တာချီလိတ်၊ ဒီဇင်ဘာ ၈

တာချီလိတ်မြို့၊ ဝိန်းကျောက်ရပ်ကွက်ရှိ ဆောက်လုပ်ရေး လုပ်ငန်းခွင် တစ်ခုတွင် ဒီဇင်ဘာလ ၈ရက်၊ နေ့လည် ၁နာရီခွဲခန့်က လူတစ်ဦး လေးထပ်အမြင့်ပေါ်မှ ပြုတ်ကျကာ သေဆုံးသွားကြောင်း သိရသည်။

ကိုခင်မောင်သန်း(၄၂) (ဘ)ဦးဘိုးဆောင် ပါလျံ ကွပ်သစ်ရပ်ကွက်နေသူသည် နေ့လည် ၁နာရီခွဲအချိန်က အိမ်အမှတ် ဝက (ခ) ၂၄၄ Sun Moon Light Private Primary School မြန်မာ/အင်္ဂလိပ်ကိုယ်ပိုင်မူလတန်းကျောင်း ဝိန်းကျောက်ရပ်ကွက်ရှိ ဆောက်လုပ်ရေးလုပ်ငန်းခွင်လုပ်ကိုင်ရာမှ မြေညီထပ်ပါ လေးထပ်အဆောက်အဦးအပေါ်မှ ပြုတ်ကျသေဆုံးသွားခြင်းဖြစ်ကြောင်း သိရသည်။

MeKongNews

တာချီလိတ်၊ ဒီဇင်ဘာ ၈

မဟာမြတ်မုနိ ဘုရားကြီးကျောင်းတိုက်၊ ကျောင်းထိုင်ဆရာတော် အဂ္ဂမဟာသန္ဒမ္မဇောတိကဓဇ ဘဒ္ဒန္တပညာသာမိ ပျံလွန်တော်မူသွားပြီးနောက် လစ်လပ်နေသည့် ပဓာနနာယကဆရာ်တော် နေရာတွင် ပဓာနနာယက ဆရာတော်အသစ် တင်မြှောက်ပူဇော်ပွဲကို ဒီဇင်ဘာလ ၈ရက် နံနက်ပိုင်းက တာချီလိတ်မြို့၊ မဟာမြတ်မုနိဘုရားကြီး ကျောင်းတိုက်တွင် ပြုလုပ်သည်။

မဟာမြတ်မုနိဘုရားကြီးကျောင်းတိုက်မှ တိုက်အုပ်နာယက စာချဆရာတော် အရှင်အာဒိစ္စဝံသာလင်္ကာရအား ကျောင်းတိုက်အပ်နှံပွဲနှင့် ပဓာနနာယကဆရာတော် အဖြစ် တင်မြှောက်ပူဇော်ပွဲကြို ဒီဇင်ဘာလ ၇ရက်နှင့် ၈ရက် ၂ရက်ဆက်တိုက် ပြုလုပ်ခဲ့ပြီး ဒီဇင်ဘာလ ၈ရက်တွင် တာချီလိတ်မြို့၊ နဂါးနှစ်ကောင်ဆရာတော်မှ အရှင်အာဒိစ္စဝံသာလင်္ကာရအား ကျောင်းတိုက်အပ်နှံပြီး ပဓာနာယက ဆရာတော်အဖြစ် တင်မြှောက်ခဲ့သည်။

အဆိုပါ အခမ်းအနားသို့ နဂါးနှစ်ကောင်ဆရာတော်၊ ရှမ်းပြည်နယ်အရှေ့ပိုင်း သံဃာ့နာယကအဖွဲ့နာယက ကောင်းမူခမ်းဆရာတော်၊ ရှမ်းပြည်နယ်အရှေ့ပိုင်း သံဃာ့နာယက ဥက္ကဌ ဒူးယားကျောင်းဆရာတော်၊ ဂုံရှမ်းသံဃာ့နာယကအဖွဲ့ချုပ် ကျိုင်းခုံးဆရာတော်၊ ဝစီပိတ်ဆရာတော်နှင့် ဒမောဒယကျောင်းဆရာတော် အပါအဝင် ပင့်သံဃာ ၁၂၀ ကြွရောက်ခဲ့ပြီး တာချီလိတ်ခရိုင်အုပ်ချုပ်ရေးမှူး ဦးမြင့်နိုင်အပါအဝင် ဒါကာ၊ ဒါကာမများက လှူဘွယ်ပစ္စည်းများ လောင်းလှူကြသည်။

ပဓာနနာယကဆရာတော်သစ်ဖြစ်သည့် အရှင်အာဒိစ္စဝံသာလင်္ကာရသည် သက်တော် (၄၃)၊ ဝါတော် (၂၂) ရှိပြီဖြစ်သည်။

MK – 001

MeKongNews

တာချီလိတ်၊ ဒီဇင်ဘာ ၈

လူမျိုးတုံးသတ်ဖြတ်မှုဖြင့် နိုင်ငံတကာရာဇဝတ်ခုံရုံး – ICJတွင် မြန်မာနိုင်ငံကို ဂမ်ဘီယာမှ တရားစွဲဆိုထားသည်ကို ရင်ဆိုင်ရန်သွားရောက်သည့် နိုင်ငံတော်၏အတိုင်ပင်ခံပုဂ္ဂိုလ်သည် တစ်နိုင်ငံလုံးကို ကိုယ်စားပြု သွားရောက်ခြင်းဖြစ်သည့်အတွက် ဝိုင်းဝန်းထောက်ခံဆုတောင်းပေးကြရန် မြန်မာနိုင်ငံ ကက်သလစ်ဂိုဏ်းချုပ်ဆရာတော် ကာဒီနယ် ချားစ်မောင်ဘိုက ပြောဆိုလိုက်သည်။

ရှမ်းပြည်နယ်အရှေ့ပိုင်း၊ ကျိုင်းတုံမြို့နယ်၊ လွိုင်မွေဒေသတွင် ကက်သလစ်သာသနာရောက်ရှိခြင်း နှစ် ၉၀ ပြည့်အခမ်းအနားသို့တက်ရောက်လာသည့် ကက်သလစ်ဂိုဏ်းချုပ်ဆရာတော်က သတင်းထောက်များနှင့် တွေ့ဆုံစဉ် ပြောဆိုလိုက်ခြင်းဖြစ်သည်။

နိုင်ငံတော်၏အတိုင်ပင်ခံပုဂ္ဂိုလ်သည် ICJ တွင် ပုဂ္ဂိုလ်ရေးကိစ္စဖြင့် သွားရောက်ခြင်းမဟုတ်ဘဲ မြန်မာနိုင်ငံကို ကိုယ်စားပြုသွားရောက်ခြင်း ဖြစ်ကြောင်း ကာဒီနယ် ချားစ်မောင်ဘိုက ပြောသည်။

“သွားရောက်တာသည့် ပုဂ္ဂလိကအနေနဲ့ သွားရောက်တာမဟုတ်ဘဲ တစ်နိုင်ငံလုံးကို ကိုယ်စားပြုပြီး သွားရောက်တာ ဖြစ်တယ်။ အစိုးရအတွက်ရော၊ စစ်တပ်အတွက်ရော၊ ပြည်သူပြည်သားတွေ အတွက်ရော သွားရောက်တာ ဖြစ်တဲ့အတွက် ထောက်ခံကြရမယ်၊ ဆုတောင်းကြရမယ်” ဟု၎င်းက ဆိုသည်။

ထိုသို့ သွားရောက်ရာတွင် မြန်မာနိုင်ငံကိုယ်စားလှယ်အဖွဲ့အနေဖြင့် တစ်ဖက်မှ အမှန်အတိုင်းရှင်းပြပြီး တစ်ဖက်မှ အလွန်အမင်း အပြစ်ဖို့ စွပ်ဆွဲပြောဆိုမှုများကို ချေပနိုင်ရန်လိုအပ်ကြောင်း ကာဒီနယ် ချားစ်မောင်ဘိုက ဆိုသည်။

ထို့အပြင် နိုင်ငံတကာအနေဖြင့် မြန်မာနိုင်ငံအပေါ် ပိတ်ဆို့အရေးယူမှုများ ပြုလုပ်မည်ဆိုပါကလည်း ၎င်းအနေဖြင့် လက်မခံကြောင်း၊ အခြေအနေများ ပိုမိုကောင်းမွန်လာရန် ဝိုင်းဝန်းကူညီကြဖို့သာလိုကြောင်း ကာဒီနယ်က ပြောဆိုသည်။

“ပိတ်ဆို့မှုဘယ်လိုလုပ်လုပ် ရှိတဲ့သူ တတ်နိုင်တဲ့သူက မထိဘူး။ ထိမှာက ဈေးနှုန်းတွေတက်လာမယ်ဆိုရင် ဆင်းရဲသားလူအုပ်စုကြီးပဲ အခက်အခဲဖြစ်မယ်။ ဒါကြောင့် ပိတ်ဆို့မှု(Sanction) ကို လုံးဝ သဘောမတူဘူး” ဟု၎င်းက ပြောသည်။

ICJ တွင် တရားစွဲဆိုထားသည့် အမှုကို နိုင်ငံတော်အတိုင်ပင်ခံပုဂ္ဂိုလ်သွားရောက် ရင်ဆိုင်ခြင်းအပေါ် ထောက်ခံကြောင်းနှင့် နိုင်ငံတကာအနေဖြင့် မြန်မာပြည်သူလူထုကို ထိခိုက်အောင်မလုပ်ရန် ပြောဆိုထားသည့် ထုတ်ပြန်ချက်တစ်ရပ်ကိုလည်း မြန်မာနိုင်ငံ ကက်သလစ်ဂိုဏ်းချုပ် ကာဒီနယ်ချားစ်မောင်ဘိုက ပြီးခဲ့သည့်ရက်ပိုင်းက ထုတ်ပြန်ထားသည်။

ICJ ကိုရင်ဆိုင်ရန်အတွက် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဦးဆောင်သည့်အဖွဲ့သည် ယနေ့ ဒီဇင်ဘာ ၈ရက် နံနက်ပိုင်းတွင် နယ်သာလန်နိုင်ငံ၊ သည်ဟိတ်မြို့သို့ ထွက်ခွာသွားပြီဖြစ်သည်။

MK – 001

MeKongNews

တာချီလိတ်၊ ဒီဇင်ဘာ ၈

ကျွန်းပန်းပုရုပ်တစ်ရုပ် အပါအဝင် ပန်းပုရုပ် (၇)ရုပ်ကို တိုယိုတာကားတစ်စီးပေါ်မှ ဒီဇင်ဘာလ ၇ရက် နံနက်ပိုင်းတွင် တာချီလိတ်မြို့နယ်၊ မယ်ယန်းပူးပေါင်းစစ်ဆေးရေးဂိတ်၌ ပူးပေါင်းအဖွဲ့မှ ဖမ်းဆီးရမိကြောင်း သိရသည်။

ပိတောက်ဆွမ်းအုပ် တစ်အုပ်၊ ပိတောက်ယောင်ခြမ်း တစ်ခြမ်း၊ ကျွန်းပန်းပုတစ်လုံး၊ တည်သစ်တိုင်ပန်းပု (၂)လုံးနှင့် သစ်မြစ်ဆုံပန်းပု (၂)ခုတို့ကို ကျိုင်းတုံမြို့နေ ဦးစိုင်းတစ်ဆိုသူ မောင်းနှင်လာသည့် ယာဉ်ပေါ်မှ ဖမ်းဆီးရမိခြင်းဖြစ်ကြောင်း သစ်တောဦးစီးဌာနမှ သိရသည်။

• 

• 

တရားမဝင်သစ်မြစ်နှင့် ပန်းပုရုပ်များ သယ်ဆောင်လာသည့် ကျိုင်းတုံမြို့နေ ဦးစိုင်းတစ်နှင့် ယာဉ်နောက်လိုက် ဦးသိန်းမျိုးအောင်တို့ကို သစ်တောဥပဒေပုဒ်မ ၄၂(က)အရ အမှုဖွင့် အရေးယူပေးပါရန် တိုင်ကြားထားကြောင်း သိရသည်။

MK – 001

MeKongNews

တာချီလိတ်၊ ဒီဇင်ဘာ ၆

တာချီလိတ်မြို့တွင် ပြန်လည်ရောင်းချရန် တောင်ကြီးမြို့မှ သယ်ဆောင်လာင်သည့် ဆန်အိတ်များအပေါ် မယ်ယန်းဂိတ်တွင် အခွန်ကောက်ခံသဖြင့် ကားသမားအနေဖြင့် ဆန်အိတ်သီးသန့် မတင်ချင်တော့ကြောင်း ကုန်စည်ပို့ဆောင်ရေးယာဉ်လိုင်းများနှင့် ဆန်ကုန်သည်များထံမှ သိရသည်။

တောင်ကြီးမှ တာချီလိတ်သို့သယ်ဆောင်လာသည့် ဆန်အိတ်များကို တာချီလိတ်မြို့အဝင်ရှိ မယ်ယန်းစစ်ဆေးရေးဂိတ်တွင် ဆန်တစ်အိတ်လျှင် ကျပ် ၅၀၀၀၀ ဈေးသတ်မှတ်ကာ ၂ရာခိုင်နှုန်းအနေဖြင့် အခွန် ကျပ် ၁၀၀၀ ဆောင်ခိုင်းကြောင်း ကုန်စည်ပို့ဆောင်ရေး လုပ်ငန်းရှင်တစ်ဦးက ပြောသည်။

“တောင်ကြီး-တာချီလိတ်မှ ဆန်တစ်အိတ်ကို သယ်ခ ၃၅၀၀ပဲရတာ။ အဲဒီလိုကောက်တော့ ကားသမားတွေအတွက် မကိုက်ဘူး။ အဲဒါကြောင့် ဆန်သီးသန့်ဆို မတင်ချင်တော့ဘူး။ ဈေးပိုတောင်းတာတွေ ဖြစ်လာတယ်။ အမှန်ဆိုရင် ၂ ရာခိုင်နှုန်းက ထိုင်းဘက်ကို တင်ပို့မယ်ဆိုမှ ဆောင်ရမှာ။ ခုသယ်လာတဲ့ဆန်တွေက တာချီလိတ်မှာ ရောင်းဖို့သယ်လာတာ” ဟု အဆိုပါ လုပ်ငန်းရှင်က ပြောသည်။

ပြီးခဲ့သည့် နိုဝင်ဘာလ ပထမပတ်အတွင်းက တောင်ကြီးမှတင်လာသည့် ဆန်အိတ်များအတွက် မယ်ယန်းဂိတ်တွင် ကျပ် ၇၀၀၀၀ ပေးဆောင်ခဲ့ရကြောင်း တာချီလိတ်မှ ဆန်ရောင်းဝယ်ရေးလုပ်ကိုင်သူ ဒေါ်အေးပြုံးက ပြောသည်။

“ကျမတို့က တာချီလိတ်မှာပြန်ရောင်းတာပဲ။ ထိုင်းဘက်ကိုသွင်းမယ့်သူဆိုလည်း ထိုင်းကိုဝင်မယ့်ဂိတ်မှ ကောက်သင့်တာပေါ့။ အခုလိုပိုပေးရတော့ စားသုံးသူဆီမှာပဲ ဈေးပိုတက်သွားမှာပေါ့” ဟု ၎င်းကပြောသည်။

အခုလိုငွေကြေးကောက်ခံမှုမျိုး မရှိတော့သည့်မှာ ကြာမြင့်ပြီဖြစ်ပြီး ယခုလပိုင်းအတွင်းမှသာ ထပ်မံကြုံတွေ့ရခြင်း ဖြစ်ကြောင်း ၎င်းက ဆိုသည်။

ကုန်ပစ္စည်းများကို သယ်ဆောင်ရာတွင် တပိုင်တနိုင်စားသုံးရန်အတွက်မှတပါး ပြည်ပကို တင်ပို့ရန်ဖြစ်စေ၊ ပြည်တွင်း၌ ပြန်လည်ရောင်းချရန်ဖြစ်စေ ၂မျိုးစလုံးအတွက် အခွန်ပေးဆောင်ရမည်ဖြစ်ကြောင်း တာချီလိတ်မြို့နယ် နယ်စပ်ကုန်သွယ်ရေးဦးစီးဌာန ညွှန်ကြားရေးမှူး ဦးဝင်းလွင်က ဆိုသည်။

“ပြည်ပပို့မယ်ဆိုရင် ၂ ရာခိုင်နှုန်းဆောင်ရတယ်။ ပြည်တွင်းဝယ်ရောင်းဆိုရင် ပြည်တွင်းဝယ်ရောင်းခွန်ဆိုတာ ရှိတယ်။ ကျသင့်တဲ့အခွန်ကို ပြည်တွင်းအခွန်က တွက်ချက်ပြီးကောက်ခံပါတယ်။ အဲဒီအခွန်ကလည်း အရမ်းသက်သာပါတယ်” ဟု ၎င်းကပြောသည်။

ပြည်တွင်း၌ ဝယ်ရောင်းပြုလုပ်ရာတွင် ကြိုတင်ဝင်ငွေခွန်နှင့် ကုန်သွယ်ခွန်တို့ပေးဆောင်ထားပါက ပြည်တွင်းဝယ်ရောင်းခွန်ကို ထပ်မံပေးဆောင်ရန်မလိုသလို ထိုင်းဘက်ကသို့ ပိုဆောင်မည် ဆိုပါကလည်း မယ်ယန်းဂိတ်တွင် ၂ရာခိုင်နှုန်း ပေးဆောင်ပြီးပါက တံတားပေါ်တွင် အခွန်ထပ်မကောက်ရန် ပြောထားကြောင်း ဦးဝင်းလွင်က ဆိုသည်။

“အခွန်ယဉ်ကျေးမှုနဲ့ပတ်သက်ပြီး တချို့ကလည်း အသိပညာပေးတာနည်းတော့ သိပ်နားမလည်ကြသေးဘူး” ဟု ၎င်းကပြောသည်။

ကြိုတင်ခွန်ပေးဆောင်ထားသည့် ဘီယာကဲ့သို့ကုန်စည်များအတွက် ကြိုတင်ခွန်ပေးဆောင်ထားသည့် စာရွက်စာတမ်းကို ပြသပြီး ထပ်မံအခွန်ပေးဆောင်ရန် မလိုဘဲ ဖြတ်သန်းနိုင်ကြောင်း နယ်စပ်ကုန်သွယ်ရေးမှ သိရသည်။

နယ်စပ်ကုန်သွယ်ရေး၏ ပြောကြားမှုများအပေါ် နယ်စပ်ဝင်ပေါက်များကြီးကြပ်ရေး ရှမ်းပြည်နယ် ကိုယ်စားလှယ် ဦးမင်းအောင်က ဝေဖန်လိုက်ပြီး ဆန်စပါးကို ပြည်တွင်းစားသုံးမှုအတွက်လွတ်လပ်စွာ တင်ပို့နိုင်ကြောင်း ထောက်ပြပြောဆိုသည်။

ဆန်စပါးမှာ ကုန်သွယ်လုပ်ငန်းခွင် ကင်းလွတ်ခွင့်ရှိသလို မြန်မာတစ်နိုင်ငံလုံးတွင်လည်း မည့်သည့်နေရာတွင်မျှ ဆန်ကားကို အခွန်ကောက်ခံခြင်းမရှိကြောင်း ဦးမင်းအောင်က ပြောသည်။

“မြန်မာတစ်နိုင်ငံလုံးဘယ်မှာမှ မကောက်ဘဲ မယ်ယန်းတစ်ဂိတ်ထဲ ကောက်နေတာက နံပတ်တစ် ပြောစရာဖြစ်တယ်။ အခွန်လျာထားချက် ပြည့်မီရေးအတွက် လုပ်စရာတွေအများကြီးရှိပါသော်လည်း လမ်းကြောင်းပေါ်မှာ အနှောက်အယှက် ဖြစ်စေတဲ့ လုပ်ဆောင်ချက်တွေလို့ မြင်ပါတယ်” ဟု၎င်းကပြောသည်။

ဒေသစားသုံးရန်အတွက် တာချီလိတ်သို့သယ်ဆောင်လာသည့် ဆန်သာမက ကြက်သွန်၊ ထောပတ်သီးကဲ့သို့ ကုန်စည်များ အတွက်လည်း မယ်ယန်းဂိတ်တွင် အခွန်ပေးဆောင်ရကြောင်း ကုန်တင်ယာဉ်မောင်းများထံမှ သိရသည်။

MK -001

MeKongNews

Ref: Bangkok Post

ကန်ဘာရာ၊ ဒီဇင်ဘာ ၅

ဘန်ကောက်မှ သြစတေးလျနိုင်ငံ၊ မဲလ်ဘုန်းမြို့သို့ တင်ပို့သည့် ဆောင်းဘောက်များအတွင်းမှ အိုက်စ်မူးယစ်ဆေး ၁ ဒသမ ၆တန်ကို ရှာဖွေတွေ့ရှိခဲ့ကြောင်း သြစတေးလျရဲတပ်ဖွဲ့က ထုတ်ပြန်သည်။

အဆိုပါ မူးယစ်ဆေးပမာဏမှာ သြစတေးလျနိုင်ငံတွင် ဖမ်းမိရသမျှ မူးယစ်ဆေးမှုထဲတွင် အများဆုံး ဖမ်းဆီးရမိခြင်းဖြစ်ပြီး ယင်းအမှုနှင့်စပ်လျဉ်း၍ အသက် ၃၇နှစ်နှင့် ၃၈နှစ်အရွယ် အမျိုးသား ၂ဦးနှင့် ၃၇နှစ်အရွယ် အမျိုးသမီး တစ်ဦးကို ထိန်းသိမ်းထားကြောင်း ရဲတပ်ဖွဲ့က ထုတ်ပြန်ထားသည်။

ဖမ်းဆီးရမိသည့် အိုက်စ်တန်ဖိုးမှာ အမေရိကန်ဒေါ်လာ ၈၁၈သန်း(ကျပ် ၁၂၀၀ ဘီလီယံ)ကျော်တန်ကြေးရှိပြီး အိုက်စ်များနှင့်အတူ ဘိန်းဖြူ ၃၇ ကီလိုကိုလည်း ဖမ်းဆီးရမိကြောင်း သိရသည်။

ဖမ်းဆီးထားသူ ၃ ဦးကို ထောင်ဒဏ်တစ်သက်ချမှတ်နိုင်သည့် ပြစ်မှုဖြင့် တရားစွဲဆိုထားပြီး ပြီးခဲ့သည့် ယနေ့ ကြာသပတေးနေ့တွင် ရုံးထုတ်လာသည်။

ပြီးခဲ့သည့် ဇန်နဝါရီလအတွင်းကလည်း သြစတေးလျသို့ပို့မည့် အိုက်စ် ၁ ဒသမ ၇ ကီလိုကို အမေရိကန်နိုင်ငံ၊ ကယ်လီဖိုးနီးယားပြည်နယ်တွင် ဖမ်းဆီးရမိခဲ့သည်။ အဆိုပါပမာဏမှာ နိုင်ငံပြင်ပတွင်ဖမ်းမိသည့် မူးယစ်ဆေးပမာဏ အများဆုံးဖြစ်ပြီး အမေရိကန်နိုင်ငံအတွက်လည်း ပြည်တွင်း၌ ပမာဏအများဆုံးဖမ်းဆီးရမိခြင်း ဖြစ်သည်။

သြစတေးလျနိုင်ငံမှာ မူးယစ်ဆေးကို ဈေးကြီးပေးသုံးနိုင်သူ များပြားသည့်အတွက် နိုင်ငံတကာမှ မူးယစ်မှောင်ခိုသမားများ မျက်စိကျရာနေရာလည်းဖြစ်သည်။

NLH

MeKongNews

တာချီလိတ်၊ ဒီဇင်ဘာလ ၅

တာချီလိတ်မြို့ရှိ အရောင်းဆိုင်များတွင် သက်တမ်းလွန်ပစ္စည်းများ ယခင်ကထက် စစ်ဆေးတွေ့ရှိမှုနည်းပါး လာကြောင်း တာချီလိတ်ခရိုင်အစားအသောက်နှင့် ဆေးဝါးကွပ်ကဲရေးဦးစီးဌာန – FDA က ပြောသည်။

“အရင်က သက်တမ်းလွန်ပစ္စည်းတွေ အများကြီးတွေ့ရတယ်။ ခုနောက်ပိုင်းသိပ်မတွေ့တော့ဘူး။ နောက်ပိုင်းစစ်ဆေးနေတာသိတော့ ရောင်းတဲ့ဆိုင်တွေလဲ သတိထားပြီးပိုကြည့်ဖြစ်လာတယ်။ သူတို့ကိုယ်တိုင်က အမြဲရှင်းပစ်တယ်” ဟုတာချီလိတ်ခရိုင် အစားအသောက်နှင့် ဆေးဝါးကွပ်ကဲရေးဦးစီးဌာန (FDA) ဒုကြီးကြပ်ရေးမှူး(ဆေးဝါး)မှ ဒေါ်သိင်္ဂီထွန်းက ပြောသည်။

သုံးစွဲရန်မသင့်သည့်အစားသောက်ကုန်များ၊ အလှကုန်ပစ္စည်းများကို ကုန်စုံဆိုင်များတွင် ရောင်းချခြင်း ရှိ၊မရှိ တာချီလိတ်ခရိုင် အစားအသောက်နှင့် ဆေးဝါးကွပ်ကဲရေးဦးစီးဌာန-FDA မှ လစဉ်ကွင်းဆေး စစ်ဆေးလျှက်ရှိပြီး ယနေ့ ဒီဇင်ဘာလ ၅ရက်တွင် တာချီလိတ်မြို့အတွင်းရှိ ဈေးဆိုင်အချို့ကို စစ်ဆေးကာ ကန့်သတ်ပစ္စည်းများကို သိမ်းဆည်းဖျက်ဆီးခဲ့သည်။

ယနေ့စစ်ဆေးမှုတွင် တာချီလိတ်မြို့နယ်၊ ဝမ်ကောင်းရပ်ကွက်အတွင်းရှိ အလှကုန်ပစ္စည်းအရောင်းဆိုင်များနှင့် စားသောက်ကုန်အရောင်းဆိုင်‌များကို စစ်ဆေးခဲ့ပြီး သုံးစွဲရန်မသင့်ကြောင်း ကြေညာထားသည့်Queen အမှတ်တံဆိပ် Strawberry အချိုရည်၊ Hunter အမှတ်တံဆိပ် ငါးရုပ်ပုံjelly နှင့်သက်တမ်းလွန် အစားအသောက်များကို သိမ်းဆည်းဖျက်ဆီးခဲ့သည်။

အစား‌အသောက်နှင့်ဆေးဝါးကွပ်ကဲရေးဦးစီးဌာန အနေဖြင့် စားသုံးရန်မသင့်သည့် ပစ္စည်းများရောင်းချသည့်ဆိုင်များကို တွေ့ရှိပါက ယင်းပစ္စည်းများကိုထပ်မံမရောင်းချရန် ခံ၀န်ကတိထိုးခိုင်းပြီး ရောင်းချနေသည်ကိုတွေ့ရှိပါက အမျိုးသားအစားအသောက်ဥပဒေပုဒ်မ ၂၈(က) အရ အရေးယူဆောင်ရွက်သွားမည်ဖြစ်ကြောင်း ဒေါ်သိင်္ဂီထွန်းက ပြောသည်။

Mi Lae

MeKongNews

တာချီလိတ်၊ ဒီဇင်ဘာ ၄

တာချီလိတ်မြို့နယ်အတွင်း ၁၉၉၂ ခုနှစ်မှ ၂၀၁၁ ခုနှစ်အထိ စိုက်ပျိုးမြေအဖြစ် လျှောက်ထားရယူထားပြီး လုပ်ငန်းအကောင်အထည် ဖော်ဆောင်နိုင်ခြင်းမရှိသည့် မြေလွတ်၊ မြေလပ်နှင့် မြေရိုင်း ဧက (၂၀ဝ၀) နီးပါးကို ပြန်လည်သိမ်းဆည်းလိုက်ကြောင်း သိရသည်။

စိုက်ပျိုးမြေအဖြစ် လုပ်ကိုင်ရန် လျှောက်ထားရယူထားသည့် မြေများကို (၄)နှစ်အတွင်း အကောင်အထည်ဖော်ရ မည်ဟု မြေလုပ်ကိုင်ခွင့်ချထားပေးစဉ်က စည်းကမ်းသတ်မှတ်ထားပြီး ထိုသို့ အကောင်အထည်ဖော်ခြင်း မရှိသည့် မြေများကို ပြန်လည်သိမ်းဆည်းခြင်းဖြစ်ကြောင်း တာချီလိတ်မြို့နယ် လယ်ယာမြေစီမံခန့်ခွဲရေးနှင့် စီမံကိန်း ဦးစီးဌာနမှ သိရသည်။

တာချီလိတ်မြို့နယ် မိုင်းယောင်းကျေးရွာအုပ်စု၊ လွယ်တော်ခမ်းကျေးရွာအုပ်စုနှင့် ဟောင်လိတ်ကျေးရွာအုပ်စု၊ တာလေမြို့ နားယောင်းကျေးရွာအုပ်စုနှင့် ကျိုင်းလပ်မြို့နယ် နမ့်ခင်းကျေးရွာအုပ်စုတို့မှ မြေဧက ၁၉၆၈ ဒဿမ ၂၉ ဧကကို မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဥပဒေပုဒ်မ ၂၂(ဂ)၊ နည်းဥပဒေ ၅၁(ခ) တို့နှင့်အညီ ၂၀၁၉ ခုနှစ် သြဂုတ်လ ၁၈ရက်နေ့မှ စ၍ လုပ်ပိုင်ခွင့်၊ အသုံးပြုခွင့်များကို ရုပ်သိမ်းလိုက်ပြီး ပေးသွင်းထားသော အာမခံကြေးများကို နိုင်ငံတော်ဘဏ္ဍာအဖြစ် သိမ်းဆည်းလိုက်ခြင်းဖြစ်ကြောင်း သိရသည်။

ပြန်လည်သိမ်းဆည်းလိုက်သည့် မြေဧက ၁၉၆၈ ဒဿမ ၂၉ ဧကထဲတွင် တာချီလိတ်အခြေချစစ်ဗျူဟာမှ မိုင်းကိုးကျေးရွာအုပ်စုအတွင်း ရယူထားသည့် စိုက်ပျိုးမြေဧက ၃၆၇ဧကလည်း ပါဝင်ကြောင်း သိရသည်။

MK – 001

MeKongNews