The Hague၊ ဒီဇင်ဘာ ၁၂
မြန်မာနိုင်ငံအနေနဲ့ လူမျိုးတုန်းသတ်ဖြတ်မှုရှိ၊ မရှိစုံစမ်းဖော်ထုတ်နေတဲ့ကုလသမဂ္ဂအချက်အလက်ရှာဖွေရေးအဖွဲ့တွေကို ပြည်ဝင်ခွင့်ပြုပြီး ပူးပေါင်းဆောင်ရွက်ဖို့ နိုင်ငံတကာတရားရုံး ICJမှာ ဂမ်ဘီယာနိုင်ငံကိုယ်စားလှယ်အဖွဲ့ကိုဦးဆောင်နေတဲ့ဂမ်ဘီယာတရားရေးဝန်ကြီး အဘူဘက်ကာ တမ်ဘာဒူက တောင်းဆိုလိုက်ပါတယ်။
ဒီဇင်ဘာ ၁၂ ရက် ကြာသပတေးနေ့မှာ မြန်မာနဲ့ဂမ်ဘီယာနှစ်ဖက်အပြန်အလှန်လျှောက်ထားမှုမှာ တမ်ဘာဒူကပြောတာပါ။
ဂမ်ဘီယာနိုင်ငံက လူမျိုးတုန်းသတ်ဖြတ်မှုတွေရှိတယ်ဆိုတဲ့စွပ်စွဲချက်အတွက် နောက်ဆုံးတောင်းဆိုချက်တွေအနေနဲ့ ကြားဖြတ်ကြိုတင်ကာကွယ်ထားရမယ့်လုပ်ငန်းစဉ် ၆ ခုကိုတင်ပြလျှောက်တင်ခဲ့ရမှာ တမ်ဘာဒူကပြောလိုက်တာပါ။
ဘင်္ဂါလီ(လျှောက်တင်ရာတွင်ရိုဟင်ဂျာဟုသုံးနှုန်းထား)တွေကိုဦးတည်ကျူးလွန်ခဲ့တယ်လို့ဆိုတဲ့ ရက်စက်တဲ့မှုခင်းတွေကိုစုံစမ်းစစ်ဆေးနေတဲ့ကုလသမဂ္ဂအချက်အလက်ရှာဖွေရေးအဖွဲ့တွေကို ပြည်ဝင်ခွင့်ပေးသင့်ပြီး ပူးပေါင်းဆောင်ရွက်သင့်တယ်လို့လည်း ပြောခဲ့တာပါ။
၂၀၁၇ ခုနှစ်၊ မတ်မှာ မြန်မာနိုင်ငံဆိုင်ရာအချက်အလက်ရှာဖွေရေးအဖွဲ့ကို ကုလသမဂ္ဂလူ့အခွင့်အရေးကောင်စီကဖွဲ့စည်းခဲ့ပေမဲ့ မြန်မာနိုင်ငံကတော့ အဲဒီအဖွဲ့ကို ပြည်ဝင်ခွင့်ပိတ်ခဲ့ပါတယ်။
အခုနှစ်စက်တင်ဘာမှာ အဲဒီအဖွဲ့က နောက်ဆုံးအစီရင်ခံစာတင်သွင်းခဲ့ပြီး အဲဒီအစီရင်ခံစာထွက်ခဲ့ချိန်ကျမှ မြန်မာနိုင်ငံကိုတရားစွဲဖို့စီစဉ်ခဲ့တာလို့လည်း ဂမ်ဘီယာရှေ့နေ့တစ်ယောက်က အစောပိုင်းမှာလျှောက်လဲခဲ့ပါသေးတယ်။
မြန်မာနိုင်ငံမှာ လူမျိုးတုန်းသတ်ဖြတ်မှုတွေရှိနေလို့ ကြိုတင်ကာကွယ်တဲ့လုပ်ငန်းစဉ်တွေဆောင်ရွက်ပေးဖို့ တောင်းဆိုကြောင်း ဂမ်ဘီယာတစ်နိုင်ငံတည်းကပဲ တရားစွဲခဲ့တာလို့လည်း လျှောက်တင်ရာမှာ တမ်ဘာဒူကရှင်းလင်းခဲ့ပါတယ်။
ဒါပေမဲ့ အင်္ဂါနေ့က ဂမ်ဘီယာနိုင်ငံကလျှောက်တင်ရာမှာတော့ အစ္စလာမ်မစ်ပူးပေါင်းဆောင်ရွက်ရေးအဖွဲ့ကိုယ်စား တရားစွဲခဲ့တာလို့ ပါဝင်ခဲ့ပါတယ်။
MeKongNews #Ohkkar
Photo-Screenshot From UN Live Stream
