ဘန်ကောက်၊ နိုဝင်ဘာ ၂၅

ထိုင်းအသက်ကြီးပိုင်း မျိုးဆက်များသည် သတင်းနှင့်အချက်အလက်များ ရရှိနိုင်ရန်အတွက် သမာရိုးကျ မီဒီယာ ပလက်ဖောင်းများကိုသာ ဖက်တွယ်နေဆဲဖြစ်ကြောင်း လေ့လာမှုတစ်ရပ်က ဖော်ပြသည်။

ထိုသို့ သမာရိုးကျ မီဒီယာပလက်ဖောင်းများကို ဖက်တွယ်ထားမှုကြောင့် နိုင်ငံ၏ ဒီဂျစ်တယ်ပြောင်းလဲရေး အရွေ့ကိုနှေးကွေးစေကြောင်း စစ်တမ်းကဆိုသည်။

လူထု၏ မီဒီယာရယူမှုကို လေ့လာသည့် ယင်းလေ့လာမှုစစ်တမ်းကို ထိုင်းနိုင်ငံ National Broadcasting and Telecommunications Comission နှင့် သမ္မားဆပ်တက္ကသိုလ်တို့ ပူးပေါင်းပြုလုပ်ခဲ့ခြင်း ဖြစ်သည်။
ယင်းစစ်တမ်းကို နိုင်ငံအနှံ့က ခရိုင် ၂၆ခရိုင်ရှိ အိမ်ထောင်စုပေါင်း တစ်သောင်းကို မေးမြန်းမှုအပေါ် အခြေခံခဲ့ကြောင်း သမ္မားဆပ်တက္ကသိုလ်၏ စီးပွားရေးပညာရှင် ဆူဖတ်ဆူဖာချာလာစိုင်က ဆိုသည်။

မျိုးဆက်အရသာမဟုတ်ဘဲ ပညာရေးအနိမ့်အမြင့်အရလည်း ဒီဂျစ်တယ်အသုံးပြုမှု ကွဲပြားနေသည်ကို အဓိက တွေ့ရှိခဲ့တယ်ကြောင်း မစ္စတာဆူဖတ်ကပြောသည်။

ယင်းစစ်တမ်းလေ့လာမှုမှာ ရုပ်မြင်သံကြား၊ ရေဒီယို၊ အွန်လိုင်း၊ ပုံနှိပ်၊ ရုပ်ရှင်နှင့် အိမ်ပြင်ပမီဒီယာတွေ အားလုံး ပါဝင်ခဲ့ကြောင်း သိရသည်။

မျိုးဆက်ကွာခြားမှုတင်မကဘဲ အဆိုပါမျိုးဆက်များ၏ ဝင်ငွေနှင့် ပညာရေးနောက်ခံအခြေအနေကပါ မီဒီယာ ရယူမှုပုံစံအပေါ်လွှမ်းမိုးမှု ရှိကြောင်း မစ္စတာဆူဖတ်က ပြောသည်။

နောက်ထပ် တွေ့ရှိမှုတစ်ခုမှာ ပုံနှိပ်မီဒီယာကျဆုံးခြင်းမှာ ဒီဂျစ်တယ်မီဒီယာ၏ ရိုက်ခတ်မှုဖြစ်သည်ကို ရှင်းလင်းစွာ သိခဲ့ရခြင်းပင် ဖြစ်ကြောင်း စစ်တမ်းကဆိုသည်။

“ပုံနှိပ်မီဒီယာအပေါ် ဒီဂျစ်တယ်ရဲ့ ရိုက်ခတ်မှုကို ရှင်းရှင်းလင်းလင်းတွေ့ခဲ့ရပါတယ်” ဟု မစ္စတာဆူဖတ်က ပြောသည်။

ယခုလေ့လာမှုစစ်တမ်းက လူထု၏မီဒီယာရယူမှုရေစီးနှင့် ပတ်သက်ပြီး ပိုမိုတိကျသည့် အချက်အလက်များကို မီဒီယာစီးပွားရေးလုပ်ငန်းများထံ ပေးနိုင်ရန်ရည်ရွယ်ကြောင်း သူက ထပ်လောင်းပြောဆိုသည်။

Ref: Bangkok Post
NNN

MeKongNews

အမြင့်ဆုံးပြစ်ဒဏ်မှ သေဒဏ်ဖြစ်

တာချီလိတ်၊ နိုဝင်ဘာ ၂၆

လူရာချီအသတ်ခံရသည်ဟု စွတ်စွဲနေသော ဂူတာပြင်ရွာကိစ္စ ပြစ်မှုကျူးလွန်သည်ဟု ကနဦးတွေ့ရှိသည့် တပ်မတော်သားများအပေါ် သေဒဏ်အထိချမှတ်နိုင်သော စစ်တရားရုံးဖြင့် စတင်စစ်ဆေးစီရင်မည်ဖြစ်ကြောင်း တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်လိုက်သည်။

ရခိုင်ပြည်နယ် ၊ဘူးသီးတောင်မြို့နယ် ဂူတာပြင်ကျေးရွာဖြစ်စဉ်အချို့တွင် တပ်မတော်အက်ဥပဒေ(The Defence Services Act ) ၊ တပ်မတော်နည်းဥပဒေများ(The Defence Services Rules )နှင့် အညီဖွဲ့စည်းခဲ့သည့် ဗိုလ်ချုပ်မြတ်ကျော် ဥက္ကဋ္ဌဌအဖြစ် ဦးဆောင်သော စုံစမ်းစစ်ဆေးရေးခုံရုံး ( Court of Inquiry )က စစ်တရားရုံးဖြင့် စစ်ဆေးစီရင်သင့်သည်ဟု တင်ပြခဲ့သည့် ထင်မြင်ယူဆချက်အရ စစ်ဘက်တရားစီရင်ရေး၏ လုပ်ငန်းစဉ်များ ( Process of Military Justice)အတိုင်း ဆောင်ရွက်လျက်ရှိရာ ပြစ်မှုကျူးလွန်သည်ဟု ကနဦးတွေ့ရှိရသူများအပေါ် အကျဉ်း စစ်တရားရုံးချုပ် ( Summary General Court-Martial) ဖြင့် ရုံးထိုင်စစ်ဆေးခြင်းအား နိုဝင်ဘာလ ၂၆ ရက်နေ့တွင် ဘူးသီးတောင်မြို့၊ နယ်မြေခံတပ်၌ ဆောင်ရွက်မည်ဖြစ်ကြောင်း သိရသည်။

” အကျဉ်းစစ်တရားရုံးချုပ်က တပ်မတော်အက်ဥပဒေပုဒ်မ ၁၁၇၊၁၂၁ အရ စစ်တရားရုံးဥက္ကဋ္ဌဌအပါအဝင် သုံးဦးက ရုံးထိုင်မှာဖြစ်ပါတယ်။ အမြင့် ဆုံးချမှတ်နိုင်တဲ့ပြစ်ဒဏ်က သေဒဏ်အထိဖြစ်ပါတယ်။” ဟု တပ်မတော် သတင်းမှန်ပြန်ကြားရေးအဖွဲ့ အတွင်းရေးမှူး ဗိုလ်မှူးချုပ်ဇော်မင်းထွန်းက ပြောသည်။

ထို့အပြင်တပ်မတော်အနေဖြင့် လွတ်လပ်သော စုံစမ်းစစ်ဆေးရေး ကော်မရှင်( Independent Commission of Enquiry- ICOE) နှင့် ပူးပေါင်းဆောင်ရွက်လျက်ရှိရာ ICOE ၏ အစီရင်ခံစာ ထွက်ရှိလာသည့်အချိန်တွင်လည်း အစီရင်ခံစာ၌ တပ်မတော်သားများကပြစ်မှုကျူးလွန်ရာတွင် ပါဝင်ပတ်သက် မှုရှိပါက ဥပဒေနှင့်အညီ ဆက်လက် စုံစမ်းစစ်ဆေး၍အရေးယူဆောင်ရွက်သွားမည်ဖြစ်ကြောင်း စစ်ဥပဒေချုပ်ရုံးထံမှသိရသည်။

ဂူတာပြင်ကျေးရွာ၌ လုံခြုံရေးတပ်ဖွဲ့ဝင်များက မွတ်ဆလင်၄၀ဝ ခန့်ကို သတ်ဖြတ်မှုကျူးလွန်ခဲ့သည်ဟု နိုင်ငံတကာ သတင်းဌာနအချို့က စွပ်စွဲပြောဆိုနေကြပြီး ဗိုလ်ချုပ်မြတ်ကျော်ဦးဆောင်သော စုံစမ်းစစ်ဆေးရေးခုံရုံးကို ၂၀၁၉ခုနှစ် မတ်လအတွင်းက ဖွဲ့စည်းခဲ့ခြင်းဖြစ်သည်။

စုံစမ်းရရှိသော သက်သေ အထောက်အထား အချက်အလက်များ ခိုင်မာမှုကြောင့် တရားစီရင်ရေးဖြစ်စဉ် ကြန့်ကြာမည်မဟုတ်ဘဲ အခက်အခဲမရှိပါက မြန်မြန်ဆန်ဆန်ဆောင်ရွက်နိုင်လိမ့်မည်ဖြစ်ကြောင်း ဗိုလ်မှူးချုပ်ဇော်မင်းထွန်းကဆိုသည်။

ဗိုလ်ချုပ် မြတ်ကျော် ဦးဆောင်သော စုံစမ်းစစ်ဆေးရေးခုံရုံး က ဘူးသီးတောင်နဲ့ မောင်တောနယ်မြေတွေကို ပြီးခဲ့တဲ့ ဇူလိုင်လမှာ သွားရောက် စစ်ဆေးခဲ့ပြီး နှစ်ကြိမ် စစ်ဆေးတွေ့ရှိချက်တွေအရ ဂူတာပြင်ကျေးရွာ ဖြစ်ရပ်တချို့တွင် ညွှန်ကြားချက်အတိုင်း လိုက်နာဆောင်ရွက်ရန် အားနည်းခြင်း တွေ့ရှိရပြီး ကျူးလွန်ခဲ့သူများ စစ်ဆေးပေါ်ပေါက်ခဲ့လျှင် စစ်စည်းကမ်းအရ အရေးယူမည်ဟူ၍ တပ်မတော်က ပြီးခဲ့သော သြဂုတ်တွင် ထုတ်ပြန်ကြေညာထားသည်။

ဘူးသီးတောင်မြို့နယ် ဂူတာပြင်ကျေးရွာအနီး လူသေအလောင်းများကို မြှုပ်နှံထားသော ကျင်း ငါးကျင်းအနက် သုံးကျင်းမှာ ရွာမြောက်ဘက်အဝင် လမ်းမကြီး၏ အနီးတွင်ရှိပြီး နောက်ထပ် ကျင်းအကြီး နှစ်ခုမှာ ရွာသုသာန် နားတွင်မြှုပ်နှံထားကြောင်း၊ အလောင်းများတွင် မျက်နှာကို အက်စစ်ငရဲမီးဖြင့် ဖျက်ဆီးခဲ့သောလက္ခဏာများ တွေ့ရပြီး ရွာကို တောင်နှင့် မြောက် နှစ်ဘက်ညှပ်ပြီး လာရောက်ပစ်ခတ်ခဲ့ခြင်းဖြစ်ကြောင်း AP သတင်းဌာနက ၂၀၁၈ ခုနှစ် ဖေဖော်ဝါရီလ သတင်းတပုဒ်တွင် ရေးသားခဲ့သည်။

အစိုးရကမုူ အာဆာ အကြမ်းဖက်သမားများ အပါအဝင် ရွာသား ၅၀ဝခန့်နှင့် လုံခြုံရေးတပ်ဖွဲ့ဝင်များ အကြား ထိတွေ့တိုက်ပွဲဖြစ်ပွားရာတွင် အကြမ်းဖက်သမား အလောင်း ၁၉ လောင်းရရှိခဲ့ပြီး စနစ်တကျမြှုပ်နှံသဂြိ င်ု္လ်ခဲ့ ကြောင်း ပြောကြားထားသည်။

ဂူတာပြင် ဖြစ်စဉ်မှာ ၂၀၁၇ ခုနှစ်၊ သြဂုတ်လ ၂၇ ရက်နေ့က ဖြစ်ပွားခဲ့ခြင်းဖြစ်သည်။

Source – People Power Myanmar

MeKongNews

သင်တန်းသား ၂၅ဦးတက်ရောက်

တာချီလိတ်၊ နိုဝင်ဘာ ၂၅

ကျေးရွာများတွင် ခေတ်မီစိုက်ပျိုးရေးနည်းစနစ်များ အသုံးပြုတတ်စေရန်နှင့် တိရိစ္ဆာန်များတွင် ရောဂါကျရောက်ပါက အချိန်မီကုသနိုင်သည့် နည်းစနစ်များ တတ်မြောက်ရန်အတွက် ကျေးရွာသားများကို တာချီလိတ်မြို့နယ်၊ ကျေးလက်ဒေသဖွံ့ဖြိုးတိုးတက်ရေး ဦးစီဌာနတွင် နိုဝင်ဘာလ ၂၅ရက်မှ စတင်ကာ ၅ရက်ကြာသင်တန်း ပေးသည်။

သင်တန်းကို တာချီလိတ်မြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန၊ စိုက်ပျိုးရေးဦးစီးဌာန၊ မွေးမြူရေးနှင့် ကုသရေးဦးစီးဌာန၊ ငါးလုပ်ငန်းဦးစီးဌာနတို့ ပူးပေါင်းကာ ဖွင့်လှစ်ခြင်းဖြစ်ပြီး ကျေးလက်နေပြည်သူများ သိသင့်သည့် စိုက်ပျိုးရေးဆိုင်ရာ ပညာရပ်များ၊ သီးနှံရောဂါပိုး ကာကွယ်ခြင်း သိကောင်းစရာများ၊ တိရိစ္ဆာကုသရေးဆိုင်ရာ သိကောင်းစရာများကို သင်ကြားပို့ချပေးမည်ဖြစ်ကြောင်း တာချီလိတ်မြို့နယ် ကျေးလက်ဒေသဖွံ့ဖြိုးတိုးတက်ရေး ဦးစီးဌာနမှ သိရသည်။

“ဒီဘက်ဒေသမှာက စိုက်ပျိုးရေးဆိုရင်လည်း မိရိုးဖလာနည်းတွေပဲ အသုံးများတယ်။ ဒါကြောင့် ခေတ်မီစိုက်ပျိုးရေးနည်း စနစ်တွေ သင်ကြားပေးမယ်။ မွေးမြူရေးဆိုရင်လည်း ရောဂါကျရောက်လာရင် အသက်မဆုံးရှုံးအောင် ကာကွယ်နိုင်မယ့် နည်းလမ်းတွေ သင်ကြားပေးမယ်” ဟု တာချီလိတ်မြို့နယ် ကျေးလက်ဒေသဖွံ့ဖြိုးတိုးရေး ဦးစီးဌာန မြို့နယ်ဦးစီးမှူး ဦးဇော်မိုးက ပြောသည်။

သင်တန်းကို နိုဝင်ဘာလ ၂၅ရက်မှ နိုဝင်ဘာလ ၂၉ရက်အထိ (၅)ရက်ကြာသင်ကြားပို့ချသွားမည် ဖြစ်ပြီး တာချီလိတ်မြို့နယ်အတွင်းရှိ မိုင်းဖုန်း(ခ)ကျေးရွာအုပ်စု၊ မိုင်းကိုးကျေးရွာအုပ်စု၊ နားယောင်းကျေးရွာအုပ်စု၊ မိုင်းဟဲကျေးရွာအုပ်စုနှင့် ဖန်မင်ကျေးရွာအုပ်စုတို့မှ သင်တန်းသား ၂၅ဦးတက်ရောက်ကြောင်း သိရသည်။

အဆိုပါသင်တန်းဖွင့်ပွဲသို့ တာချီလိတ်ခရိုင်ကျေးလက်ဒေသဖွံ့ဖြိုးတိုးတက်ရေး ဦးစီးဌာန ခရိုင်ဦးစီးမှူး ဦး ၊ တာချီလိတ်မြို့နယ် ဒုတိယမြို့နယ်အုပ်ချုပ်ရေးမှူး ဦးမင်းအောင်၊ တာချီလိတ်မြို့နယ် ကျေးလက်ဒေသဖွံ့ဖြိုး တိုးတက်ရေး ဦးစီးဌာန မြို့နယ်ဦးစီးမှူး ဦးဇော်မိုး၊ တာချီလိတ်မြို့နယ် စိုက်ပျိုးရေးဦးစီးဌာန မြို့နယ်ဦးစီးမှူး ဦးစိုင်းခင်ဇော်လတ်၊ တာချီလိတ်မြို့နယ် မွေးမြူရေးနှင့် ကုသရေးဦးစီးဌာန မြို့နယ်ဦးစီးမှူး ဦးကျော်ကျော်နိုင်တို့ တက်ရောက်သည်။

MK-001

MeKongNews

နိုဝင်ဘာ ၁၁ ၊ ဘန်ကောက်

ထိုင်းအမျိုးသားစီးပွားရေးနှင့်လူမှုရေးဖွံ့ဖြိုးတိုးတက်မှုကောင်စီ (NESDC) ကတင်သွင်းထားသည့် အခြေခံအဆောက်အဦဖွံ့ဖြိုးမှုစည်းမျဉ်းများကို ထိုင်းအစိုးရအဖွဲ့က လက်ခံကျင့်သုံးရန်ရှိ၊ မရှိ အင်္ဂါနေ့တွင် မေးမြန်းရန်ရှိသည်။

ကြာရှည်စောင့်နေရပြီး မြန်မာနိုင်ငံက ထားဝယ်အထူးစီးပွားရေးဇုန်နဲ့ ထိုင်းအရှေ့ဘက်စီးပွားရေးကော်ရစ်ဒါ(EEC)တို့ချိတ်ဆက်ပေးမည့် လမ်းကြောင်းကို ထိုင်းအစိုးရက စတင်အကောင်အထည်ဖော်ဖို့စီစဉ်နေချိန်တွင် မေးမြန်းရန်စီစဉ်နေခြင်းဖြစ်သည်။

မြန်မာ၊ ထိုင်းနိုင်ငံအလယ်ပိုင်းလွင်ပြင်ဒေသနှင့် အရှေ့ဘက်ကမ်းရိုးတန်းဒေသများကိုချိတ်ဆက်မည့်စီမံကိန်းများနှင့် ရသုံးငွေများခွင့်ပြုရာတွင် ဆက်စပ်ဝန်ကြီးများအနေနှင့် လမ်းညွှန်ချက်များအတိုင်းလိုက်နာရန် NESDCကဖြစ်စေချင်နေသည်ဟု သတင်းရင်းမြစ်တစ်ယောက်ကပြောသည်။

သတင်းရင်းမြစ်၏အပြောအရ NESDCရဲ့လမ်းညွှန်ချက်များက အခြေခံအဆောက်အဦဆိုင်ရာစီမံကိန်းများအတွက် အရည်အသွေးပြည့်မီစေပြီး နေရာ ၃ ခုကို နယ်စပ်ကုန်သွယ်ရေး၊ စိုက်ပျိုးရေးထုတ်လုပ်မှု၊ သဘာဝပတ်ဝန်းကျင်ကိုမထိခိုက်စေတဲ့စက်မှုလုပ်ငန်းများနှင့် သဘာဝပတ်ဝန်းကျင်နှင့်ကိုက်ညီသော ခရီးသွားလုပ်ငန်းများအတွက် အချက်အချာနေရာတစ်ခုဖြစ်လာရန် ရည်ရွယ်ထားသည်ဟုသိရသည်။

“ရထားလမ်းနဲ့ကားလမ်းတည်ဆောက်ရာမှာတော့ NESDCရဲ့ညွှန်ကြားချက်တွေက အဓိကကျနေတယ်။ လမ်းပြီးတာနဲ့ ထားဝယ်ကနေ EECကို ကုန်တွေ၊ လူတွေပို့ဆောင်ပေးရင် အဓိကအခန်းကဏ္ဍကနေပါဝင်နေမှာမို့လို့ပါ။” ဟုလည်းပြောသည်။

ကန်ချာနာဘူရီခရိုင်မှ နယ်စပ်မြို့ဖြစ်သော ဘန်နမ်ဖုန်ရွန်မြို့တွင်ရှိပြီး မြန်မာနိုင်ငံကိုဝင်နိုင်မည့်တံခါးပေါက်အဖြစ်ဆောင်ရွက်ပေးမည့် အထူးစီးပွားရေးဇုန်ဖွံ့ဖြိုးရေးအရှိန်မြှင့်တင်ရန်လည်း ထိုင်းအစိုးရကိုတောင်းဆိုသွားရန်ရှိကြောင်း NESDCကစီစဉ်ထားသည်ဟုလည်းပြောသည်။

ယနေ့ညနေပိုင်းတွင်စတင်ကျင်းပရန်ရှိပြီး ဝန်ကြီးချုပ်ပရာရွတ် ချန်အိုချာဦးဆောင်ကျင်းပသော ထိုင်းအစိုးရအစည်းအဝေးတွင် လမ်းညွှန်ချက်များလက်ခံကျင့်သုံးသွားရန် NESDCက စီစဉ်ထားကြောင်းလည်း ပြောသည်။

ထားဝယ်အထူးစီးပွားရေးဇုန်ဖွံ့ဖြိုးရေးကုမ္ပဏီအဖြစ် ထိုင်းနှင့်မြန်မာအစိုးရပူးပေါင်းတည်ထောင်ပြီး ဆိပ်ကမ်း၊ လမ်းနှင့်ရထားလမ်း၊ ဓာတ်အားပေးစက်ရုံ၊ ရေပေးဝေမှုစက်ရုံ၊ စက်မှုလုပ်ငန်းသုံးမြေ၊ ဆက်သွယ်ရေးတာဝါတိုင်များနှင့် မြို့နယ်တစ်မြို့နယ်ပါဝင်မည့် ထားဝယ်ကအဆောက်အအုံများကို အထူးရည်ရွယ်ချက်နဲ့မောင်းနှင်မည့်ယန္တရားများသုံးပြီး စီမံခန့်ခွဲရန်စီစဉ်ထားသော်လည်း ထားဝယ်တွင် ပင်လယ်ရေနက်ဆိပ်ကမ်းနဲ့အထူးစီးပွားရေးဇုန်တည်ဆောက်မှုနှင့်ဖွံ့ဖြိုးမှုများမှာ အကန့်အသတ်နှင့်တိုးတက်မှုရှိနေသည်။

Source-Bangkok Post

Photo-Bangkok Post