံးကို အကြီးအကျယ် မှင်သက်သွားစေသည်။ ထို့အပြင် ဖေ့စ်ဘွတ်စာမျက်နှာတွင်လည်း အမှုနှင့် ပတ်သက်သည့် ထိန်းသိမ်းထားရမည့် လျို့ဝှက်စာရွက်စာတမ်းများကို ထပ်မံ တင်လိုက်ပြန်သည်။ အဆိုပါ ကိစ္စရပ်အပေါ် မြန်မာတစ်နိုင်ငံလုံး တောက်တခတ်ခတ် ဖြစ်ကြသည်။ အားလုံးက ဝိုင်းဝန်းရှုံချကာ ရဲတပ်ဖွဲ့ကို တရားစွဲဖို့ပင် ပြင်ဆင်နေကြပြီဖြစ်သည်။

တရားစီရင်ရေးမှ ချမှတ်ခဲ့သည့် အမိန့်အပေါ် ဆန့်ကျင်သည့် ပြောကြားချက်များကို ရဲတပ်ဖွဲ့က ပြောဆိုသည်မှာ ယခုတစ်ကြိမ်တွင် ပထမဆုံး အထင်ရှားဆုံးပင်ဖြစ်သည်။ အောင်ကြီးကို တရားစွဲဆိုစဉ်ကပင် လက်ညှိုးမှ သုတ်ထွက်သည်ဟု လှောင်ပြောင်ဖွယ် စကားများပြောကြားခဲ့သည်မှာလည်း ရဲတပ်ဖွဲ့ပင် ဖြစ်သည်။ ထို့ကြောင့် ဂရုဏာသက်ဖွယ် ဗစ်တိုးရီးယားအမှုတွင် မြန်မာနိုင်ငံရဲတပ်ဖွဲ့အနေဖြင့် ပြည်သူ၏ ဒေါသနှင့် ထိုက်တန်ပေသည်။ ဥပဒေနည်းကျ ပြည်သူကို ကာကွယ်ရမည့် အဖွဲ့အစည်းက ဥပဒေကို ဖောက်ဖျက်ကာ ပြည်သူအပေါ်ကျူးလွန်လိုက်သည့် ပြစ်မှုမှာ အလွန်ပင် အရှက်ရဖွယ်ဖြစ်သည်။ အဆိုပါ ကျူးလွန်မှု အပေါ် တာဝန်ရှိသူ တစ်ဦးချင်းမှ တာဝန်ယူတာန်ဝန်ခံရမည်ဖြစ်ပြီး အစိုးရတာဝန်ရှိသူများ ကိုယ်တိုင်ကလည်း မြန်မြန်ဆန်ဆန် ထိထိရောက်ရောက် အရေးယူရန် လိုအပ်မည်ဟု မဲခေါင်သတင်းဌာနက ယူဆသည်။

လူသတ်မှု ဖြစ်ရပ်အား ပြန်သရုပ်ပြရန် လူသတ်သမားငြင်းဆို

ဘန်ကောက်၊ ဒီဇင်ဘာ ၁၉

ထိုင်းနိုင်ငံ၊ ခွန်ကန်ခရိုင်မှာ အမျိုးသမီးတစ်ယောက်ကို သူ့အိမ်ထဲမှာသတ်ခဲ့ကြောင်းဝန်ခံထားတဲ့ လွတ်ငြိမ်းချမ်းသာခွင့်ရထားသောကွင်းဆက်လူသတ်သမားဆွမ်ကစ် ပမ်ပေါင်က ဖိအားများလွန်းသောကြောင့် ကျူးလွန်မှုပြန်သရုပ်ပြရန်ငြင်းဆိုခဲ့သည်ဟု ထိုင်းရဲများက ကြာသပတေးနေ့တွင်ပြောသည်။

သေဆုံးသူ ရက်ဆာမီ မူလီချန် ၅၁ နှစ်ကိုသတ်ခဲ့ကြောင်းဝန်ခံခဲ့ပေမဲ့ ဖိအားများသဖြင့် ဆရာဝန်တစ်ယောက်နှင့်ပြသစစ်ဆေးလိုကြောင်းတောင်းဆိုခဲ့သည်ဟု ထိုင်းဒေသ ၄ ပြည်နယ်ရဲချုပ် ဒုတိယရဲဗိုလ်ချုပ်ကြီး ချာရောင်ဝတ် ဆရီဝါနစ်ကပြောသည်။

သွေးတက်သက်သာအောင် ဆေးပေးထားပြီး ပြန်သရုပ်ပြရန်မလိုသည့်သူ့အခွင့်အရေးကို ကျင့်သုံးခဲ့သည်။

အိမ်မှထွက်ပြေးခဲ့သည့်လမ်းကြောင်းကိုသရုပ်ပြန်ရန် သဘောတူခဲ့သည်။

ပြန်သရုပ်ပြခြင်းဖြင့် ဖြစ်စဉ်အားပြန်သတိရစေပြီး စိတ်ဖိအားအလွန်များစေသည်ဟု ဆွမ်ကစ် ပြောသည်ဟုလည်း ကရာနောင်ရဲမှူးခါဂျွန်ရစ် ဝေါင်ဂရတ်ကပြောသည်။

ကြာသပတေးနေ့မနက်ပိုင်းတွင် ကရာနောင်ရဲစခန်းရှေ့တွင် လူရာဂဏန်းစုဝေးပြီး ဆွမ်ကစ်ကိုသေဒဏ်ပေးရန် တောင်းဆိုခဲ့သည်။

၂၀ဝ၅ ခုနှစ်တွင် အမျိုးသမီ ၅ ဦးကိုသတ်ခဲ့သည့်ဆွမ်ကစ်ကို ထိုင်းမီဒီယာများတွင် ၁၉ ရာစု၊ လန်ဒန်မြို့က အမျိုးသမီးများကို သတ်ဖြတ်ခဲ့သည့် Jack the Ripperကို အမှီးပြု၍ ထိုင်းနိုင်ငံ၏Jack the Ripperဟုဖော်ပြနေကြပြီး သူ့ကို ထောင်တစ်သက်ချခဲ့သော်လည်း ယခုနှစ်မေတွင် လွတ်ငြိမ်းချမ်းသာခွင့်ဖြင့်ပြန်လွှတ်ခဲ့ခြင်းကို စုဝေးခဲ့သူများက ထောက်ပြနေသည်။

ယခုလူသတ်မှုကြောင့် ထိုင်းတရားရေးဝန်ကြီးဌာနက ဆိုးရွားသောအမှုများတွင်ပါဝင်ခဲ့သည့် အကျဉ်းသားများနှင့် အကျဉ်းသားဟောင်းများစောင့်ကြည့်ရေး အထူးကော်မတီတစ်ရပ်ဖွဲ့စည်းခဲ့သည်။

အများပြည်သူဘေးကင်းရေးအတွက် ထောင်မှလွတ်သွားသည့်တိုင် ထိုအကျဉ်းသားများကို စောင့်ကြည့်ထိန်းချုပ်ရန် အထူးလုပ်ငန်းစဉ်များလိုအပ်သည်ဟုလည်း ထိုင်းတရားရေး ဝန်ကြီးဌာနကပြောသည်။
Source-Bangkok Post

ဥက္ကာ #MeKongNews

Photo-Royal Thai Police

တိုင်းရင်းသားစာပေယဉ်ကျေးမှုကို ထိန်းသိမ်းရာမှာ အခက်အခဲတွေရှိနေ

တာချီလိတ်မြို့မှ အာခါတိုင်းရင်းသားများ/Photo by MeKong News

တာချီလိတ်၊ ဒီဇင်ဘာ ၁၉

တိုင်းရင်းသား လူမျိုးစုတစ်စု၏ စာပေနှင့် ယဉ်ကျေးမှုများကို ထိန်းသိမ်းရာတွင် အခက်အခဲပေါင်းစုံကြုံတွေ့ ရကြောင်း အာခါတိုင်းရင်းသားခေါင်းဆောင်များက ပြောသည်။

တာချီလိတ်မြို့တွင် ဒီဇင်ဘာလ ၁၉ရက် နံနက်ပိုင်းက ကျင်းပသည့် (၁၂)ကြိမ်မြောက် အာခါရိုးရာ စုပေါင်း ခါးထောင်းဖားပွဲတော် အပြီး သတင်းထောက်များနှင့် တွေ့ဆုံစဉ်ပြောဆိုလိုက်ခြင်း ဖြစ်သည်။

၁၂ကြိမ်မြောက် အာခါရိုးရာခါးထောင်းဖားပွဲတော်/ Photo by MeKong News

အခြေခံပညာကျောင်းများတွင် စာသင်ကြားသည့်အခါ ဗမာစာဖြင့်သာ သင်ကြားသည့်အတွက် တိုင်းရင်းသား လူငယ်များမှာ ရိုးရာစာပေကို တတ်မြောက်ခြင်းမရှိတော့သည့် အခက်အခဲကို ကြုံရသလို အခြားအခက်အခဲများလည်း ရှိကြောင်း တာချီလိတ်မြို့မှ အာခါတိုင်းရင်းသား ခေါင်းဆောင်တစ်ဦးဖြစ်သည့် ဦးမင်းညိုကပြောသည်။

“ကျောင်းမှာစာသင်ကတည်းက ဗမာစကားနဲ့သင်ရတာပေါ့လေ။ ဒါကြောင့် လူငယ်တွေကြားမှာ မိမိဘာသာစကားကို ပြည့်ပြည့်စုံစုံပြောဖို့ နည်းနည်းအခက်အခဲတော့ ဖြစ်တယ်” ဟု ၎င်းက ပြောသည်။

နောက်ပိုင်းတွင် အာခါစာပေကို မူလတန်းအဆင့်တွင် သင်ကြားလာသည့်အတွက် တိုးတက်လာသော်လည်း အာခါစာပေသင်ကြားပေးသည့် ဆရာ၊ ဆရာမ အရည်အတွက်မှာ လိုအပ်နေဆဲဖြစ်ကြောင်း ဦးမင်းညိုက ဆိုသည်။

တိုင်းရင်းသားရိုးရာ အထိမ်းအမှတ်ပွဲများပြုလုပ်ရာတွင်လည်း အစိုးရမှ ထောက်ပံ့ပေးသည့် ငွေကြေးရှိသော်သည့် အဆိုပါငွေကြေးပမာဏမှာ နည်းပါးသည့်အတွက် အခက်အခဲကြုံရကြောင်း အာခါတိုင်းရင်းသားရေးရာဝန်ကြီး ဦးအာဗေလက ပြောသည်။

အာခါတိုင်းရင်းသားရေးရာဝန်ကြီး ဦးအာဗေလ/ Photo by MeKong News

“တိုင်းရင်းသား လူမျိုးစုတွေရဲ့ ရိုးရာယဉ်ကျေးမှုကို ဖော်ထုတ်တဲ့နေရာမှာ လိုအပ်ချက်တွေ ရှိတယ်။ ချထားပေးတဲ့ ရန်ပုံငွေက နည်းတဲ့အခါကျတော့ ကျွန်တော်တို့ ပြည့်စုံအောင် မကူညီနိုင်ဘူး” ဟု ၎င်းက ပြောသည်။

တိုင်းရင်းသားရိုးရာ အထိမ်းအမှတ်ပွဲများ ပြုလုပ်ပါက အများအားဖြင့် တိုင်းရင်းသားလုပ်ငန်းရှင်များနှင့် ပြည်သူများ၏ ကူညီမှုကိုသာ အားကိုးနေရဆဲဖြစ်ကြောင်း သိရသည်။

MK – 001